黠樣令佢地生bb?

A.絕對唔建議繁殖鼠鼠,睇返你另一發問,你剛買3隻唔同既鼠,加埋呢兩隻,最少已有5隻鼠了,如果再生,而鼠鼠必須分籠,唔係就好易會亂倫同打交,咁既話,你屋企,時間同金錢可以付出唻養幾多籠鼠呢?唔知你係咪學生,暑假好多學生去養鼠,去繁殖,同時都有好多棄養,今日都再有一條問題話想棄鼠,咁放完假既話,又會唔會冇而家咁多時間去打理鼠鼠?

真係好希望你會考慮清楚先去做,好過到時生左一大堆,有食B既情況會好難受,冇食到又太多隻,又要諗點去唔要or點去養咁多籠,分唔到籠亂倫打交又一大堆問題,咁又何必去繁殖?

其實鼠鼠最好分籠,繁殖鼠鼠會有好多問題,我自己一籠一鼠左好耐,鼠鼠身體都好D,唔會被打,又少受驚,我既鼠多數都係老死OR年老腫瘤而死(當然配合返唔亂食野,同適當地對鼠鼠啦),建議分籠原因如下:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)就算唔打傷打死,都會感到壓力,壓力會誘發甩毛肚瀉等疾病
6)一籠唔止一鼠,仲會較惡,特別易咬人同比較難同主人熟
7)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶

B.如果考慮完都堅持繁殖鼠鼠,冇辦法令鼠鼠快D懷孕,呢D係自然既事,只能話有咩要留意
在你懷疑佢懷孕時留意以下幾點:
1)將鼠爸及其他鼠分開
2)唔好接近個籠,唔好掂鼠媽媽同bb,盡量等到鼠bb戒奶後先洗籠(大約18-21日戒奶)
3)用奶粉沖d奶代替水俾鼠媽媽飲,記得唔好俾鮮奶,唔係會令鼠鼠肚唔舒服既
4)放定好大量既食物入去,之後換食物換奶都要小心唔好俾鼠媽媽發現,到鼠bb識行之後,食物就要整碎d,唔係bb食唔到/食左落去吞唔到就大件事.
5)唔可以將鼠bb同媽媽分開,唔係bb就冇野食,生存唔到.我細個既時候,有人教我用手餵bb飲奶,但咁係唔可行既.
6)另外,如果用既籠係通風,bb可能會趺出唻,可以用d膠file整開包住個籠,但記得要整多d小孔,唔係就冇空氣

食唔理鼠bb or 鼠bb被食有幾個原因:
1)如果鼠媽媽覺得bb有危險-媽媽會食左bb/收埋bb入腮,令鼠bb缺氧,都會食bb
2)鼠媽媽覺得bb養唔大-鼠bb身體弱 or 自己冇足夠既奶分俾佢地
3)鼠媽媽覺得bb有第d動物氣味
4)鼠媽媽情緒太緊張-有第隻鼠在場,有外來環境令佢緊張,有人打擾佢,甚至只係因為生育而情緒緊張
5)鼠bb死左
6)鼠爸爸對bb根本冇咩感情,所以如果生之前冇將鼠爸分開籠,爸爸就有機會會食bb,而鼠媽媽感到威脅,都會唔理鼠bb

我之前都有養過小露寶, 由於係朋友送的, 所以一開始並唔知道佢地係一男一女, 直至佢地生咗bb....

倉鼠生bb真係生得好快, 生的隻數視乎鼠媽媽的身體狀況。當鼠媽媽大肚時, 會好明顯見到佢下半身突別肥大, 臨盆時鼠媽媽的下半身會呈三角形, 兩邊突出。當知道鼠媽媽已懷孕, 必須將她和鼠爸爸分開養, 因為鼠媽媽會隨時生, 免得鼠爸爸會攪bb。

生bb後, 鼠媽媽會變得好緊張, 但千萬不可以用手觸摸bb, 因為鼠媽媽會臭到bb有異味而疏離bb, 令bb冇奶食。剛生完bb亦不適宜幫鼠媽媽清潔, 因生產後鼠媽媽會對外界特別敏感, 少少郁動都會令牠好緊張...

雖然見到鼠bb一日一日變化和長大是好得意, 但係要將鼠爸爸和鼠媽媽分開養, 卻令人覺得可憐和孤獨, 當鼠bb大過後的處理問題亦都幾頭痛, 所以你要認真考慮是否養倉鼠仔生育喔!

係生之前, 你必須知道

1. 倉鼠的繁殖能力十分驚人, 生完可以即刻再懷孕, 每胎大概 3-8隻

2. 不同性別須要分籠飼養, 請確保你家有足夠空間

3. 確保你有足夠金錢和能力

4. 如果你只係玩玩下, 生完bb 就將佢地俾晒人, 咁你就係一個極不負責任的主人!