出任陪審員的問題

第一樣要指出,陪審員傳票係法庭命令.除咗你病到臥病不起(啋!)或上庭日並無任何可能回港(例如在阿馬遜河迷咗路),你係一定要出庭嘅.你無好理由而唔到,法官會出手令通輯你,叫警察拘捕你帶你上庭解釋.如無好理由,佢有可能判你蔑視法庭,將你監禁.所以並唔係可以好似樓上位師兄咁講,寫信俾佢就可以唔出庭/唔做豬乸.你一定要到庭,先再嘗試說服法官唔使你做(如果你不幸抽中嘅話!).
做豬乸係唔使一定大學畢業嘅.任何具備下列條件的香港居民,均有資格出任陪審員:
-年滿21歲但未滿65歲;
-精神健全而並無任何使其不能出任陪審員的傷殘情況如聽覺或視覺的損傷等;
-品格良好(無案底)
-熟悉聆訊時所採用的語言(即中文或英文),視乎個別情況而定
所以你無讀Degree係唔關事嘅.做豬乸係唔使,亦無得申請嘅.基本上選豬乸係由司法常務官先由人事登記處度得到所21-65歲嘅香港居民資料,選出後將其列入豬乸臨時名單,再召佢上庭俾人揀.
上庭當日你會在陪審員集合處集合,再由工作人員叫你去第X號庭.你有機會參與刑事,死因研訊或民事案件.但整體嚟計,會較大機會參與刑事審訊,
到咗法庭,會有70-80人一齊俾人抽,每人配得一個冧把.法庭書記會從"抽獎箱"中抽出中獎號碼,然後叫名.俾人叫就泡出去俾書記對身分証.控辨雙方每人有5個反對機會.如其中一方反對你做豬乸就會講"Challenge".咁你就走得.如無人出聲你就中獎.如果你有好理由唔做豬乸,就要呢個時候同個官講.睇吓個官接唔接受.如果個官放人,咁你就走得,否則請乖乖埋位.
你被選為陪審員的當天,法官係會在庭上講解審訉過程及要點,並會告訴你案件預計審訉時間.之後會休庭而唔會立刻開始審訊.作用係俾你做準備,例如同公司請假.如你被選為陪審員,你公司無權反對唔放人.然後就開波打官司
大致程序係咁.而家先答番你問題:
1.香港法庭審案可用中文或英文,視乎個別情況而定.例如個官係鬼佬,又或控辨雙方有鬼佬大律師,又或被告係外國人,就會用英文審案但如清一色係中國人,就會用中文審案.用英文審訊時,以中文作供嘅証人會有翻譯員翻譯成英文.個法官只會用審訊語言向豬乸團講嘢,唔會透過翻譯向豬乸團講嘢.因為佢覺得你係聽得明佢發言嘅.
2.豬乸團審案時,可用筆記下資料,亦可向法官要求重新檢閱任何己呈堂嘅証物,及可要求法官對某一段証供作出解釋嘅.
但通常因為法官會在雙方舉証完畢後為整單案向豬乸團作結案總綱(Sum-up),所以好多法官都會鼓勵各豬乸唔使做筆記,而專注於觀察証人俾口供時嘅神情及言行舉止,從而去判斷該証人是否誠實可靠.所以其實唔需要做大量中文筆記嘅.
3.各豬乸根據佢嘅智慧及人生經驗去衡量案件中各樣証據/証人的可信性,而作出判斷.只要盡力作出判斷就可.唔會話誤咗大事,亦無需恐懼.從來絕對無試過有豬乸因案件判決而俾人告嘅.你嘅個人資料(包括埋個名)唔會在任何公開文件出現.在法庭亦有豬乸特別通道,電梯同休息室,唔會同個犯在庭外見到嘅.所以亦唔使驚俾人尋仇.
小弟日日見大把人開開心心做豬乸,安安全全歸家去.一日做5粒鐘賺四舊水,盡咗公民責任又有錢收.無乜好驚喎!!
至於用什麼理由申請豁免,小弟就唔方便講嘞.講真,十分一機會抽中你,抽中後再要唔俾人Challenge,又要個官唔放人,咁多關都走唔甩,做都抵啦!
再者,人人都唔肯做,香港法制就崩潰啦.無人將d壞人繩之以法,就無公義啦!
_________________________
提提你:
a.做豬乸衣着基本上無乜特別要求,只要整齊清潔就可以.咁當然,法庭係莊嚴地方,人字拖;無領/雞翼袖T-恤,超短迷你裙,bra-top就一定唔好啦.兩個字-莊重-就ok.
b.根據香港法例第3章"陪審團條例"第33條,任何僱主因僱員出任陪審員而終止僱用或威脅終止僱用其僱員,或在任何方面歧視其僱員,包括因為僱員需要充當陪審員而扣減其僱員合約內相方同意的有薪年假,僱主強積金供款,月薪及津貼等,即屬違法.一經定罪,最高可被判罰款$25,000元及入獄3個月.所以僱主係一定要放人兼出足月薪俾你,而且唔可以扣你任何福利.


2008-09-05 20:22:42 補充：
註: 豬乸 = Juror = 陪審員, 係行內術語, 唔係侮辱你.

2008-09-05 20:25:22 補充：
老實講我都想做吓豬乸, 但奈何唔做得.

2008-09-10 12:26:19 補充：
你在核對完身份証後, 可向個官提出話你英文唔好, 要求免役. 佢會問你讀書同工作資料, 再行定奪.

2008-09-10 12:29:14 補充：
唉! 見你真係咁唔想做... email我啦! 教你萬試萬靈免做陪審員嘅藉口. 唔喺呢度公開啦.

唔使咁驚，去到法庭仲要抽籤決定邊個做架。佢地叫一大班人(可能因為我果次單案有成4個被告咁多，每個被告都有3次拒絶陪審員的權利)去到法庭，一開庭就抽籤，抽到見法官仲有機會向大人講你有咩問題唔適合做，如果法官認為你真係唔適合，就會叫你走。如果佢覺得你適合，仲要過被告一關，被告覺得陪審員不適合，都可以叫你走(被告有三次拒絶的機會)。若果你今次去法庭報到過，之後兩年就一定唔會再叫你去。我成十年都無再被傳召過。

你可嘗試寫信到法庭秘書處, 你的信上有寫地址.
理由如你所說, 是否可獲豁免, 他們會回信通知.
做陪審員無規定寫什麼, 用什麼文字, 亦無東西在裁決後要交法庭.
做裁決法官會引導陪審員, 裁決是通過常理及證據, 公正和理性便可.
做陪審員是一個很好的經驗!