小弟啱啱係八月頭去過上述兩個城市旅行，不過由於我係由佛羅倫斯入威尼斯，所以第一條問題答你唔到。
正如樓上有位朋友話齋，威尼斯個島本身無咩野玩，主要係行下佢啲橫街窄巷同埋去聖馬可廣場。其實個廣場都無咩野睇，不過聖馬可教堂就有一啲中世紀壁畫睇，但個教堂安檢好煩，我比佢煩到無入去。但記住要去睇係廣場出面嗰個gondola碼頭同埋係碼頭對面既嘆息橋。有時間應該去下外島，morano島有玻璃廠睇，仲可以玩下吹玻璃。
羅馬得3日半有啲“文”，不過首先想講下嗰架Leonardo Express。以香港人既標準來講，呢架火車簡直就係史前古董，唔單止架車勁舊，仲要變態到佢係密封車廂之餘而且車廂內全程無冷氣，我係羅馬入境意大利，係無任何飲品既仲夏時份比佢焗足九個字，試過一次都怕怕。不過真係要去羅馬機場又無咩更好既辦法，所以樓主一定要係上車前買定飲品同埋帶把電風扇仔上去。
羅馬可以去既景點好多，但首先一定要去梵蒂岡。聖城大致可以分為兩部份，即聖彼得大教堂加聖彼得廣場及梵蒂岡博物館。教堂同廣場都唔駛收入場費，入去最主要係見識兩地既宏偉同精雕細琢。最需要詳細留意既有位於教堂正中央既聖體傘，大師貝尼尼都要用8年先可以雕出來，你見過實物就知點解要用咁耐。而係教堂入口右側處既聖殤像亦係重點。當年米開蘭基羅係24歲之齡就雕出如此鬼斧神工之作時根本就無人相信係佢既作品，令佢一怒之下係作品上簽名，亦係佢唯一既簽名作品，其實你睇完你都未必信係佢雕，因為好難相信一個年輕人有咁既天材。聖彼得廣場好大好宏偉，值得花時間行下。如果樓主同我一樣係《天使與魔鬼》既fans，咁就要係廣場度搵下第二站“風”嗰塊雕塑啦。
梵蒂岡博物館有好多野睇，不過要留意既得幾個地方。第一重要既就緊係西斯庭教堂天花既壁畫，啲畫無論色彩、構圖同立體感都一流，令你好似活生生經歷左一次創世紀之旅。米開蘭基羅勁到你有時唔知牆上面既究竟係雕像定係畫，我有唔少部份都要睇左勁耐先至說服到自己嗰啲係畫而唔係雕像。西斯庭教堂係成個博物館既最後部份，之前會經過拉斐爾廳既簽署廳，主要係睇“雅典學院”。呢幅畫雖然無西斯庭教堂天花既壁畫咁令人驚奇，但係都好精美，一般書都話佢既透視感非常好，我發現呢個係事實，如果唔係幅畫係高牆上，你真係會覺得自己係望入去一條大走廊。
去完聖城，應該去鬥獸場。呢個建築物雖然好宏偉，但其實唔算太精彩，畢竟有成二千年歷史，殘啲都好正常。鬥獸場既飛係連埋可以入羅馬廢墟既，坦白講，嗰度都唔係幾好睇，除左一啲希臘式石柱較為可觀之外，都無咩好睇，樓主唔駛嘥太多時間。
之後一定要去萬神殿。萬神殿最巴閉係佢既跨拱係19世紀中期之前係全世界最闊，就算依家入去你都會覺得極為壯觀，你會驚訝點解二千年前既人會造到啲咁既野。仲有，呢度係名畫家拉斐爾(Raphael，頭先介紹嗰幅“雅典學院”既作者)，佢係死後百幾年被遷葬至此，係入口左邊遠處，呢個係對佢藝術成就既致敬。
之後順路一定要去許願池。呢個景點極靚，所以幾時都咁多人。去到梗係要許番個願，傳聞話要背池，然後將銀仔用手拋過另一邊膊頭先至靈。不過無論點都好，呢到真係靚到絕，樓主可以係度抖下。
