一個人去意大利..

樓主真係啱，小弟剛係8月頭一個人遊意大利及瑞士，睇黎你個trip可能係我調番轉咁行就得。

先講點去，小弟其實係由威尼斯坐車先去米蘭，然後到瑞士既Spiez轉車，跟住再搭車去入住位於少女峰地區既酒店。所以樓主其實可以先搭Eurostar去米蘭先，跟住就會有火車去佛羅倫斯。其實由米蘭每日都有一架Milano Express來回羅馬，不過就睇下你要點去啦。

其實兩個禮拜遊意大利好夠，我發覺羅馬玩四日三夜，佛羅倫斯都係最多四日三夜就夠，我先介紹羅馬。

羅馬可以去既景點好多，但首先一定要去梵蒂岡。聖城大致可以分為兩部份，即聖彼得大教堂加聖彼得廣場及梵蒂岡博物館。教堂同廣場都唔駛收入場費，入去最主要係見識兩地既宏偉同精雕細琢。最需要詳細留意既有位於教堂正中央既聖體傘，大師貝尼尼都要用8年先可以雕出來，你見過實物就知點解要用咁耐。而係教堂入口右側處既聖殤像亦係重點。當年米開蘭基羅係24歲之齡就雕出如此鬼斧神工之作時根本就無人相信係佢既作品，令佢一怒之下係作品上簽名，亦係佢唯一既簽名作品，其實你睇完你都未必信係佢雕，因為好難相信一個年輕人有咁既天材。聖彼得廣場好大好宏偉，值得花時間行下。如果樓主同我一樣係《天使與魔鬼》既fans，咁就要係廣場度搵下第二站“風”嗰塊雕塑啦。

梵蒂岡博物館有好多野睇，不過要留意既得幾個地方。第一重要既就緊係西斯庭教堂天花既壁畫，啲畫無論色彩、構圖同立體感都一流，令你好似活生生經歷左一次創世紀之旅。米開蘭基羅勁到你有時唔知牆上面既究竟係雕像定係畫，我有唔少部份都要睇左勁耐先至說服到自己嗰啲係畫而唔係雕像。西斯庭教堂係成個博物館既最後部份，之前會經過拉斐爾廳既簽署廳，主要係睇“雅典學院”。呢幅畫雖然無西斯庭教堂天花既壁畫咁令人驚奇，但係都好精美，一般書都話佢既透視感非常好，我發現呢個係事實，如果唔係幅畫係高牆上，你真係會覺得自己係望入去一條大走廊。

去完聖城，應該去鬥獸場。呢個建築物雖然好宏偉，但其實唔算太精彩，畢竟有成二千年歷史，殘啲都好正常。鬥獸場既飛係連埋可以入羅馬廢墟既，坦白講，嗰度都唔係幾好睇，除左一啲希臘式石柱較為可觀之外，都無咩好睇，樓主唔駛嘥太多時間。

之後一定要去萬神殿。萬神殿最巴閉係佢既跨拱係19世紀中期之前係全世界最闊，就算依家入去你都會覺得極為壯觀，你會驚訝點解二千年前既人會造到啲咁既野。仲有，呢度係名畫家拉斐爾(Raphael，頭先介紹嗰幅“雅典學院”既作者)，佢係死後百幾年被遷葬至此，係入口左邊遠處，呢個係對佢藝術成就既致敬。

之後順路一定要去許願池。呢個景點極靚，所以幾時都咁多人。去到梗係要許番個願，傳聞話要背池，然後將銀仔用手拋過另一邊膊頭先至靈。不過無論點都好，呢到真係靚到絕，樓主可以係度抖下。

然後有氣力既可以去埋西班牙樓睇。條樓睇好靚好宏偉，通向山上一間教堂，不過反而間教堂唔係幾靚。樓睇前既沉船噴泉係貝尼尼爸爸既作品，佢見嗰度水壓低，水噴得唔高，所以靈機一觸就唸到雕一隻漏緊水既船。噴出黎既水同大部份羅馬既噴泉水一樣都係飲得既，我係羅馬幾日都係飲噴泉水，完全無事，而且嗰度既水天然冰涼，又含豐富礦物質同埋免費，樓主如果自問唔係咁容易水土不服可以試下。另外，樓主如果想係羅馬唔駛煩交通既問題，最好就係去地鐵站買一張價值11歐羅既通用飛，佢令你可以係3日內搭任何地鐵同巴士都唔駛再比錢，非常方便。

講完羅馬，要講下佛羅倫斯。呢個城好多野睇，剩係市中心百花聖母大教堂(Santa Maria del Fiore ，即係成日見到嗰個大圓頂教堂)同隔離其他景點，好似喬托鐘塔、聖十字教堂都有排你睇。小弟本來唸住入去百花聖母睇下就算，點知排錯隊，比左6歐羅入場費，上左去教堂個頂度參觀。比完錢仲要撐四百幾級樓睇，先至上到去睇圓頂上既畫同要再上去既觀景台。不過好彩，個幅描述最後的審判既壁畫極為壯觀細緻，而觀景台亦可飽覽成個佛羅倫斯既風光，實在極正。

