我想問下投訴法官o既行為不當，應該寄去邊呀?

香港係司法獨立嘅. 所以申訴專員公署係無權處理市民對法官作出嘅投訴嘅.

由於司法判決係由法官根據法律在經過獨立斷案而作出, 所以市民係唔可以就法官對某件案嘅判決作出投訴. 你只可以依照法庭上訴基制就案件判决提出上訴.

但市民係可以對法官嘅行為操守, 專業才能作出投訴. 所有有關法官嘅投訴, 都係由終審法院首席法官或 / 及有關法院級別嘅法院領導法官去處理.
如果你想投訴嘅係終審法院法官 / 高等法院首席法官 / 區域法院首席法官 /裁判法院總裁判官 / 土地審裁處處長 / 終審法院司法常務官, 咁你就要向終審法院首席法官以書面作出投訴. 地址係: 香港中環砲台里1號
如果你想投訴嘅係高等法院法官 / 高等法院司法常務官及聆案官, 咁你就要向高等法院首席法官以書面作出投訴. 地址係: 香港金鐘道38號
如果你想投訴嘅係區域法院法官 / 家事法庭法官 / 區域法院司法常務官及聆案官 / 土地審裁處法官, 咁你就要向首席區域法院法官以書面作出投訴. 地址係: 香港港灣道12號
如果你想投訴嘅係裁判法院主任裁判官及裁判官 / 勞資審裁處主任審裁官及審裁官 / 小額錢債審裁處主任審裁官及審裁官 / 死因裁判法庭死因裁判官 / 淫褻物品審裁處主審裁判官, 咁你就要向裁判法院總裁判官作出投訴. 地址係: 九龍亞皆老街147M號九龍裁判法院10樓

你投訴時, 必須提交該法官姓名, 行為不當的事情詳情, 日期, 案件編號, 你自已的姓名及地址. 法院領導法官在調查後會書面回覆你.

對任何政府部門及公營機構有不滿服務及檢舉不當行為，你都可以向申訴專員公署投訴，表格可以到各民政事務處索取，或於政府網頁搜尋．