想請問現時歐洲各國的軍事實力如何?

德國人無好似日本仔咁鬼祟叫自己做自衛隊，依家佢支軍隊仍然都係叫聯邦國防軍(Bundeswehr)。現代德軍當然無當年咁猛，但仍然係歐洲強國。戰後德軍既實力本來已經唔弱，幾十年來都裝備先進既設備，無論豹一及豹二戰車，黃鼠狼裝甲車等都係聞名世界既一流裝備。不過幾年前德軍面對都幾嚴重既部隊老化問題，去到廿一世紀都要用F-4黎防空。不過近一、兩年德軍已經全面現代化，用自製裝備大規模汰舊換新。最觸目既係將一千五百架豹2A4全部用500架近戰更強既豹2A6代替。而空軍則汰除所有F-4及來自前東德既Mig-29，全部以歐洲戰鬥機代替。炮兵方面則入最新式既Pz-2000入役。海軍方面有全球最先進既燃料電池絕氣潛艇212型服役。德國陸軍近年亦精簡左架構，全軍有一個裝甲師(大名鼎鼎既第一裝甲師)、一個機械化師(第十三機械化師)及其他旅級既機動部隊。全個德國國防軍有大約有二十萬人左右。

法國理論上係歐洲最強國。法軍規模都係有廿幾萬人，裝備一樣好先進。陸軍當然主要以雷克勒(Leclerc)戰車為主，主要用黎汰換老舊既AMX系列。呢款坦克技術指標都幾先進，不過由於比較貴，到依家都未有外銷紀錄。法國佬最硬野既就梗係海軍，前幾年核動力航母戴高樂號服役，上面仲裝備左先進既陣風M隱形戰機。呢樣野都幾厲害，雖然陣風M唔係徹底隱形既戰機，不過海軍裝備有隱身能力既戰機全球就只有法國一家，美軍要等F-35服役先趕得上法國佬。另外，近排法國又有一艘戰略核潛“可畏號”服役，而法國戰略核潛部隊亦逐步換裝最新型既M-45型飛彈，令法軍有足夠既核威脅力。而水面艦艇部隊則裝備有新式既地平線型，呢款戰艦雖然係降級版既神盾，個天線都係要轉，但係以歐洲既環境黎講已經夠用。

英國同樣係歐洲強國，不過實力的確比法德弱啲。英國海軍係二次大戰之後就一直虛弱，直到依家都係。英海軍係2005年將無敵號航母退役後，依家佢只有兩艘各自只能搭載6架戰鬥機既航母，即係皇家方舟號及卓越號服役。英國佬唸住連呢兩隻艦都唔要，用新一級既航母代替。新航母會起兩隻，分別係伊莉莎白二世女皇號及威爾斯親王號，預計係2014年左右服役。新艦大好多，可以裝幾十架戰機，排水量有五、六萬噸，艦載機將會用F-35，不過最搞野既係咁大隻艦竟然唔係核動力，呢樣野肯定嚴重影響整支艦隊既戰力。英國空軍同德國一樣，終於可以裝備歐洲戰鬥機汰換老舊既龍捲風戰機，用既飛彈係自研既主動彈“天空閃光”(Skyflash)。英國陸軍同傳統一樣規模唔大，只有幾萬人，最出名既裝備就梗係挑戰者2型坦克。呢款坦克宣稱防護力天下最強，但係伊拉克已經有實戰証明連佢都會被擊毀。

其他歐洲國家實力點﹖比較難講，因為上述歐洲三強既軍隊規模已經唔大，其他既小國就自然更小，而且有唔少國家為慳皮都用埋差唔多既裝備。例如唔少國家都向德國買豹式戰車，無論豹一定豹二都有唔少國家用緊，有啲國家甚至唔執輸係前排德國汰換嗰千五架豹2A4時入左啲貨黎作為本國既裝甲主力，而遠在亞洲既新加坡都買左50架。德國佬連佢既垃圾都大把人爭住要，江湖地位實在無容置疑。不過有趣既係其他歐洲小國都幾肯花錢係海軍度，例如西班牙就有航母及神盾艦。意大利都有隻航母仔。而有唔少歐洲國家都向德國人買潛艇，希臘仲要花大錢引入212既外銷型214型潛艇。荷蘭自己都做左一批唔錯既護衛艦。至於瑞典就最巴閉，佢既軍工係歐洲出晒名，飛機大炮咩都國產，戰機有鷹獅JAS-39，呢款戰機有唔錯既外銷市場，捷克、匈牙利，甚至係泰國都用佢。海軍有絕氣潛艇哥特蘭級，呢款潛艇都幾巴閉，出晒名靜到不得了，連美國佬都要特登搵佢黎練兵。日本仔見佢咁好用，都引入左技術去造佢自己既絕氣潛艇。不過瑞典既坦克就都好似係用豹式，但瑞典勁在連預警機都國產，平衡木式既愛立眼唔單止自用，亦有出口。至於歐洲各國既空軍，如果係西歐國家就主要用F-16或歐洲戰鬥機，東歐國家多數用俄系戰機，上述既鷹獅係將來亦有一定既市場。