威爾斯親王醫院生bb一問???(在依間醫院生過bb請進^^)

雖然我唔知你因咩事對威院失去信心啦~
我舊年 9 月係威院生左個仔~
希望我 GE 經驗可以幫到你啦~
我舊年 9 月19 日下晝開始覺得肚痛~
就同老公自己搭車去醫院~
由於我已經過左預產期~
所以就自己上去 7E 婦產科~
去到姑娘就叫老公係門口等~
我就入去檢查係咪生得~
醫生幫我檢查完 check 到我已經開左 1 度~
咁姑娘就拎左 d 衫褲比我叫我換~
同埋叫我老公幫我辦入院手續~
由於果度係女病房, 所以老公冇得入去陪我, 只可以係出面等~
去到晚上我開始陣痛 ge 時候 d 姑娘都好好~
到左 20 號早上食完早餐之後, 我去完洗手間發現見紅~
於是就同姑娘講, 佢地幫我檢查發現已經可以落產房~
就叫 d 嬸嬸幫我執野送我落去~
落到去我話我未通知我老公 d 姑娘就借左個電話比我打比老公叫老公黎~
如果你想老公陪產 ge 話記得入產房之前同姑娘講~
咁你要記得提你老公帶口罩同埋帶定 d 保暖 ge 衣物~
因為入產房係一定要戴口罩, 同埋因為要等到你真係生得~
你老公先可以入黎陪你~
而果度 d 冷氣好凍 ga, 所以記得帶多件衫唔好冷親丫~^^
仲有就係只有係順產先可以陪產~
剖腹產同埋要用產鋏幫助生產都唔可以陪產的~
祝你順利生個肥肥白白 ge bb 啦~

2008-08-16 01:05:32 補充：
依家威院有冇改左唔比陪產我就唔係咁清楚啦~
關於陪產 ge 詳情你返去問下醫院 d 姑娘啦~

我係06年4月係QE生架，我既產B過程就非常愉快，所有姑娘嬸嬸都超好人
我半夜穿水兼見紅，零晨六點媽咪同老公陪我入院，入到去我就去病房檢查，老公同媽咪就要走喇，不過我當時一D都唔痛，結果檢查完就訓到第二朝九點。到醫生黎檢查，檢查完就話可以吊催生針同預備入產房。換完衫，拮好針就推我落去等，落到去都仲係十二點到。好在係屋企媽咪買左盒飯比我食，因為由果時開始到落產房都冇得食野呀。
入到產房好悶咁又再訓(提埋你記住入到去產房問定姑娘拎多張被，因為未痛之前同生完之後都會覺得凍架)，(仲有個產房都幾靚，成間房都好柔和，比人個感覺好舒服)其間都有姑娘入黎同我檢查。到我開始覺得小小痛就醒左，果時大約兩點，D姑娘入黎同我檢查都會同我傾下計。
之後慢慢越黎越密同痛，咁岩有個姑娘入黎，問我開始痛未(因為之前佢地入黎問我痛未，我話我都仲受到，佢地話我好忍得痛)，仲同我講笑。跟住我同佢講話同佢傾左幾句好似冇咁痛，佢話咁係因為分散左注意力。之後仲問我想唔想打比屋企人傾下電話，我當然話好啦，跟住個姑娘就比左個產房入面個電話我，我就係咁打比媽咪同老公，一路講電話一路陣痛。確實有個人係我耳邊不斷同我講野同教我帶住我深呼吸真係好好多。
跟住一直到我非常急大便既感覺，我就禁鐘叫姑娘，姑娘就話可以試下生喇。姑娘拎開個電話，預備D用品，有三個姑娘係我間房到幫我手同教我用力，仲幫我打氣。久唔久又會有一兩個走入黎"抖氣"，因為佢地話隔離果D嗌到鬼殺咁嘈，我就一次都冇嗌過，係果邊過黎就好似入左天堂咁，D姑娘都好鐘意入黎幫我加油，果時D姑娘都一直同我講笑。到差唔多BB出世，就有好多姑娘入黎幫手喇。生左出黎就會拎起比我睇下，我好記得當時佢問我"咩黎架" 我咪答佢"係BB"，全場既姑娘都狂笑，跟住我先知道佢想問我仔定女....包好左BB之後就會拎過黎比我抱著，果一刻真係唔知點解想喊出黎...
到聯針果時，因為媽咪同我講左聯針都會痛，要問姑娘可唔可以打止痛針。咁有個姑娘入黎預備果時，我就問佢係咪好痛架，跟住佢已經即刻同我講話"唔使驚，我幫你打止痛針"。跟住一路聯針個姑娘一路同我傾計，仲話我個名同佢朋友個名係一樣添呀，係出面聽到話幫XXX聯針都嚇左一跳，跟住仲話幫我聯靚D。不過我覺得聯完之後佢可能出左D問題，就叫我等一陣，搵左個大粒D既姑娘入黎，三個人睇左一陣，我問佢地係咪有問題，最大粒果個笑住話"冇問題，信我啦" 咁我當時唔信佢都唔得啦，我又睇唔到
聯晒針之後有幾個嬸嬸走入黎傾計，仲教我做D伸展運動，話對咩好對咩好咁，一路傾一路上番產房
上番去產房岩岩好係探病時間，姑娘係我生果時都提我趕得切生完可以見到屋企人，真係太好喇，屋企人黎睇到BB。因為我老公要番工，黎唔到陪我生。不過我記得要之前登記同上堂先可以陪產架，但係兩年後既今日就唔知有冇改到喇。
生完之後既半夜我堅持要餵人奶唔補奶粉，所以基本上我係冇訓過覺！！D姑娘都非常好人，久唔久都會睇下我點，問下我仲堅唔堅持。到左第三晚 (因為我生果時發燒，BB要打幾日針所以留多幾日) 姑娘見我咁攰都勸我唔好堅持，最後我都屈服，訓左個好覺。
係醫院其間會有D堂比你上，基本上未生之前都學過，不過到時生左有個真BB係到真係唔同D，如果係第一次生真係建議去上下堂，學下點湊BB同點餵奶，到時可以拎埋自己既BB一齊上堂。
整體黎講我真係覺得D姑娘好好人，所以咁講啦，如果你對佢成日笑，有禮貌，最重要係唔好係唔係都嗌佢，未生得又嗌佢，又嗌到鬼殺咁嘈，佢地都會對你好好
凡事都要向好果方面諗，樂觀D，仲有祝你生個肥肥白白既BB~