然後有氣力既可以去埋西班牙樓睇。條樓睇好靚好宏偉，通向山上一間教堂，不過反而間教堂唔係幾靚。樓睇前既沉船噴泉係貝尼尼爸爸既作品，佢見嗰度水壓低，水噴得唔高，所以靈機一觸就唸到雕一隻漏緊水既船。噴出黎既水同大部份羅馬既噴泉水一樣都係飲得既，我係羅馬幾日都係飲噴泉水，完全無事，而且嗰度既水天然冰涼，又含豐富礦物質同埋免費，樓主如果自問唔係咁容易水土不服可以試下。另外，樓主如果想係羅馬唔駛煩交通既問題，最好就係去地鐵站買一張價值11歐羅既通用飛，佢令你可以係3日內搭任何地鐵同巴士都唔駛再比錢，非常方便。
羅馬同佛羅倫斯既博物館永遠都極多人，所以樓主要訂定飛先，以下係相關網址﹕
http://www.rome-museum.com/
另外仲有一啲補充內容，請樓主參考意見嗰part。
2008-09-11 20:04:18 補充：
另外有兩間靚到爆燈既教堂完全被人忽視，樓主有時間一定要去，我都係無意中行下行下先至入去見識到佢地既精緻。第一間係天使聖瑪利亞教堂(Santa Maria degli Angeli e dei Martiri)，佢就係共和廣場(Piazza Della Repubblica)之上，外觀就好似係石山鑿出來，好簡陋，但入面就勁宏偉，實在點唸都唸唔到。入面地板上面有啲好似行星軌跡既鑲嵌雕塑。後來睇番資料話呢啲係教廷用黎check下個日曆準唔準。另外，共和廣場個噴泉上面既雕塑都好靚，可以影多幾張相。
2008-09-11 20:04:23 補充：
另一間係勝利聖母堂(Santa Maria della Vittoria)，呢間教堂無天使的聖瑪利亞教堂同聖彼得教堂咁宏偉，但入面佈滿雕工極佳既天使雕像及其他裝飾，小弟覺得佢絕對靚過聖彼得教堂及梵蒂岡博物館入面既所有雕塑。成間教堂大部份作品都出自貝尼尼，特別要留意係教堂左側近聖壇既聖德蕾莎的狂喜(Ecstasy of St. Teresa)，呢個雕像雖然無咁出名，但我覺得手工絕對比得上聖殤像，而呢度亦係《天使與魔鬼》既第三站，即係“火”嗰間教堂。
2008-09-11 20:04:52 補充：
係萬神殿無幾遠既那弗勒廣場就係著名既四河噴泉，佢係貝尼尼最出名既傑作之一。不過近來佢要大修圍晒板，遊客只可以從幾塊透明板睇到少少個噴泉，睇來無一年半載都唔會開番。去到嗰度樓主可以睇埋隔離嗰個摩爾人噴泉，當然無咁靚。如果樓主覺得無時間既話可以唔去。
2008-09-11 20:05:15 補充：
講開《天使與魔鬼》(Angels and Demons)，如果樓主同小弟一樣係呢本書既fans，咁就可能有興趣去下嗰四個“科學祭壇”，頭先已經介紹左第三站既勝利聖母堂。第一站既基吉小聖堂係人民廣場(Piazza del Popolo)既人民聖瑪利亞教堂(Church of Santa Maria del Popolo)入面，不過呢間教堂好寸，永遠都唔開門，小弟摸左兩次門釘，樓主如果想去人民廣場行下，可以去睇下佢開唔開門。如果你由西班牙樓睇嗰邊行來，佢就係廣場上噴泉後面右手邊。
2008-09-11 20:05:36 補充：
另外仲有一間教堂值得去下，不過就同《天使與魔鬼》無關，佢係偉大聖瑪利亞教堂(Basilica di Santa Maria Maggiore )。呢間教堂係羅馬已經有1,600年歷史，係羅馬其中一間最重要既教堂，當然非常靚同宏偉。不過小弟又係去左兩次都入唔到去，但我懷疑我係去左佢後門所以先唔入得，因為我係想由Piazza dell'Esquilino 嗰邊入，樓主最好兜去另一邊既門口睇下入唔入得。
