史上第一場戰爭是哪場？

呢個問題之前有人問過。講真，呢個係一個永遠無確實答案既問題，因為首先咩先叫做“戰爭”已經令人好頭痛。兩個人打交梗係唔可以話係打仗，但一個部落首領帶十個人去隔離部落殺幾個人算唔算打仗﹖仲有一個問題好難解決，就係人類歷史早期好多場戰爭雖然有記載，但呢啲所謂既“記載”神話成份多個史實成份，例如黃帝打蚩尤既戰爭，蚩尤就被記載話佢識法術，但除此之外整場戰爭既其他具體細節就欠奉。特洛伊戰爭亦被描述成為眾神之間既爭執，雖然應該係有呢場戰爭，但我地好難知道相關既資料邊啲係真，邊啲係假。

如果我地將討論範圍收窄，剔除上述永遠無辦法知清楚細節既部落戰爭同神話戰爭，咁就有較有意義既討論空間。小弟知道人類最早有正式記載既戰爭係發生於公元前1457年4月16日既麥吉多會戰(Battle of Megiddo)，交戰雙方係有“埃及拿破崙”之稱既圖特摩斯三世既埃及軍，對手係中亞既敵國，有資料話呢個敵人係西臺(Hittie，大陸譯做“赫梯”人，領土位於現代既土耳其，係遠古中亞一個強大既帝國)，但又有另外一啲資料話係其他中亞民族。無論點都好，圖特摩斯以大約10,000人既兵力贏左呢場大戰。打贏左呢個強大既敵人之後，埃及係中東地區就無左任何重要既競爭對手，所以埃及係圖特摩斯三世既時期版圖最大，最遠擴展至現代既敍利亞。

2008-08-23 20:13:51 補充：
關於樓上第一位仁兄嗰個網頁提到既幾場中國遠古早期既戰爭，忽然又挑起我對先秦歷史既癮，所以又睇左唔少資料，發覺上述中國遠古時代既戰爭有一啲野值得講下。

2008-08-23 20:19:42 補充：
中國先秦既歷史最得意既係接近2,000年既時間之內都無可靠既記錄可信。對於中國既“信史”，即係可信既歷史究竟始於何時，實在係一個令人頭痛既問題。小弟細個讀中史時，話中國既信史時代始終商代。但呢個講法太籠統，因為商朝延綿超過600年，咁究竟信史即係始於何時﹖

2008-08-23 20:25:14 補充：
剩係呢個問題都有排拗，小弟記得嗰陣時教係始終遷都到殷既第19代國王盤庚，即係大約公元前1,300年。但後來我睇資料又話應該始於第23代國王武丁(公元前1,250年)。但最激死人既係中國古代歷史正式紀錄最遠只可以追溯到武丁之後差唔多四百年既西周共和元年，三個時代前後相差成五百年。搞到亂係因為共和元年之前係無正式史料紀年，但由於近代有考古學家對甲骨文同金文既破譯，所以先至令信史可以推前到商中葉。

2008-08-23 20:31:01 補充：
但麻煩仲未完。話就話甲骨文同金文令“信史”推前都商中葉，但問題係甲骨文一般係卜辭，即係好似依家既解籤佬講古，而金文又通常只係刻係器皿上面歌功頌德既文字。兩者既共同點係佢地未必係根據事實將歷史事件嚴肅地記錄落來，入面傳說同神話成份都唔少，所以唔會係百份百可靠既歷史證據。我地只能夠話呢從甲骨文同金文我地肯定有商朝既存在，亦大概知道呢個600年老皇朝既一啲歷史大概，但我地唔能夠確鑿無疑肯定入面任何一樣野。

2008-08-23 20:39:18 補充：
最弊既係小弟睇左好多其他資料，發現原來有一本奇書叫《竹書紀年》，講勁多夏商周歷史。呢本野巴閉在佢連三皇五帝及夏商兩朝既各個皇帝都講得出幾件大事！之前小弟搵極資料都搵唔到任何係禹、啟、桀、湯、太甲、盤庚、武丁同紂以外任何夏商君主既事蹟。呢本書既發現亦好出奇。原來有條友係西晉時盜戰國魏王墓時發現左一批無標題既竹簡。呢批竹簡講勁多先秦歷史，包括上述夏商各朝皇帝既事蹟。由於佢無書名，當時既學者見佢地係一批竹做既書，又紀錄在咁多年既歷史，所以就叫《竹書紀年》。