我岩岩7月係威爾斯生左bb,不過係夜晚,0的姑娘真係串到冇人有, 不過佢地通常對0的大陸人會比較衰,其實都係人手既問題,流程同上面個0的差不多, 不過如果你要老公陪產就一定要上堂, 我去到產房姑娘係會應承比老公陪,但到時佢唔會叫, 因為佢話我冇上堂.

我兩胎威記生,我覺得ok呀,係大陸人多囉...
我第1胎06年尾,穿水,登記左之後直接上7e,再入房檢查,証實穿左水,開左1度,上床縛條帶個肚度聽bb心跳,之後小痛,中痛,再痛到行唔到床到典至開到2度.之後落得6樓產房,落到去姑娘問你想用咩止痛方法,咁佢會比笑氣你,教你點吸,你亦可打止痛針或無痛分勉.我就3樣做齊哂,但無痛就等左幾個鐘先有得做(5度)...做完無痛舒服哂,仲訓左一陣覺,訓醒話我已經8度,隔左一兩個鍾又係話我仲係8度唔開,之後再幫我吊催生藥,但係唔開,最後開刀,之後去觀察左1個鐘再送上9樓私家病房.因為大房full左....總括覺得產房有個姑娘好串,其他好好.產後房仲好,姑娘好好,好肯去幫你教你,好溫柔,但依個係06年尾事喇.
08年8月6日第2胎.預約開刀,要早1日入院準備,都係見e生,麻醉科e生講解手術風險,第2朝推落產房問姑娘有冇得陪產,佢話冇...之後開刀,佢會比杯好苦藥水你飲,幫你隻手插豆,再叫你側訓彎腰抱腳佢就拮支針落你尾龍骨.之後你下半身好快就冇知覺,跟住會不斷聽到有吱吱聲,然後感覺到有人係咁推你個肚,好快就會聽到呀b喊聲,然後姑娘抱黎問你男定女,成個過程1小時左右,之後就好似上面咁...分別在今次去8樓大房,好多大陸人呀,今次總括黎講人不過不失啦,你有禮貌對人,人自不然會對你好架喇...