剖腹生產唔好咩?

順產當然好過開刀喇!! 雖然話就痛的, 但其實兩者差不多, 只不過分之前痛同之後痛.

生仔唔係一件難事, 係順產既過程當中, 唔止你一個人努力架, bb都會幫你. 係生產過程中, 有一,兩下你會感覺到bb都用力推緊, 如果你掌握到的話, 過程會好快同好順利. 生完之後, 多數瞓完一覺已經可以自由活動.

開刀雖然個刻唔痛, 但到你醒返都會痛. 起碼痛一個星期. 而且開刀好傷身, 身體會復完得比較慢, 因為要戒口, 好多補品唔可以即刻食.

除非bb過大, 否則我都唔建議開刀.

順產感覺係好的, 不過冇媽媽會咁分. 始終bb係我地個肚十個月. 呢十個月唔係假既. 係自己辛苦生出來, 又點會因為咁小事偏心呢!


***不過有的上一輩話, 順產的bb精靈的. 唔知係咪真. ***

個人體質唔同嫁喎 我就覺得開刀唔痛囉
不過私家同政府e院唔同嫁喎
我個fd係政府開刀痛左1個月 我係私家開痛左1星期到
自然分妃真係痛到你唔信 陣痛果d痛好難頂
痛到我嗌出黎仲捉住張床.. 嘩
如果我再生1定開刀囉 開刀真係唔痛嫁

你年紀細唔明白大人諗咩的了。
你姐夫係肉赤d錢gei, 佢係男人, 痛的又唔係佢。佢支持順產都係想節省金錢gei, 在政府醫院, 無病的孕婦一定要順產的。埋單幾百蚊。
而無事無干, 剖腹要去私家醫院, 埋單幾皮野。佢當然想慳返啦。
你叫你家姐同姐夫講, 剖腹生產的女人下面唔會鬆弛的, 物有所值。我係講真的, 陰道產係會鬆d的。
男人對呢d野都幾重視的, 佢俾錢時條氣會順d。

2008-10-03 16:28:56 補充：
我在私家剖腹生的, 真係唔多痛的, 一個星期咩都好返哂。

政府的剖剖腹一樣痛到阿媽唔認得的。因為佢地d醫生係新仔, 唔識用刀的, 我d朋友在政府生, 成個月都重痛痛地。而且佢地為節省資源, 死都唔肯俾止痛藥, 要扮到好痛至肯俾的。唔痛就奇了。

如果唔係因為特別原因，最好唔好開刀生，我都好怕痛，平時都怕打針的，但我自己都係自然分娩的，個種痛令你一生難忘，係一個好的回憶，雖然真的痛到你想跟自己講唔生，但係生完之後還是會想再生多個的，而且你可以看到自己的ｂｂ，包唔會認錯人地個個，好似我個女咁，出世時個樣都唔似我倆公婆的，但係我就好認得佢個樣啦，但開刀生最唔好就係會令到子宫變薄，而且若子宫開過刀，以後都只能開刀生，是沒法自然分娩的．

可以話你知,生BB嘅十級痛真係好難用文字形容,总之當可以叫停最好,或者都有諗過死咗好過,不過這樣痛苦衹係在生BB過程的幾小時至十幾小時內,(其實真係想死都衹係最後的階段,之前痛的感覺並不至於要死),但係順產的產婦,好多係生完之後就無乜事(不計陰道撕裂的小事),過两日就可出院。
我未試過剖腹生產,但係我試過順產之後第二天做絕育手術。生完BB嗰日同房的病人讚我好精神,真係我可以四圍走;到咗做完手術嗰日,我簡直痛到唔知點好,訓咗成日,唔起得身,於是同房病人話我直情似两個人。耍知,我嘅係小手術,傷口衹係幾針,如果係剖腹生產,傷口應該大得多,痛得多。
其實順產係自然的事,身體機能會自然應付和復元,除非生產過程有困難,或者產婦或BB有問題先需要剖腹,因為剖腹所做成的創傷更大,復元更困難。我就好高興我能見識過這種感覺。不過,如果你真係好怕痛,你就算係白然分娩都可以叫醫生幫你打針和吸氣減少痛感。
不過,就算剖腹生產感受唔到生產過程,都唔會唔影響親子關係,BB在你肚內生活了十個月,你日日都感覺到他存在,那種感情是忘不了的。

其實順產同開刀生都一樣係會痛，只不過係唔同時候痛，順產確實會比開刀痛多D
順產既痛，係你預計唔到既，程度同時間都唔知，有機會痛十幾個鐘，但亦有機會只係痛三四個鐘。而且生完之後有機會有會陰傷口，不過只係普通割損既痛楚，同埋一兩星期就會好番
開刀既話，生既時候麻醉左當然係唔痛啦，不過生完過左麻醉藥後，都一樣會痛。而且痛既時間會比順產耐，有機會兩三個星期傷口都仲係陰D陰D咁痛，仲要係身體入面既痛，雖然可以食止痛藥(要餵人奶除外)，但係始終都係要就住就住咁
我自己係順產生BB，因為我都係覺得冇經歷過生仔既痛根本就唔算生過仔。雖然我唔怕痛，但係到最後陣痛真係唔講得小，痛到標晒汗
雖然開刀就感受唔到生仔既痛楚，不過就一D都唔會影響BB同媽咪既感情既，開刀生出黎既BB都一樣會好痴媽咪
但係每個BB既性格唔同，所以就算係順產生出黎既BB，都唔一定會有好好既親子關係
有冇好既親子關係，係要睇你點樣教佢同放幾多心機時間比佢架姐~