2008-08-23 20:47:59 補充：
《竹書紀年》同信史有咩關係﹖小弟覺得《竹書紀年》入面既內容同甲骨文及金文有一個共同點，就係三種資料都無法証實係唔係正式既歷史記載，大家講既野神話、傳說同歌功頌德既成份可能有好多。於是有一個問題就好順理成章，如果甲骨文及金文可以被認為係信史既有力證據，咁同樣講野籠統既《竹書紀年》得唔得﹖畢竟呢本書勁到夏商兩朝各皇帝既事蹟都講得出一、二！但話佢可以証明夏朝歷史又唔係好通，因為畢竟佢真係太籠統，唔似甲骨文及金文有大量獨立既考古證據互相較正，簡單啲講即係剩係呢本野信唔過。

2008-08-23 21:40:05 補充：
但故事仲未完。《竹書紀年》記載既野同《史記》既內容大有出入，多位被《史記》歌頌既聖人都被《竹書紀年》話佢地謀朝篡位。呢樣野影響到《竹書紀年》既可信性，不過原來大概十幾年前大陸有一個幾重要既歷史project，叫“夏商周斷代工程”，呢個project將導致夏朝滅亡既鳴條之戰大概肯定於公元前1,600年。呢樣野同《竹書紀年》有咩關係﹖由於《竹書紀年》肯定有提到鳴條之戰，而“夏商周斷代工程”則係一個可信既科學研究，所以如果肯定左鳴條之戰既存在及年份，咁《竹書紀年》入面既可信性就增加唔少。

2008-08-23 21:55:27 補充：
吹左咁耐水終於都戲肉啦。如果以上講既野係真，咁就犀利啦。因為“夏商周斷代工程”係一個既有文獻又有考古證據支持既大project，再加埋《竹書紀年》，咁至少令夏朝滅亡既鳴條之戰就比麥吉多之役早百幾年，成為世界上最早被正式記載既戰爭。但問題仍然都係嗰個，究竟鳴條之戰係唔係被“正式記載”﹖又番到以嗰個老大難既問題，就係《竹書紀年》同“夏商周斷代工程”信唔信得過﹖

2008-08-23 22:00:10 補充：
據小弟所知，“夏商周斷代工程”被好多外國研究中國史既學者話唔科學，不過老外研究中國點可能及得上我地自己人咁有水準﹖但無論點都好，“夏商周斷代工程”同《竹書紀年》都未完全被全球學界接受，起碼我讀左咁耐歷史就未聽過呢兩個資料來源。另外，話就話麥吉多會戰有較多記載，但其實記載佢既史書信唔信得過都無人知，我都係睇《西洋世界軍事史》而得知(雖然呢本書已經極權威)。

2008-08-23 22:03:34 補充：
我最後既結論係，鳴條之戰雖然好有機會成為人類最早被正式記載既戰爭，但麥吉多會戰呢個講法比較“正統”，亦比較“保險”，所以我先至提出呢個睇法。不過未來會唔會係考古上有突破而改變呢個問題既答案就無人知。

2008-08-27 17:48:24 補充：
想問樓下joe兄，你話秦國既先秦史版本有流傳落黎，到依家係唔係仲傳世﹖有無啲可以睇下﹖

2008-09-03 15:56:55 補充：
回深淵兄，呢個的確係好問題。小弟都相信兩河流域既文明既戰爭一定早過麥吉多戰役，但因為無相關記載，所以我地肯定唔到。正如鳴條之戰，同樣因為無確鑿既證據，無法知道佢係唔係最早既戰爭。總之都係嗰句，現在確鑿無疑最早既戰爭係麥吉多戰役，但其實係佢之前既千百年都肯定有唔少戰爭，只係我地確定唔到姐。