上完個頂，你可以去番教堂正門排隊入番教堂，今次唔駛錢。之後你可以行落去烏菲茲(Uffizi)博物館睇名畫。入去其實主要係睇波提且利(Botticelli)既名畫，包括“維納斯的誕生”及“春”，兩幅畫都係非常當眼既位置，而且你見過都會覺得兩幅畫無論取材、構圖同畫功都一流。

之後就要去藝術學院博物館(Galleria dell' Accademia)睇大衛像。雖然有個複製品係烏菲茲出面既廣場，但當然係睇真野好啲。呢個像就真係無得頂，因為佢真係好似一個人中左魔法變成雕像咁神似，如果唔係純白既外表，你真係會以為佢係真人。但純白既材質加埋完美既線條令佢有一種崇高既靈氣，絕對值得樓主花多啲時間好細緻咁欣賞佢。

羅馬同佛羅倫斯既博物館永遠都極多人，所以樓主要訂定飛先，以下係相關網址﹕

http://www.rome-museum.com/

另外仲有一啲補充內容，請樓主參考意見嗰part。

2008-08-25 23:38:13 補充：
佛羅倫斯仲有兩個地方值得去。第一個係老橋。呢條橋上面全部都係金舖，其實就唔係咁多野睇，不過係黃昏時係嗰度睇日落都幾靚。第二個係米開蘭基羅廣場。呢度係比你望佛羅倫斯既全境，天氣好既時候真係好靚，但原來廣場附近望到既山景都非常優美，呢樣野就反而無咩人講，樓主可以留意下。但係去嗰度唔易，因為佢唔係市中心，又要上個山仔，如果樓主好似小弟咁大熱天時行上去都幾辛苦，樓主可以唸下搭的士去。

2008-08-25 23:38:52 補充：
關於羅馬，仲有幾個景點可以留意下。係萬神殿無幾遠既那弗勒廣場就係著名既四河噴泉，佢係貝尼尼最出名既傑作之一。不過近來佢要大修圍晒板，遊客只可以從幾塊透明板睇到少少個噴泉，睇來無一年半載都唔會開番。去到嗰度樓主可以睇埋隔離嗰個摩爾人噴泉，當然無咁靚。如果樓主覺得無時間既話可以唔去。

2008-08-25 23:41:19 補充：
另外有兩間靚到爆燈既教堂完全被人忽視，樓主有時間一定要去，我都係無意中行下行下先至入去見識到佢地既精緻。第一間係天使聖瑪利亞教堂(Santa Maria degli Angeli e dei Martiri)，佢就係共和廣場(Piazza Della Repubblica)之上，外觀就好似係石山鑿出來，好簡陋，但入面就勁宏偉，實在點唸都唸唔到。入面地板上面有啲好似行星軌跡既鑲嵌雕塑。後來睇番資料話呢啲係教廷用黎check下個日曆準唔準。另外，共和廣場個噴泉上面既雕塑都好靚，可以影多幾張相。

2008-08-25 23:41:55 補充：
另一間係勝利聖母堂(Santa Maria della Vittoria)，呢間教堂無天使的聖瑪利亞教堂同聖彼得教堂咁宏偉，但入面佈滿雕工極佳既天使雕像及其他裝飾，小弟覺得佢絕對靚過聖彼得教堂及梵蒂岡博物館入面既所有雕塑。成間教堂大部份作品都出自貝尼尼，特別要留意係教堂左側近聖壇既聖德蕾莎的狂喜(Ecstasy of St. Teresa)，呢個雕像雖然無咁出名，但我覺得手工絕對比得上聖殤像，而呢度亦係《天使與魔鬼》既第三站，即係“火”嗰間教堂。

2008-08-25 23:48:02 補充：
講開《天使與魔鬼》(Angels and Demons)，如果樓主同小弟一樣係呢本書既fans，咁就可能有興趣去下嗰四個“科學祭壇”，頭先已經介紹左第三站既勝利聖母堂。第一站既基吉小聖堂係人民廣場(Piazza del Popolo)既人民聖瑪利亞教堂(Church of Santa Maria del Popolo)入面，不過呢間教堂好寸，永遠都唔開門，小弟摸左兩次門釘，樓主如果想去人民廣場行下，可以去睇下佢開唔開門。如果你由西班牙樓睇嗰邊行來，佢就係廣場上噴泉後面右手邊。

