想問關於我朋友的強姦案...

提訊 (mention)嘅意思, 係正式知會法庭佢被捕及將會控告佢. 現階段警方只係以初步控罪 (holding charge)告佢, 並將佢拘留, 唔係正式控罪. 所以在提訊時佢係無需答辨嘅. 到下次提堂時, 如果警方未完成調查工作, 就會再將案件押後. 如果警方已完成調查工作, 就會以正式控罪 (formal charge)控告佢. 到時佢就要對控罪作出答辯. 如果佢當時就認罪, 法官就會判佢有罪, 並將案件轉到高院判刑 (因為裁判法院最高判刑係兩年, 而強姦嘅刑罰 (終身監禁)已超越裁判法院嘅權力, 所以要轉到高院判刑). 被告期間會被還押監房. 如果佢唔認罪, 咁法官就會將案件排期轉到高院正式審訊.
由於強姦係嚴重罪案, 加上呢件案中事主未成年, 而且被告亦好大機會被加控非法禁錮, 為免被告搔擾証人或走佬, 所以唔俾保釋, 同錢銀多少無關. 俾唔俾保釋同審訊亦無關.
所謂盜亦有道, 一般嚟講, 犯風化罪嘅人入到監獄, 都少不免會俾人修理吓. 懲教署亦明白及知道呢樣, 所以通常會將犯風化罪嘅犯人嘅 “牌仔” (監獄身份証)中嘅控罪改為盜竊, 並叫犯人唔好自已爆響口, 低調d . 但囚犯無乜多, 時間最多. 所以少不免會有人由報紙報導中認到佢. 所以俾人打就少不免. 至於係唔係打到飛起, 就不至於嘅. 打得佢太傷, d阿sir唔可以隻眼開隻眼閉, 逼住做野, 咁打佢果班都有事. 打風化犯呢個動作只不過係監房文化, 等d大佬可以喺手下度攞彩啫, 無怨無仇, 佢地唔會為一個三唔識七嘅受害人而令自已加監嘅.

老實講, 如果佢真係有做, 就叫佢在裁判法院時就認罪. 法例規定, 認罪可得到1/3的刑期扣減. 因為佢認罪可免去正式審訊, 節省咗法庭, 律政署及警方的大量時間, 金錢及人力物力. 而且第一時間(裁判法院階段)認罪, 會被視為有充份悔意嘅表蜆, 係好重要嘅減刑因素. 加上佢認罪, 免咗受害人要出庭作證, 唔使受害人重歷案件, 免去受害人心理再受創, 亦係好重要嘅減刑因素, 尤其是強姦呢d咁 “家醜” 嘅事.
我當佢強姦加非法禁錮共判9年 (當啫, 可多可少, 呢排d強姦通常判7年, 非法禁錮2年). 如果佢第一時間認罪, 可得1/3的刑期扣減. 加上佢有悔意及免咗受害人出庭作證, 可減多約3-4個月, 即係:
9年 - 3年 - 3個月 = 判刑5年9個月.
如在監獄行為良好, 可再得1/3的刑期扣減:
5年9個月 = 69個月; 減1/3 = 46個月
即係實際要坐唔夠4年, 算係咁.
如果佢唔認罪而打輸, 判9年, 減1/3監獄行為良好, 即係實際要坐6年. 甘好多!
打強姦案辯方一般係針對個女仔願唔願意. 呢單案中個女仔只係去見工, 同被告三唔識七素未謀面, 無理由誣告佢. 話佢自願同被告性交, 陪審團亦唔會信. 贏面可以話係….零