1. 002人兄的回答相當好, 我只係有少少野想補充

2. 戰爭的出現先於文字, 後人憶述祖先的威水史, 以口耳方式世代相傳, 慢慢轉化為神話

3. 戰爭的動員需要組織, 與文明的程度成正比, 最原始的散居部落最多係劈友啫, 但數以百計的的動員組織力, 背後是人數眾多的部落, 大部落的出現, 是文明的其中一個小進展, 地球上哪一處最早有文明, 以我們現時所知, 是兩河流域, 依此推論, 最早的戰爭應該出現在兩河流域

2008-08-27 14:26:33 補充：
4. 本來係路過吹兩咀, 見樓上人兄談及信史的問題, 又令我牙癢
中國確認的信史, 是共和紀年, 此後中國的歷史記載沒有中斷, 信史與史前, 中間有一段半信史時期, 所謂半信史, 即並非第一手資料, 是零星片段加記憶及傳聞, 但年代不至於太久遠, 有一定的真實程度及可性度高

2008-08-27 14:26:48 補充：
5. 周人打敗殷人後入主中原, 周公的年代忙於打仗, 何來有時間整理歷史記載, 繼後的成王及康王, 大概相當於清初順治及康熙頭二十年的處境, 忙於鎮壓及安撫殷人, 成康之治後, 局面安定, 開始要粉飾太平及歌頌祖先開業的功勞, 於是修史, 主要記述的年代是商周交替的時期, 有於年代不至太久遠, 社會存有大量實物記錄及記憶, 有一定的可信性, 但記述不完整, 當然對殷人會有偏見了

2008-08-27 14:28:08 補充：
6. 傳統上我們對先秦史的認識依賴史記, 本來戰國各國對先秦的歷史各自有記載, 秦始皇為了糾正天下史觀, 把各國的史籍焚毀, 只留下一本在咸陽, 後來項羽攻破咸陽後焚宮殿, 把唯一的版本也燒掉, 大量先秦史料失傳, 流傳後世的史書有兩國的版本

2008-08-27 14:28:32 補充：
7. 第一個是秦國的版本, 因為沒有被燒掉, 而且被推廣, 但基於秦國史書的質數不佳, 早期秦國不甚參與中原各國的事務, 記載得不夠及不好, 加上後世文人對秦朝厭惡, 影響力不大, 第二個是魯國史, 即孔子參與的春秋, 春秋原本是魯國人對史書的稱呼, 並非專有名詞, 但後來孔子被神化, 春秋就成了專有名詞, 由於魯國史寫得好, 民間普及, 焚書後還有少量存世, 此後魯國史的史觀, 成了後世對先秦史的主流史觀

2008-08-27 14:29:00 補充：
8. 司馬遷寫史記時, 面對著焚書的後遺症, 史料不全, 只有片段記載, 但他實在偉大, 把整個中國的上古史貫通, 前無古人, 但亦難免出錯, "周召共和"的記載就錯得離譜, 司馬遷當時手頭上有"共和執政"的片段, 太史公的理解是周召共和, 透過竹書紀書, 我們今天知道應該是共伯和執政, 共伯, 名和, 真是一個美麗的誤會, 史記的觀點太受春秋的影響, 而春秋是完全反映儒家的觀點, 禪讓是儒家美化加工的結果, 但由於成為獨家史料, 被後世採用, 成為主流觀點

2008-08-27 14:29:14 補充：
9. 竹書紀書是戰國時魏國安釐王的陵墓出品, 安釐王的弟弟就是著名的信陵君, 其記載避免了焚書及儒家的影響, 較接近原本的史實

2008-08-27 17:37:06 補充：
更正　：　應該是　”竹書紀年”

戰爭

古代
(歐洲：上古至西羅馬帝國滅亡|中國：上古至隋朝建立|其他地方：上古至公元500年)：

西方：美塞尼亞戰爭|波希戰爭|伯羅奔尼撒戰爭|拉米亞戰爭|大象戰爭|布匿戰爭|斯巴達克起義|高盧戰爭|羅馬內戰|猶太戰爭
近東：古代埃及與赫梯戰爭|亞述戰爭|亞歷山大東征|繼業者之戰|敘利亞戰爭|羅馬波斯戰爭
中國：阪泉之戰|涿鹿之戰|鳴條之戰|牧野之戰|長勺之戰|桂陵之戰|馬陵之戰|秦滅六國之戰|秦末民變|漢匈之戰|官渡之戰|赤壁之戰|淝水之戰
HY