✔ 最佳答案
樓主個行程同小弟係既歐洲之旅差唔多，不過我去埋佛羅倫斯、威尼斯同瑞士，而且我係分兩次去。
只係兩個城市就十一日有啲長，因為其實巴黎先可以玩耐啲，羅馬四日三夜已經係最多，而巴黎玩到五日四夜就已經好夠，所以其實如果樓主嗰十一日唔包去程同回程各用左一日，咁其實有大概兩日剩番，不過如果包埋，咁就啱啱好。
巴黎同羅馬之間太遠，只能搭飛機，而且唔好番巴黎走，因為要搭多程內陸機，係羅馬走就得啦，或掉番轉都一樣。以下我會介紹一啲兩個城市都要必到既景點。
去巴黎，凡爾賽宮及羅浮宮是必去的。但留意，這兩個景點各自規模都很大很優美，所以各自都需要一天大部份時間去參觀。
凡爾賽宮真的很優美，值得花多些時間參觀，但它後面的御花園風景也極之怡人，絕對應該一遊。尤其是在好天氣的情況下，那裡更像一幅活生生的圖畫，令人流連忘返。
至於羅浮宮同樣也很值得細心欣賞，入去後你最去立刻去參觀蒙羅麗莎的肖像，因為那永遠都有很多遊人，不過你去到可能會有點失望，因為其實它不過是一幅很普通的肖像，絕不如傳聞中那麼特別。有時間最好去多看那些大理石雕像，因為它們被雕得太好了！除了用“栩栩如生”來形容，實在沒有其他形容詞可以配得上它們令人驚嘆的美。這些雕像完全符合人體的一切比例，就好像它們本來就是一個活生生的人，只是被魔法凝結成一尊純白的大理石像似的。它們完美的外表和大理石無瑕的純白色，使它們有種如天使般高貴的氣質。當你看過它們，你絕對會覺得不枉此行。
其他值得一遊的景點有聖母院(行程必去景點，通常有導遊帶領)、協和廣場方尖碑、國家歌劇院、龐比度藝術中心、由砲兵學院改建的軍事博物館、拿破崙墓、奧塞美術館、蒙馬特區和位於該區的聖三一教堂、紅磨坊夜總會和迪士尼樂園(這兩處入場都需要高消費，閣下應考慮自己財力)。小弟在巴黎逗留了4日3夜，但只去了一半的景點左右(上面提到的一系列景點，小弟只到過聖母院及協和廣場)。
至於羅馬，可以去既景點好多，但首先一定要去梵蒂岡。聖城大致可以分為兩部份，即聖彼得大教堂加聖彼得廣場及梵蒂岡博物館。教堂同廣場都唔駛收入場費，入去最主要係見識兩地既宏偉同精雕細琢。最需要詳細留意既有位於教堂正中央既聖體傘，大師貝尼尼都要用8年先可以雕出來，你見過實物就知點解要用咁耐。而係教堂入口右側處既聖殤像亦係重點。當年米開蘭基羅係24歲之齡就雕出如此鬼斧神工之作時根本就無人相信係佢既作品，令佢一怒之下係作品上簽名，亦係佢唯一既簽名作品，其實你睇完你都未必信係佢雕，因為好難相信一個年輕人有咁既天材。
梵蒂岡博物館有好多野睇，不過要留意既得幾個地方。第一重要既就緊係西斯庭教堂天花既壁畫，啲畫無論色彩、構圖同立體感都一流，令你好似活生生經歷左一次創世紀之旅。米開蘭基羅勁到你有時唔知牆上面既究竟係雕像定係畫，我有唔少部份都要睇左勁耐先至說服到自己嗰啲係畫而唔係雕像。西斯庭教堂係成個博物館既最後部份，之前會經過拉斐爾廳，主要係睇“雅典學院”。呢幅畫雖然無西斯庭教堂天花既壁畫咁令人驚奇，但係都好精美，一般書都話佢既透視感非常好，我發現呢個係事實，如果唔係幅畫係高牆上，你真係會覺得自己係望入去一條大走廊。
去完聖城，應該去鬥獸場。呢個建築物雖然好宏偉，但其實唔算太精彩，畢竟有成二千年歷史，殘啲都好正常。鬥獸場既飛係連埋可以入羅馬廢墟既，坦白講，嗰度都唔係幾好睇，除左一啲希臘式石柱較為可觀之外，都無咩好睇，樓主唔駛嘥太多時間。
之後一定要去萬神殿。萬神殿最巴閉係佢既跨拱係19世紀中期之前係全世界最闊，就算依家入去你都會覺得極為壯觀，你會驚訝點解二千年前既人會造到啲咁既野。
之後順路一定要去許願池。呢個景點極靚，所以幾時都咁多人。去到梗係要許番個願，傳聞話要背池，然後將銀仔用手拋過另一邊膊頭先至靈。不過無論點都好，呢到真係靚到絕，樓主可以係度抖下。
