想買投影機

首先三萬元太小.淨係全高清投影機都要二萬左右.電幕最基本都八,九千.而且投影機出唔到聲,買套最基本既5.1都要一萬幾千,仲有接線同安裝,我諗你最小預五萬.
1)入門級高清LCD投影機建議Epson TW2000,黑位做得最好,大約二萬二千.
2)冇錯高清投影機比較好,因為無論高清廣播或者藍光影碟都係呢個解像度,駛咁多錢搞個家庭影院用720p投影機真係嘥晒.
3)冇錯,投影機係冇數碼廣播調諧器的.
4)投影機就等於一個LCD mon,可以駁錄影機或者機頂盒睇電視,可以駁電腦及DVD機出畫面.
5)其實固定幕最好,但唔用時冇得捲埋,而且前面唔可以放嘢,電幕是次算,但頗貴,最起碼的Grandview都要八,九千.OS要萬一二,比較平既Dalite建議就唔建議,搞幾搞鄒咗仲衰.手拉幕係好平,通常第一次都會揀佢,二千幾就有,但一定用冇耐就會起波浪.
6)13呎我建議80吋,16:9幕,但呢啲嘢好個人,最好都係親自去店舖放啲畫面睇下,特別係動作片.因為幕太小唔夠臨場感,太大則長時間睇會好疲倦.
7)睇DVD用兩個喇叭比5.1差好遠.尤其配大畫面.建議起碼買夠5.1,7.1則可不必,13呎遠裝7.1效果一定唔好.坐得前畫面細,坐得後冇效果.建議買啲可以將訊號變成HDMI既AV擴音機,可以慳翻啲線材錢,因為由AV擴音機去投影機要好長線,每條分分鐘要成二千蚊以上.
8)建議Epson TW2000,其他較高階既會更貴.

最後留意投影機一定要全黑先有好效果,唔好諗住開燈睇,同埋房間遮光一定要做得好,否則白天睇唔到.仲有小心冷氣唔好直吹銀幕.

2008-09-10 22:11:47 補充：
1)我就係覺得呢啲電幕都有機會鄒所以唔建議,我公司都係用呢啲平電幕,冇錯係好過手拉幕,不過都係有小小波浪.如果預算比較緊都可以考慮,不過我建議一次過買好小小唔駛冇耐又要換.
2)$2000至$5000的5.1規模會比較細,不過其實效果都算可以,要小心係通常輸入位比較小,器材多可能會唔夠駁,而且多數冇轉HDMI功能.
3)我記得有啲機頂盒係可以俾你用USB接去電腦做錄影的,去電視或者投影機輸出畫面當然冇問題,接DVD錄影機錄電視節目都得,不過接兩部就要加分線器.你可以參考Vdigi網頁,所有機頂盒都啱用
http://www.vdigi.com.hk/support01.htma

2008-09-10 22:11:52 補充：
4)8仔都唔錯啦,也可以考慮Magic TV有內置硬碟的型號.
5)應該唔需要,可能係投影的散熱出咗問題令燈膽過熱,例如filter塞咗,或者安裝時出風口唔夠空間等.
6)Filter要耐唔耐清下.除此之外應該冇乜特別嘢搞.
7)接線唔難,比較困難是吊起銀幕及投影機,一來裝機師傅有鐳射水平儀可以幫佢mark安裝位,二來裝得唔好畫面對焦同對位會有問題,建議都係俾人裝好,安裝費大約$1500,好過自己搞到唔湯唔水.

2008-09-11 08:36:16 補充：
我要更正一下,對焦方便唔係問題,主要係比較難將投影機四四正正咁對正屏幕.

2008-09-12 00:32:59 補充：
R & V銀幕我未聽過,不過個價錢平得唔正常,小心係嗰啲斑房用投影幕.有機會係完全冇黑邊的四方形白幕.除咗容易鄒之外.觀感都唔好.通常你預算好緊,啲店舖都會介紹呢類幕俾你,只求做成生意,你之後唔好用就唔關佢事.
我建議最起碼買Da-Lite.佢都有啲16:9有黑邊既幕.價錢算係平.
通常在同一間店舖買晒所有嘢會有較好議價能力.其實Mitsubishi HC5500都可以考慮,應該會平小小.你可以睇下以下投影機綱頁的5大推薦投影機.
http://www.projectorcentral.com/1080p_home_theater_projectors.htm

2008-09-14 23:06:23 補充：
係架,其實依家只有高清翡翠台比較多高清節目,而且都唔係所有節目都係高清.
咁又唔可以咁就話機頂盒用處不大的.買一隻Bly-ray成二百蚊只提供兩個鐘頭娛樂.買機頂盒只要千幾蚊就有免費高清睇到,而且有啲節都冇碟賣,我覺得其實好值得.

我都選擇 SANYO 或 EPSON, 但剛剛出了一部 MItsubishi HC5500, 效果有何意見 ?

2008-09-11 13:29:32 補充：
平電幕有小小波浪.即是邊D唔會及幾多錢 ?

2008-09-12 11:29:07 補充：
thx