何謂nation-states(民族國家)??西史高手請進!!10點!!

樓主咁好學，小弟梗係會幫下手。無錯，“race”係種族咁解，但樓主係書抄出來呢個解釋雖然啱，但講得太籠統，樓主唔明係正常既。

要了解咩叫國家，就要先了解歷史上不同國家既形式。係古代交通無咁發達既年代，一個國家可以好細，好似依家希臘咁細既地方就有五十幾個城市，每一個城市都係一個獨立既國家，雖然佢地屬於同一民族，講既都係希臘話，但總之就大家河水不犯井水。德國亦一樣，係統一之前，有三百幾個國家，同樣大家都係日耳曼人，亦同樣講德文。點解會咁﹖因為以前國家既形成係以個人或家族勢力為基礎，簡單地講，即係話邊過有權有勢，就有權劃一片地方做山寨王，係自己既勢力範圍入面做土皇帝。由於呢啲國家係以少數人既權力為基礎，所以整個國家都只會代表統治者既利益，普通人民只可以係統治者爭權奪利既工具。就算兩條村係鄰居，有同樣既文化同講一樣既語言，甚至大家都係親戚，但只要大家係唔同既國家，打起仗來都要打過你死我活。

另外有一啲國家又啱啱相反，大到無輪，領土包括多個不同既區域，國民亦包含不同既民族，蒙古、羅馬、不列顛(英國)都屬於呢類國家。呢啲國家雖然有不同既民族，但全部都會有一個民族支配其他民族，而好多時呢個統治者民族通常都壓迫同剝削其他被統治既民族，上述三國處於統治地位既民族分別係蒙古族、拉丁族及盎格魯．撒克遜族，而被統治既民族有漢族、高盧人及塞爾特人。

古代大部份國家都係上述既是但一種。不過係法國大革命，尤其係拿破崙戰爭之後，有唔少民族都開始厭倦上述既政治體制，因為無論點都好，大部份被統治既人民都被任意擺佈，根本就無前途可言。於是有啲思想比較先進既人就提議統一所有屬於同一民族既國家，即係任何有共同文化、語言、歷史、價值觀既人都統一於一個國家之下，佢地希望咁樣可以凝聚同一民族內每一個人既力量，令自己既民族更強大，亦更能抵禦外侮。呢啲由單一民族主宰既國家就係所謂既民族國家。最出名既例子就梗係德國。德國係統一前其實只係指中歐有三百個國家既一大片德語區。係十九世紀中，就有所謂既德意志統一運動，希望將除瑞士德語區以外既所有講德文既地區統一到一個國家之內。但當時有一個大問題，就係奧地利雖然嚴格來講係德語區，但由於奧地利帝國太大，國土有好多部份都唔係傳統既日耳曼範圍，而國民亦有唔少唔係日耳曼人，所以好難講將來既德國應唔應該包括奧地利。但更重要既係，奧地利勢力太大，若佢加入德國，幾乎肯定成為德國既龍頭，而奧皇肯定成為德皇，但有另一個有實力既國家想做德意志大佬，呢個國家就係普魯士。

有所謂一山不能藏二虎，最終兩國因為要爭做德國龍頭而係1866年打左一場大仗，就係普奧戰爭。奧地利係戰爭中徹底失敗，被普魯士趕出日耳曼聯邦，而其他日耳曼小國就以普魯士為龍頭既情況下統一成德國，並以普皇為德皇。另外，當年希特勒兼併奧地利同捷克既蘇台德區，就係因為佢想將上述兩個德語區納入德國範圍，從而令德國真正統一。只不過後來納粹戰敗，而戰後列強堅持德、奧兩國必須分治，所以到依家兩地仍然係兩個國家。