急問,就黎7個月大應該點樣食先知亞b夠飽？

我真係完全非常極之感受到你而家既感覺，但係我可以話你知，就算我地係呢到比左幾多個方法同解答你都好，只要你同BB一日係佢到或者比佢湊，你都幾難改變到佢既做法。就算你同佢講左要點做點做，佢一樣可以係你唔係到既時候用番佢自己果套。除非你真係做得好絕，夜晚唔比就唔比，不過你地既關係就只會越黎越差
首先人奶方面餵到幾大都得架，冇話幾多個月就要停，不過BB係4-6個月已經可以開始食固體食物，咁即係係話飲奶已經唔係佢主要食糧同吸收營養既主要來源，而且隨著BB越黎越大，佢應該要係其他食物方面吸收更多不同既營養
根據我上面所講，佢開始左食固體食物之後，飲奶粉同人奶都冇咩分別，其實兩樣都唔夠比佢飽好耐架，佢而家食應該要兩餐粥仔/飯仔+3-4餐奶，每餐之間可以比小食、生果、果汁比佢食，不過唔好太多，否則會影響食正餐既胃口
佢而家7個月，食糊仔都冇問題，但係佢越黎越大，活動量同所需要既營養亦越黎越多，糊仔始終都係冇粥或者爛飯仔咁飽肚，所以佢真係可能會要食多幾餐
BB夜晚肚餓醒都唔出奇，反正有D BB真係7個月都未介得晒夜奶，不過半夜三更食糊仔真係奇怪左D，如果你一路都繼續咁樣落去，佢再大D習慣左，食完精神晒你就真係唔使訓喇
而家你應該開始比佢慢慢習慣要飲奶粉，開頭佢唔肯飲係因為飲人奶，有媽媽攪實，BB係超鐘意既，而家要抱開左，仲要啜個硬硬既膠咀，啜D奶又唔同味，所以叫到都喊定先。如果你想佢由人奶轉奶粉，你可以係佢最肚餓既時候，將人奶放入奶樽入面比佢啜，等佢習慣一下個奶樽同奶咀先，比佢知道用呢個野都飲到平時果種味。比佢飲得幾日習慣左，就可以試下開將奶粉開左之後同人奶溝埋，比例係人奶3:奶粉2，比佢習慣下奶粉既味道，之後再慢慢將比例增加，直至佢飲全奶粉。不過其間你就唔好再比佢飲淨人奶喇，如果唔係佢分得出邊D係人奶，你之前做幾多都前功盡棄。到佢適應左飲奶粉，你就可以比佢係夜晚醒果時飲奶粉而唔使食糊仔喇
另外冇論佢係食糊仔又好，粥仔又好，飯仔都好，都唔好強迫佢食，雖然佢係好心，想BB食飽D，不過越迫佢就越會有反效果。你地可以係訓之前果餐固體食物比飽D佢食，跟住訓之前再飲奶，如果唔係習慣左既話，都唔使再係半夜食固體食物架喇
通常屋企有老人家，都會煲粥/飯仔比BB食架，你奶奶點解會開呢D糊仔呢。仲有，半夜BB醒左係佢去開糊仔定係你去開呢？咁BB係同邊個訓呢？如果BB係同你訓既話，你鎖埋門佢都冇你辦法啦。如果係佢去開糊仔佢餵既話，咁真係佩服佢。而且睇得出你奶奶係好錫你個B，只不過佢用左以前舊有/自己既一套方法去做。
你要記住，佢咁做都係為左BB好，(雖然你會100%唔認同)既然你都已經比左個機會佢去照顧你既BB，你盡可能都放手比佢去做，唔如意既你可以同佢講，做唔做就另一回事，反正你已經盡左你既責任。你亦都可以到你自己照顧番BB果時用番你自己果一套，不過咁樣BB就會好難適應
我果時同奶奶住，自己要番工，BB比佢湊，真係會遇到好多好多唔如意唔稱心既事，最好就搵朋友傾，搵媽咪傾，總好過屈係心到成日都唔開心。就算你唔介意，我都可以同你傾~
祝BB快高長大，你自己都開心D~

2008-08-29 17:56:56 補充：
唔使客氣，我自己都遇過，所以都想幫下有相同遭遇既人~

2008-09-01 11:09:58 補充：
其實奶粉同糊仔都係經高溫處理而製成
所以開左水之後都會熱氣
佢而家7個月你可以煲開奶茶當水咁沖奶比佢飲
去藥房$10一包，可以煲起當兩至三次用架喇

bb如果係比老人家湊都一定會痴佢多d架喇
因為佢地咩都會就佢，又成日抱佢
不過你放心啦，到大d佢就會痴番你多d架喇
如果可以既話，夜晚跟番你訓，咁佢聞得你陣味多
自然就會痴你多d架喇
但係就算你幾唔中意你奶奶都好，唔好係小朋友面前講佢壞話
雖然佢而家係未識得講番出黎，但係一路咁話比佢聽人地咩唔好點點點
佢好易會有個潛意識，會係背後話人地，第時大個就會影響佢既性格架喇

2008-09-01 11:16:21 補充：
仲有我會add 你msn架，不過要等得閒先得，公司開唔到....
你可以去我blog到睇下，有時我都會係果到舒發一下我對"佢"既不滿
http://hk.myblog.yahoo.com/ekko-qqbb

其實有7個月都可以食粥仔,水果,蔬菜了,但粥仔要棉粥,可加蔬菜,但要係蔬菜容,同可食蘋果,雪梨,木瓜,香蕉,(不過都係要水果容架),如想知多d,可電母嬰健康院24587477查詢,d姑娘會解答你的問題的