那裡有報讀PHD的入門網站?

報PhD唔係一件咁簡單o既事

首先你想有人收你, 你最好o係申請資料度寫清楚你對邊個教授o既研究工作有興趣

每一間大學入面, 同一個學系都有大把有唔同專長o既教授, 你唔只要每間大學搵, 仲要每個教授o既網頁都要去! 申請資料言之無物, 或連想研究o既方向都冇寫清楚, 表現唔到你對研究有咩熱誠或者你對呢個科目o既非一般認知 (First Hon唔係大晒, 做研究唔同讀書), 話咁快踢你出局, 冇人會收你

收生標準亦只係講緊出低要求, 通常你都要勁過呢個要求好多好多...

調返轉頭講, 就算你係明日之星, GRE滿分, 數學天才, ... 下刪一萬字 (但都大有人在, 你係同全球o既人爭)... 良禽擇木而棲, 你都要睇清楚邊間學校有教授o既研究方向同你o既一樣, 你想鑽研o既領域唔一定每間大學都有教授有興趣研究, 如果唔係去到都係英雄無用武之地

而且一間大學甚至一個學系o既排名, 同你未來老闆勁唔勁, 係就係通常唔差得幾遠, 但其實都冇乜直接關係! 周圍都係勁老闆, 唔一定會去晒最高排名o個幾間

你想第時做research, application之前就要做呢一類o既"research"先

PhD通常都唔會學年中收生
美國大學最早12月頭, 最遲1月deadline
英國o既話, 留意外地學生學費勁貴, 你要o係"統一deadline"之前申請奬學金, 當然你自己俾錢讀o既話, 可以唔駛理呢個deadline
澳洲學年唔係9月開始, 所以通常年中deadline

好似冇答過你問題, 但都希望你覺得我講o既o野有小小用啦