然後有氣力既可以去埋西班牙樓睇。條樓睇好靚好宏偉，通向山上一間教堂，不過反而間教堂唔係幾靚。樓睇前既沉船噴泉係貝尼尼爸爸既作品，佢見嗰度水壓低，水噴得唔高，所以靈機一觸就唸到雕一隻漏緊水既船。噴出黎既水同大部份羅馬既噴泉水一樣都係飲得既，我係羅馬幾日都係飲噴泉水，完全無事，而且嗰度既水天然冰涼，又含豐富礦物質同埋免費，樓主如果自問唔係咁容易水土不服可以試下。另外，樓主如果想係羅馬唔駛煩交通既問題，最好就係去地鐵站買一張價值11歐羅既通用飛，佢令你可以係3日內搭任何地鐵同巴士都唔駛再比錢，非常方便。
仲有最後一樣野想提樓主。去羅馬機場通常都要去市中心既Termini站搭Leonardo Express，車費同樣係11歐羅。但呢架車即使係大熱天時都一樣無冷氣，而且車窗完全唔開得，車入面既溫度隨時超過40度，樓主係上車前一定要準備風扇仔同埋一支消暑飲品。
羅馬各博物館訂票網﹕
http://www.rome-museum.com/
2008-08-20 13:51:44 補充：
仲有少少關於巴黎既景點想講下。去完凡爾賽同羅浮，我會推介你去凱旋門和鐵塔。兩個景點都有觀景台，都要付費入場，尤其是鐵塔有上下兩層觀景台，而上層的貴些。我會推薦閣下購票上凱旋門和鐵塔的頂層觀景台參觀，因為由那兩處遠眺巴黎的景觀很不錯。在巴黎邊緣的拉德芳斯區有一個景點叫新凱旋門，它雖然很宏偉，但無甚特式，小弟認為不必刻意前往參觀。
2008-08-20 13:52:13 補充：
另外小弟發現巴黎有幾個景點常被旅遊書忽視，它們是瑪德蓮教堂、先賢祠和科學館。瑪德蓮教堂和先賢祠都是非常宏偉的古希臘-羅馬式建築。而先賢祠是著名的“傳科擺”(一件科學儀器，好像是用來証明地球是圓形的)所在地，所以雖然它要入場費，但仍是極之值得參觀之地。但更重要的是，先賢祠埋葬了很多極為有名的法國歷史名人，包括盧梭、伏爾泰、大仲馬及拿破崙手下猛將藍納元帥等，僅是去憑弔這些偉大的人物及參選那裡宏偉的建築已是不枉此行。而瑪德蓮教堂本身不需要入場費，你可以免費參觀這宏偉建築，實在非去不可。
2008-08-20 13:52:29 補充：
科學館位於巴黎市區邊緣，它的規模比香港的大得多，雖然它就在小弟下榻的酒店附近，但小弟卻無時間入內參觀。不過我參觀了放在該館外面的“阿高諾”號潛艇。該艇在法國海軍服役多年，退役後被安置於此供遊人參觀，參觀它是很有趣的經歷，值得一去。而據小弟所知，科學館本身也很精彩，值得花至少半天時間入內參觀。
2008-08-20 13:57:54 補充：
關於羅馬，有幾個景點可以留意下。係萬神殿無幾遠既那弗勒廣場就係著名既四河噴泉，佢係貝尼尼最出名既傑作之一。不過近來佢要大修圍晒板，遊客只可以從幾塊透明板睇到少少個噴泉，睇來無一年半載都唔會開番。去到嗰度樓主可以睇埋隔離嗰個摩爾人噴泉，當然無咁靚。如果樓主覺得無時間既話可以唔去。
2008-08-20 14:12:30 補充：
另外有兩間靚到爆燈既教堂完全被人忽視，樓主有時間一定要去，我都係無意中行下行下先至入去見識到佢地既精緻。第一間係天使的聖瑪利亞教堂(Basilica di Santa Maria degli Angeli)，佢就係共和廣場(Piazza Della Repubblica)之上，外觀就好似係石山鑿出來，好簡陋，但入面就勁宏偉，實在點唸都唸唔到。
2008-08-20 14:26:07 補充：
另一間係勝利聖母堂(Santa Maria della Vittoria)，呢間教堂無天使的聖瑪利亞教堂同聖彼得教堂咁宏偉，但入面佈滿雕工極佳既天使雕像及其他裝飾，小弟覺得佢絕對靚過聖彼得教堂及梵蒂岡博物館入面既所有雕塑。成間教堂大部份作品都出自貝尼尼，特別要留意係教堂左側近聖壇既聖德蕾莎的狂喜(Ecstasy of St. Teresa)，呢個雕像雖然無咁出名，但我覺得手工絕對比得上聖殤像，而呢度亦係《天使與魔鬼》既第三站，即係“火”嗰間教堂。
2008-08-20 23:48:07 補充：
一段更正，羅馬既天使的聖瑪利亞教堂正式名稱應該係“Santa Maria degli Angeli e dei Martiri”，“Basilica di Santa Maria degli Angeli”係位於意大利另一個城市既另一間教堂。
