其實個問題可以係, 佢覺得溫書好悶, 對工作無期望呢個係咪佢鍾意打機既理由呢?
鍾意打機有幾種可能:
1) 逃避現實, 在真實生活中找不到滿足感或成功感
2) 朋友影響, 身邊朋友鍾意玩online game, 佢慢慢受受朋友影響, 玩理一份
3) 缺乏自律, 可能佢原本只係覺得打機幾過癮, 但係小六咁細, 無可能有好好既自律性同自覺性, 屋企人又唔理佢, 終於俾佢玩玩下玩到上癮, 不能自拔
4) 關乏親人關心, 又或想同朋友有偈傾, 所以打機
要佢戒打機, 首先要明白打機既吸引力係邊. 遊戲開發商為左吸引更多人打機, 遊戲既都係非常針對人性而設計. 打機最大既好處就係好快有滿足感, 而且無論聲同畫都非常吸引, 再加上情節緊湊, 令人樂而忘返.
讀書, 一來要努力一年先知道成果, 相比起打機, 打一個鐘頭就破關, 係細路仔心目中梗係容易好多. 二來, 就算自己努力左, 人地更加叻既話, 讀左都唔一定有好成績, 而打機, 只要跟住公式去打同肯俾時間落去, 一定可以破關, 事後仲可以同朋友仔渲揚自己有幾叻. 而且一開始就大部份科目都不合格, 即係起步已經食塵, 咁仲邊有心機追. 再加上家長完全唔反對, 連唯一既阻力都無, 唔沉迷打機先至唔正常.
要解決呢個問題, 其實你一個人好難做到. 最好係佢既家長能夠明白佢地個仔已經發生左呢個咁嚴重既問題, 然後由佢地去好好監管住個小朋友, 咁成效先會好. 但監管唔係指鬧同打, 咁係無用既. 最重要係要令個小朋友明白呢個係一個非常之唔好既壞習慣, 等佢自己有心去改先有用.
基本上, 你話你係佢朋友, 我諗你都唔會大得去邊, 但你寫篇文又唔似係細路仔寫, 究竟你幾大同埋你同佢係咩關係呢? 如果佢平時根本就唔會聽你講野, 你想做乜都無用.
其實, 最直接既方法就係俾佢知道, 而家開始追好過幾年後先開始追. 因為, 遲早都要追, 越早追越無咁辛苦. 此其一. 第二, 就算唔講讀書, 可以講下嗜好. 佢有無邊樣能力算係比較好架? 用mouse叻可以俾d靚相佢睇, 刺激下佢學相片編輯. 反應快可以帶佢去打下波, (記得要帶佢去同d叻既人打), 刺激下佢去學打好d波. 等佢知道自己其實有d能力都可以發展到, 用來取代打機所帶來的滿足感. 而且, 可以俾佢識番班唔打機既朋友. 小朋友易受朋輩影響, 同少打機既人一齊, 慢慢心態就會少左打機了.
仲有, 唔鍾意讀書唔好迫佢讀. 有d人真係天生就讀書唔叻既. 因為讀書係一個將視覺轉換為記憶既過程. 但記憶力有三種, 除左視覺記憶, 仲有聽覺記憶同埋動作記憶. 有d人天生視覺記憶唔好, 但動作記憶好, 佢可能會比較適合做運動員! 呢d係天生既, 你要佢成日用佢既弱項, 佢梗係無心機. 除非佢可以搵到一個好既讀書方法, 否則就不如發展佢第二樣能力, 佢第時出來社會既競爭力可能會仲好.
希望幫到你!
