海南島三亞二天自由時開, 請問有冇好玩好食推介?

三亞雖則可稱得上是旅遊城市, 但實際的遊樂設施並不多, 交通配套亦不太完善.

玩方面, 最佳活動當然是游水和水上活動. 三亞有三個海灣︰三亞灣、大東海和亞龍灣......

以海灘質素而言，首選亞龍灣，玩水上活動可以去亞龍灣海底世界, 至於游水, 海底世界那個沙灘不宜游水, 人多, 地方細. 酒店的私人沙灘一定最正, 所以你可以揀選亞龍灣的酒店住, 游水可在酒店的私人沙灘慢慢享受. 基本上, 亞龍灣的沿海酒店都有私人沙灘如紅樹林, 卡爾頓, 家化萬豪, 鉑爾曼, 希爾頓, 喜來登都是非常的好, 亞龍灣假日就差D, 私人沙灘和海底世界share.

至於三亞灣, 一定要揀凱賓斯基, 好靚, 私人沙灘好正, 游水曬太陽一流.

玩水上活動, 還可以去西島, 聽講也不錯, 但三亞每個的士佬都推介西島, 我怕西島要回佣給司機, 質素可能會差d.

鹿回頭公園是一個比較好的旅遊點, 位於大東海, 近市區. 可坐滑道上落公園, 山上可以餵鹿, 坐轎, 算是比較多野做, 多野玩.

其餘如天涯海角, 大小洞天, 南山等旅遊點都是看岩石, 山洞, 佛像的地方, 沒有太多野玩.

食方面, 首選春園海鮮廣場食海鮮. 記著, 是河西路的春園, 三亞的士佬十個有十個, 一百個有九十九個都會載你去假春園 (春遠), 記謹叫的士佬載你去「果喜大酒店」, 然後自己行過去 (好近, 五至十分鐘去到). 那裡是先找一個檔口坐下, 那裡的人會帶你去揀海鮮, 先付錢去買, 然後帶回檔口加工, 再收少量加工費, 不會太貴. 平均每人80蚊左右.

想食BBQ, 去銀泰酒店 (位於大東海).

想食黃流老鴨, 去勝利路的光明老鴨店.

想食抱羅粉, 去第一市場附近的正宗抱羅粉.

三亞食店林立, 如果選擇不到, 記住要去多人食的地方, 少人的多數會宰客.

希望這些資料可以幫到你.