假結婚及綜援問題

我在5年前,有兩個男朋友,一個在香港一個在大陸,果陣我同香港男友嘈交,大陸果個又問我肯唔肯嫁佢,我就同佢在大陸結左婚.....
結婚後,大陸個老公拎住雙程黎香港住左一排,我地因為生活上有好多野唔夾,就嘈左一大輪,佢返大陸後我地冇再聯絡
後來我發覺自己有左BB,計番日期係我未結婚時已經有左,我就知個BB係我前男友的,因為我同大陸個老公未結婚時係冇性行為,而且結婚後只造過一次,同埋佢有用CONDOM
我同返前男友講,去驗埋DNA,亦証實係前男友的
其實我同前男友的感情當然深過同我老公啦,不過當時真係自己衰,鬥氣同大陸果個結婚,其實大陸果個只係識左個零月......
後來我同男友好番,一年前再生多左一個BB,亦都跟我男友姓
至於大陸個老公,在同佢失去聯絡4年後,我在香港見到佢大陸個朋友,佢朋友就比左佢個電話我,我打電話返去想佢同我搞離婚手續,佢點都唔肯,佢日日打比我幾十次,話到期返上去覆查,因為佢就黎到期拎程証,咁最後我都大住個肚上福建做左覆查......
至於小朋友的爸爸,佢搵錢唔多,但佢阿媽冇人理,又唔肯申請綜緩,就要個仔養佢,佢個仔講過要養我地,冇咁多錢養佢,但佢就又話自己要死......所以佢個仔怕左佢,就冇比錢我,我如果出去做野又冇人可以幫我手湊小朋友,我父母又唔會理我,佢家人都唔會理,所以而家我同兩個細路都拎綜緩
申請時,我有同社工講在大陸結過婚,我話我同個大陸男人冇再聯絡,不過冇講到9月時曾上過大陸果邊做覆查,我亦同社工講,小朋友的爸爸唔養佢地,我地為呢件事嘈左一場,我搵佢,佢都唔覆我......
不過小朋友出世後3個月,小朋友的爸爸有聯絡我,但講到錢呢個問題,我地就會嘈起上黎,唔講錢就OK,呢樣野我未同社工講
早5個月,兩個仔發燒,我又病埋,個人好暈好暈,我個朋友就通知左小朋友的爸爸黎睇我地,佢有黎到,我同兩個仔病到死死下咁,佢煲粥比我地食,餵小朋友食葯,在我家中留左一晚
其實當時我真係唔多記得,果晚佢好似同我講話其實想同返我一齊,但唔可以唔理佢阿媽,佢阿媽會去死......我淨係記得果晚佢攬住我訓......
我冇同佢一齊後,亦冇其他男朋友,我一心諗住湊大兩個細路,做個好媽,我諗住唔會再同佢地爸爸再一齊,亦唔會再有其他男朋友,所以我自己都唔會食葯打針去避孕,但呢個情況我完全冇意料過......個半月後,我發覺自己又有左BB......
我有打算落左個BB,因為我唔想又拎多份綜緩,我已為以前架事好後悔......但醫生話我個BB落唔到......詳細情況我唔多記得......
呢件事我未同社工講架,其實我都唔知點講......我覺得好醜......
我同小朋友爸爸講我又有左,佢話佢真係比唔到錢我地,又要還以前D咭數,又要養佢阿媽......佢自己都差唔多冇錢用......當然我地又嘈左一輪啦
唉~我而家都唔知點算,上面果個又未批單程証,我問過朋友,佢話通常覆查後三個月會批,但到而家都一年啦,我問過入境處,又話未有消息......我真係好驚,如果到入境處叫我上去做調查時,我又點解釋自己有3個小朋友,而唔係同大陸個老公生?當時我唔係假結婚,但我好驚而家入境處見我咁架情況會話我係假結婚囉......
我而家真係唔知點,好後悔自己當年咁冇腦......我真係好想死,但我又好唔捨得我D小朋友......
我想問如果你地係我,你地會點做?