Canon 17-85mm & Tamron A16 17-50mm

咁其實要睇你攝影習慣同埋想要甚麼
影景一般來講對鏡頭要求唔係咁高.因為可以慢慢影,對焦慢啲都OK,又多數用細光圈,鏡頭光圈細啲都冇所謂.而且光學質素都冇太嚴格要求,有道縮光圈無爛鏡.
不過其實影景都有好多種影法.
首先你問到image stablilzer,即係俗稱防震.因為影景都好小用好長焦距,如果光線夠快門夠快其實冇都得,又或者低光時你肯用腳架,咁其實防震就冇乜用.防震主要作用其實係針對低光時既手持拍攝.例如一啲室內燈光甚至夜景.如果唔用得腳架或者唔方便用.防震就可以一定程度幫到手.雖說現在數碼機的高iso雜訊控制不錯,但實際拍攝時你會發覺單單高iso都係唔夠的,除非你用到iso 3200, iso 6400.咁依家啲相機雜訊控制又未去得咁勁.另一個方法係大光圈,但一來大唔到3,4級咁多,二來光圈太大影景景深就會唔夠,光學質素亦冇細光圈咁好.
講翻啲鏡頭,17-85mm IS USM我以前都會叫人買,因為廣角防震鏡嗰陣就係得呢支,而好多人都係唔會諗住用腳架的.支鏡其實都唔差,中間好sharp,邊位就差啲,淡色可能有小小,廣角變形及四角失光較多,但整體上啲相係靚的.
不過自從出咗支只係千幾蚊既18-55mm f3.5-5.6 IS,咁就不如買呢支,一來平,二來光學質素原來唔錯的,仲比18-75mm好,焦距短小小同埋冇超聲波對焦其實都唔係太重要.有防震己經可以代替到17-85mm f4-5.6 IS USM
A16係冇防震版本的,新版只係加咗鏡身摩打,而且Nikon mount先有,Canon mount只有冇摩打舊版.支鏡光學質素非常好,但缺點係對焦面是孤形,影平面嘢唔係咁方便.配40D等效焦距係27-80mm,焦距比一般DC仔短小小.但係我覺得其實唔係咁緊要.恆定大光圈好過焦距長小小但長嗰段光圈細難用.
好在Canon有支17-55mm f2.8 IS USM,雖然貴啲要六千幾蚊,但防震,大光圈,好光學質素,超聲波對焦乜都齊,如果唔諗住轉大片幅相機,都算係終極選擇.尤其40D既中央雙十字對焦,要鏡頭有f2.8光圈先會啓動的.用細光圈鏡有啲嘥咗部機.
我會建議預算足夠的話買17-55mm f2.8 IS USM.
否則就睇你意向,冇諗住用腳架不如平平地買18-55mm IS,有的話可以選擇光學質較好的A16.
以下網頁有鏡頭的測試
http://www.photozone.de/Reviews/overview