bb應該幾大要戒尿片?

✔ 最佳答案

每個bb戒片時間都唔同，亦冇話bb要咩時候戒片，不過最好就係夏天時間同佢戒，因為戒片期間會經常瀨濕，夏天既話，就冇咁易冷親喇
大約一歲左右，你可以開始訓練bb，每次飲水/奶之後既五分鐘，都帶佢去廁所/便盤到殊殊，比個意識佢，知道呢個地方係小便用既，呢個時候就算佢痾唔到或者之前已經痾左都冇問題，因為係等佢習慣下架姐。若果咁岩佢係果個時候痾得出小便既話，可以大讚
訓練得有幾個星期 (每個小朋友都唔同，一定要比耐性同每日都做) bb就會習慣，亦會識得開始係你叫佢殊既時候用下力，到時佢成功小便既機會亦都開始大增
之後既就真係要睇小朋友既進度，一般訓練到四五個月，即係小朋友接近一歲半，都可以試下同佢完全唔著片，不過未必會習慣唔用片，所以就可以用輕鬆穿幫助去習慣一下佢去廁所既時間同習慣。因為輕鬆穿多數都靚過片片，所以可以同佢講
叫佢唔好整濕片片，要殊殊同吳吳時要話比媽咪知。如果唔用輕鬆穿都冇問題，咁你預左洗多d褲仔喇

跟住每次飲完水同食完野都要問下佢"要唔要去廁所呀?"半個鐘同佢去一次，等佢習慣坐下。如果係男仔就企係到試下，因為免得之後佢習慣左坐又要學企係到小便，他會混淆
開頭通常都會瀨，當瀨左既時候就同佢講褲褲/片片濕左喇，要換過第二條喇，下次要殊殊同吳吳記住話比媽咪知，唔好再整濕條靚褲褲/片片喇，千其唔好鬧佢，如果佢可以去到呢就好誇張咁讚佢，比小小獎勵佢，一塊餅都ok，總知比佢知道咁樣係乖乖既。又比佢睇下條褲仔冇濕到，同比佢睇下(如果係痰罐)
然後同佢一齊倒左佢，同佢一齊同d便便/尿尿講拜拜
過得一個月到(一定要每日都做)，佢會開始習慣。不過一玩開佢就唔記得左要小便，就算你問佢佢都唔答你，或者求其答你
如果你認真咁對代佢呢d答案就一定瀨。所以冇論佢答咩都好，都係睇番佢小便/大便既習慣，如果佢玩緊既，就一定要佢去完成功先再玩過
出街既話，開頭最好都用輕鬆穿，以免佢瀨濕褲仔。之後如果係出去短時間或者食下飯都可以試下唔著，不過就要密d同佢去廁所，同埋記住要帶多d褲同衫出街 (唔好以為淨係帶褲，因為尤其男仔，一瀨連衫都會濕埋)

如果小朋友係女仔，係佢差唔多可以掌握到既時候可以教埋佢要抹抹，比定張紙巾佢一去完就抹。唔使理佢抹得乾唔乾淨，因為反正可能下一次都瀨，只要佢意識到去完要做呢個動作就得喇

至於男仔，都係由一開始就教佢企係到小便，小便之後就自己著番條褲仔可以既話就幫一幫佢抽褲仔既後面 (因為多數都淨係著到前面)

不過每個小朋友既進度都唔同，千其唔好同人地比。唔好因為佢唔成功就鬧佢，因為佢地既身體機能未發展成熟，瀨左既話都唔怪得佢。大約都係咁上下喇，比d耐性同恆心，一定會成功。

回答 (2)