✔ 最佳答案
成個心口既意思真係鼠鼠底部既一半,定係只係一粒野咁呢?你既鼠鼠係咩品種?
A.如果唔係熊仔鼠,而係有一粒野在鼠鼠底部中間心,就可能只係鼠鼠既腺位
鼠鼠既腺即係鼠鼠發出體味既地方,小灰霸之類細隻既鼠(非熊仔鼠),腺位係同下方排泄位置成一直線,大約在肚中心,正常既情況下係會有少少凸起咁,係幾片野組成,而中間心就係凹既,不過唔係隻隻鼠都咁易睇到
腺位出現問題既話,主要都係腺塞,鼠鼠既腺位塞左,多數會見到呢個位有較多既黏液,又紅又腫,仲會好臭,咁就要帶鼠鼠去睇醫生先處理到,多數都要食抗生素,因為鼠鼠已被細菌感染
而正常既腺都會有d分泌物,但就唔會以上所講既咁
留意返以上既情況,如果冇問題既話就唔洗理佢,但都唔好成日攪佢,始終人既手都會有好多細菌,整得多反而易出事
如果腺有問題既話,就一定要睇醫生處理,多數都要食抗生素,因為鼠鼠已被細菌感染
B.如果唔係腺位,而真係生左粒野既話,林地係瘡,硬既話就係腫瘤,兩樣都要盡快睇醫生先得,雖然好多時初期鼠鼠較少會好累好病咁,但唔好以為咁就冇事,因為鼠鼠壽命短,新陳化謝快,d病毒都會忽然行得好快,到嚴重既時候先去處理,就好難救得好了
呢個情況唻講,愛協應該就唔會幫到你既鼠鼠,因為冇咁既儀器去幫鼠鼠做手術,去睇既話,多數會叫你帶鼠鼠去大圍;大圍係出名既鼠醫生,手術較貴,綠十字我就未聽過醫鼠好,唔知係咪有朋友試過話好呢?因我聽到情況既都比較負面,不過我既鼠就未試過
但如果$200係貴既話,真係好難會搵到鼠醫生,睇獸醫真係好貴既,加上呢個情況可能需要做手術,手術更加唔會話1,2百咁平,大約要$700至千多,其實養寵物除左要計買既費用同生活費之外,最好同時為寵物儲蓄,始終動物都會有生病既機會,就算而家真係冇辦法去睇,最好都由而家開始儲錢,可能趕得及,又或為將來做好準備
實在唔見有平過$200既鼠醫生,以下係鼠醫生既資料,旺角動物診所應該算比較平了:
最有口碑既鼠醫生:
大圍珍禽異獸及寵物醫院 DR.TIGER/DR.LAM
地址:大圍積信街75號地下
Tel: 2687 1030
http://www.taiwaiexotic.com/
基本診金$290,藥及手術另計
旺角動物診所 - 梁醫生
九龍窩打老道66號A地下
電話 : 2760-1026
診金大約$250,唔太肯定,有d唔記得,藥及手術另計
夏利維動物醫院 - Dr. Chris,Dr. Michael
天后永興街37號地下
電話 : 2570 6048
診金大約$280,唔太肯定,有d唔記得,藥及手術另計
C.睇醫生可能要book or如果未即時去到既話,可以做住以下既野先:
1)有第隻鼠既話要分籠,患病既鼠被第隻鼠乘虛打死(鼠鼠本身係獨居動物,其實咩情況都係一籠一鼠較好),加上多一隻鼠易令生病既鼠多一分受細菌感染既機會,而且佢地好可能已打交
2)保持環境乾爽清潔,避免有更多細菌再令鼠鼠受感染
3)唔好俾風直接吹到鼠鼠,要鼠鼠保持溫暖,太熱就可用風扇遠遠地吹
4)俾一d有營養既野佢食.可以試下俾d麥片or白麵包佢
5)如果鼠鼠唔食野唔飲水,就用手直接餵,都係唔食既話,就要俾d耐性試多d,鼠鼠唔舒服,又會好累咁,係冇咩胃口既
2008-09-12 03:26:17 補充：
養左2年真係老了,睇情況真係似係腫瘤,年老既鼠好多時都會有腫瘤既問題
年老既去睇醫生都未必會幫佢做手剩,風險太大,但都可以睇下醫生睇下有冇咩幫到鼠鼠,萬一日後既鼠都有唔舒服,記得盡早處理,唔係到咁嚴重先處理,就好難醫得好了
嚴重問題睇愛協真係冇咩幫助,睇過佢再轉大圍,大圍仲會收貴D,因為唔係第一間就睇佢,可以既話,當然可以揀去大圍or其他知道係較好既鼠醫生
2008-09-12 03:26:44 補充：
我之前既鼠係可以去到4年,但都要睇返鼠鼠本身既體質同日常既處理,鼠鼠已經有嚴重既問題,就較難長命了;一般熊仔鼠都係2,3年,1歲起身體都開始老化,都已經要小心
另外,照顧年老鼠要注意既事,可參考以下我回答既知識:
http://hk.knowledge.yahoo.com/question?qid=7008040603097
2008-09-14 00:35:27 補充：
唔洗客氣^^
可以睇下邊間近你屋企,咁鼠鼠就唔洗出門太耐,受驚既話都易惡化,但如果話平d既,應該係旺角動物診所平少少,邊間好就唔敢講,記得搵返負責鼠既醫生
腫瘤係硬,瘡係軟既,但小心唔好就咁用手去摸,好多菌
瘡都要睇情況,有d係要放膿(有都唔好自己放),放膿都係手術唻既