2008-08-25 23:59:28 補充：
另外頭先唔記得講，第四站“水”就係圍晒板既四河噴泉，而第二站“風”就係聖彼得廣場上，不過小弟搵極都唔到嗰個浮雕。另外仲有一間教堂值得去下，不過就同《天使與魔鬼》無關，佢係偉大聖瑪利亞教堂(Basilica di Santa Maria Maggiore )。呢間教堂係羅馬已經有1,600年歷史，係羅馬其中一間最重要既教堂，當然非常靚同宏偉。不過小弟又係去左兩次都入唔到去，但我懷疑我係去左佢後門所以先唔入得，因為我係想由Piazza dell'Esquilino 嗰邊入，樓主最好兜去另一邊既門口睇下入唔入得。

2008-08-26 00:04:07 補充：
講到食，兩地當然都係以意大利菜為主，不過都幾貴，求其叫嗰肉醬意粉都要8蚊歐羅，叫多支水飲埋單計數都要成十幾歐羅。所以最好就係自己帶水去飲，之前都講過，羅馬有好多噴泉，啲水係天然冰涼飲得既，你既斟呢啲免費水飲就得啦。另外，意大利快餐店唔多，而且全部都係麥當勞，一個普通餐大概要6蚊歐羅。不過我唔推介，因為雖然佢既餐有杯野飲，但食物太乾，只會令你更口渴，所以可免則免。

2008-08-26 00:08:36 補充：
住方面小弟係羅馬只住一間二星旅館。房間當然就唔靚，只得一張床一個廁所，不過都算幾企理，而且又幾近Termini車站，再加上早餐都幾好食，算啦。係佛羅倫斯雖然話就話間酒店係三星級既單人房，但空間比羅馬嗰間大一倍，廁所空間又係大一倍，亦靚一級，最緊要係佢係正火車站隔離同埋有個露台仔比你係夜晚吹下風，都幾正。咁既級數既酒店各自都只係七十幾蚊歐羅一晚，唔算真係好貴。

2008-08-26 20:20:46 補充：
佛羅倫斯就簡單啲，因為個城細，大部份景點，除米開蘭基羅廣場外，全部都可以靠行去。百花聖母教堂係市中心，向阿諾河方向行五至十分鐘可以去到烏菲茲同老橋。反阿諾河方向行廿分鐘可以去到藝術學院博物館。不過由於實際行程幾複雜，你要詳細研究佛羅倫斯地點至得。

2008-08-26 20:25:02 補充：
羅馬就麻煩好多，因為羅馬好大，景點好散，雖然可以靠行，但好似小弟咁行對樓主來講可能太辛苦。但係去梵蒂岡就易啲，因為搭地鐵去到Ottaviano站落行十分鐘就到。鬥獸場同遺跡仲正，係正Colosseo站隔離，一出就係。西班牙樓睇同樣係一出Spagna站就係。但其他景點都離地鐵好遠。

2008-08-26 20:28:11 補充：
行去雖然辛苦，但其實最直接。去萬神殿、四河噴泉一帶，你先要去到Via Del Corso然後左轉入橫街行多一陣先可以到。而許願池就係Via Del Corso右邊既橫街區。由於嗰區既街好複雜，如果樓主要行去，一定要有一張詳細既羅馬地圖跟住行先得，如果係機場或火車站攞唔到都要買左先。

2008-08-26 20:35:16 補充：
至於酒店，我始終覺得住樓主講嗰啲咁多人迫埋一間房既旅館實在唔好，尤其是係女仔，最好都係住有單人房既酒店好啲。咁當然會貴左，但無保安問題之餘，又多啲私人空間，你去完成日行程，一定攰到嘔，你唔會想同人爭洗手間沖涼掛﹖比多少少錢係值得既。仲有，9月既意大利可能都會極熱，要留意你間酒店有無冷氣，樓主係瑞士住都知歐洲啲民房唔係好似香港咁老馮有冷氣，如果你行完一日無冷氣，我唸你會想死。

2008-08-26 20:37:27 補充：
至於米開蘭基羅廣場，行去係得既，小弟都係行去。但由於好遠，而且上山條樓睇好長，大熱天時行去真係好辛苦，不過我又唔覺有咩公共交通上到去。如果樓主唔想行，睇黎要預多啲錢搭的士。

2008-08-26 20:41:46 補充：
仲有，樓主睇唔睇比薩斜塔﹖如果要睇，最好買定來回比薩同佛羅倫斯既來回火車飛先。去到比薩，一出火車站你沿中間條大路一直行，中間會有條河同埋上面有條橋。如果你見到你行既橋左右各有一條橋咁你就行啱路啦。之後再行多十幾分鐘會見到一道古城牆，記住唔好穿過度牆，係牆前條馬路轉左，行多一陣就會見到斜塔。

2008-08-26 20:44:31 補充：
去比薩張飛係幾時出發都得，不過我建議你早出發好啲，因為可以早上斜塔，避開遲來既人群，而且可以早返佛羅倫斯再參觀呢個城市。