關於瑞士的野，請詳細答我的問題，THX

樓主問咁多野，我試下答晒佢。瑞士係一個成立於12世紀既中歐國家，鄰國有德國、法國、意大利等。當時現在既瑞士地區係一系列阿爾卑斯山既小自治區，後來佢地有感於經常被身邊列強侵擾，所以佢地聯合起來成立瑞士聯邦。聯邦規定所有加入既省唔可以單獨同外國結盟，另外大家亦要係戰爭中共同進退。之後瑞士雖然仍然經常比外國侵略，但強大既瑞軍每次都將敵人擊退，漸漸就無國家敢打佢，而瑞士亦好識做，宣佈永久中立，總之就咩都唔理，但求平安。

瑞士國內流行四種語言，大部份地方都講德文，西南部日內瓦地區附近講法文，南部講意大利文，仲有少部份地方講土話羅曼語。係瑞士，講德文就得啦，不過好彩既係瑞士人同德國人一樣，英文好到爆燈，我8月頭去瑞士旅行，全程講英文絕對OK。至於瑞士人就係一般鬼佬樣，頭髮同樣係多數黑色，少數人有金色，而眼睛通常都係黑或啡。但如果樓主對歐洲人種有少少認識，就會知道佢地個樣係典型日耳曼人樣，即係似德國人，靚仔靚女會少啲。

瑞士同意大利唔同，名勝古蹟少，多數都係去睇風景。當然夾硬搵就一定有，例如南方聖．摩利茲就有三座好得意既中世紀古堡。佢地得意在個樣同你係故事書見到既一模一樣，即係中間既建築物有城牆保護，而且城牆上仲有連續凹凹凸凸既箭孔。除左呢度，琉森城有一條係12世紀就存在既木橋，佢保存得好好，好靚。最正既係佢係正火車站出面，一出去就見到。除左呢兩個地方，我都唔係好知有咩古蹟，還望高人指點。

瑞士係一個好先進、安全同方便既地方，其實都無咩要留意。惟一要注意既係嗰度啲火車開車鐘意唔出聲，我試過唸住落車問職員啲野，點知架車唔聲唔聲閂門開走左！另外，雖然瑞士人英文好，但火車站寫出來既野都係德文，所以知幾個有用既德文單字會好有用，我會提供幾個﹕bahn係train，即係火車咁解而bahnhof係火車站。gleis係月台，abfart係出發既意思，有時亦解出發時間。nach係to即係去邊度咁解。fahrplan係火車時間表，fahrkarte係車飛。