✔ 最佳答案
１．唔知點解死咗很多
唔知點解的話，你就要俾多ｄ資料，等我地可以睇下有乜野可能。就咁初步睇，冇必完全因為爛尾。慢慢睇。
２．大部分都有d爛尾
rainbow o既講法我認同。被咬o既爛法係冇左一忽，而爛尾就會好齊整咁爛，好似成條魚尾最後o既邊緣位加上一條白邊一樣。呢條白邊就係本來透明o既魚尾皮膚受感染變白而o黎o既。
但爛尾要爛到好嚴重先會死魚（可以爛到成條尾都消失，爛到入肉）。而買魚如果唔小心（尤其係袋裝魚），好易買到爛尾魚。所以就到第三部份：
３．大部份是紅蓮燈和紅劍
一見新手養紅蓮燈，我就一定要問：「幾多條先？」
因為呢ｄ魚「又平又靚」，平到有人用佢o黎餵龍吐珠。新手見到一大群心動，睇埋價錢更心動，但都往往忽略一點：你個缸有幾大？有幾多魚？
一個缸可以養幾多魚，有個參考數字：一升水養一厘米長o既魚，即係一個廿五公升（長 x 闊 x 高〔cm〕 ／１０００＝升）o既缸，可以大約五條５cm 長o既紅劍（咁只係正常偏細 size）。多過呢個數，即係超養。有乜問題？引用幾日前一個解答
http://hk.knowledge.yahoo.com/question/question?qid=7008081503509：
超養o既問題係，魚屎尿中有高毒性物質阿摩尼亞，累積至高濃毒會毒死魚。過濾系統中o既濾材，可以俾一種以阿摩尼亞等氮化物為食物o既細菌－－硝化菌，菌愈多，處理量就愈多，但係初初開缸，菌o既數量會好少。
因此，初開缸我地會慢慢加魚，頭幾日甚至係冇魚，到缸水o既白濁情況（點解會白濁？點處理？請參考呢度：
http://hk.knowledge.yahoo.com/question/question?qid=7007101800499）改善，我地先加一兩條，做開缸死士，用佢地o既屎尿做硝化菌食物。呢段期間水質唔穩定，放得多魚只會死多ｄ。俾時間硝化菌繁殖增加，先可以慢慢加多ｄ魚。
細缸水少或魚多，污染物／有毒物質濃度就升得快；而套缸過濾因為納量細，放唔到好多濾材（主要係生物環），所以通常唔係好夠效率；而初開缸的話就一切由零開始，更弊！
因此，我估你有超養。黑心ｄ講，死得咁上下，污染量回落，加上硝化菌繁殖到咁上下數量，就會達到平衡，到時就唔會死魚；唔等／唔想死魚，就要換大缸／加缸架啦。留意，樓上講「超養要加氣泵」，呢個只係避免到ｄ魚唔夠氧，無助解決毒素積聚問題。呢點我已經o係好多答案反駁左好多次。
４．落了除真菌劑也冇用
見到 rainbow 答「如果係爛尾就咁用藥好得好慢，最快係用藥之餘，將魚撈出放o係濕棉花上包住，再剪走爛o既部份」，非常安慰。我諗呢個咁古怪o既方法，o係呢度都係我自己第一個講架啦（唔係自大，我都係o係其他地方學o既）。由以前冇人信到依家有（希望佢都係自己試過），真係感動
圖片參考：
http://tw.yimg.com/i/tw/ugc/rte/smiley_9.gif
我個水草缸唔會用藥，成缸咁用藥亦盡量避免，因為怕會對硝化細菌系統造成衝擊。用藥我地非不得已，都只會撈出o黎，開一個只有「水妖」o既缸仔用，呢個叫做醫生缸。
我o既建議係，換一半水，畢竟爛尾都同水質不潔有關。將有爛尾（請根據我上面o既描述判斷係唔係）o既魚逐條撈出，如上方法做小手術（撈魚出o黎，用濕透棉花包住，秘訣係放條尾入一個有水o既淺碟，等條尾攤開，然後就剪左變灰色o既部份。魚鰭呢ｄ組織生得好快，無幾耐就生返齊）。另外我會加少少粗鹽（每升水加三克）。
長遠方面，買魚要小心揀，過濾系統o既效能亦可能要增強（水泵流量最起碼係魚缸水量五、六倍，另外加多ｄ生物環，換水一星期一次）。
５．玻璃和水管都開始有青苔
青苔唔一定係要陽光照到。
個個缸冇陽光照到，但都可以有青苔。點解？因為支管太光。青苔無疑都會因為水中養份太多而出現，但最主要誘發o既原因係光。如果你個缸草少，冇草同佢出搶肥，呢個情況就更易出現。
如果你個缸係種陽草，就算係密植，水同燈o既比例都只係一升水一火（watt）燈，少草／種陰草就要遞減。水管內可以有青苔（如果都有光直接照到的話），但生啡藻機會比較多，可以唔理（一般唔會成缸都係），唔鍾意的話，可以買個水管刷通下佢。
如果你係種草的話，「關燈」唔係好選擇。因為完全唔開燈，ｄ草會「追光」（因為唔夠光而拉長咁生），好醜樣。只要你將火數調低，換水時用膠尺刮下吸走，就會唔見哂ｄ青苔。另外可以買角螺刨下青苔。一般螺雌雄同體，會大量繁殖，多到你唔要。兩種都唔係咁好。角螺o既卵要鹹水孵化，係淡水缸最佳選擇，但佢地ｄ卵白色一粒粒，就要你去清理或者唔理佢囉。
樓上話「我夜晚會長開3-4個鐘，都無生青苔」。我諗佢唔係種草架啦。種親草，一日開燈八至十個鐘，三至四個鐘已減光減得好緊要，梗係冇啦青苔！
2008-08-19 17:11:52 補充：
補充：
１．雖然水質非常乾淨，水流也不錯，但是有魚開始有白點病，唔知咩事?
白點主要係為水溫驟升驟降而出現。其實只要好似我上面o個個濃度加鹽，再升溫至２８－２９度就得。白點用一種纖毛蟲引起，o係魚皮膚下繁殖得多，就谷起成為白點，再爆開，ｄ蟲仔就再搵魚寄生，唔係就沉底等機會。升溫令蟲仔也ｄ孵出，鹽水令佢地快ｄ脫水死亡。keep 三日換一次水，主要吸底（減少ｄ蟲），加水後加返ｄ鹽，保持濃度，一星期左右應該見效。
2008-08-19 17:15:28 補充：
２．第二，因為沒有陽光，所以用光管，玻璃上有d綠色薄薄的物體和黑綠色的點點，請問有咩事?
唔．．．
青苔係綠色點點，如答案講減光就得；如果係呈藍綠色，好似一層膜咁包住泥面，就係藍綠藻，比較煩，要將所有沾有呢ｄ藻o既泥掉哂，加強換水。
