我想問... 點樣先知道自己READy應承佢求婚未?

先講佢適唔適合你:

1) 佢上年2月向你求婚, 你今日仲諗緊, 諗左年半咁耐, 點解?

2) 你地幾大? 20歲, 25歲同35歲既人有唔同既需求. 25歲就算最後分左手, 都比較容易再搵到個好既. 40歲分左手就要有心理準備要獨身勒. (不過呢點唔算重要, 獨身有時會好過嫁錯郎, 但確係一個理由)

3) 每個女仔搵終身伴侶都有一堆期望, 好似外表, 性格, 家底, 對方父母, 會否同奶奶同住, 宗教信仰等. 佢係咪符合到你心目中比較重要既期望?

4) 你地性格上有幾夾? 你講得出佢係好人, 你地應該唔多嗌交, 但日常生活夾唔夾? 好似一個鍾意去酒樓, 一個鍾意食西餐; 又或者一個鍾意早睡早起, 一個係夜鬼. 如果太唔夾, 婚後好難生活得開心的.

5) 一個好人, 唔聰明, 好難搵工, 唯有食屋企......你係咪可以接受到同一個咁既人做人世? 咁既人, 最大既問題就係唔可以獨立生活, 乜都要聽屋企人話 (唔聽話邊有飯開). 而且唔係太識保護自己同身邊既人, 可能你要強過佢先得.

6) 除左係一個好人, 你仲有咩欣賞佢? 如果佢無野叻過你, 令你仰慕. 咁你鍾意佢D乜? 點解你想同佢拍拖? 一個咁既人, 唯一既好處可能就係對你非常之好. 但佢又要聽屋企人話先有飯開, 咁你同佢屋企人相處有無問題?

7) 現實D講, 你本身條件好唔好? 佢係咪已經係你既選擇入面最好果個? 同佢分手, 你有機會搵到更好的男人嗎? (都係一樣, 唔適合既話, 分手好過日後離婚收場. 但你又要再開始尋尋覓覓既日子)

至於你係咪ready:

1) 結左婚, 柴米油鹽醬醋茶要自己來 (例如交水費).

2) 一定會有性行為, 要討論生唔生小朋友.

3) 要叫人阿爸阿媽做老爺奶奶, 甚至要照顧埋佢地.

4) 人地已經覺得你係大人, 有咩事出左事, 父母會expect你地自己搞掂佢. 仲有金錢分配, 日常家務分配, 出席對方朋友親人既活動, 呢d無得走.

5) 而且, 結左婚, 有事大家禍福同享, 佢負債你要幫手還; 佢無錢你地要一齊捱. 佢有病你要照顧佢, 佢既缺點你要日日面對.

6) 當然, 有衰野亦有好野, 兩個人一齊, 開心時有人分享, 困難時有人支持, 兩個人一齊, 好既可以互相扶持, 一起進步. 呢d都係婚姻好既地方.

所以係咪ready, 就要睇你地最少有無好好咁傾過上面既題目. 然後睇下你自己想唔想勒!

聽下你自己心入面講乜~
你有無信心比佢照顧
你有無信心將你交托比佢
你有無信心相信佢