紅蟲應該怎樣處理

改餵紅蟲，係唔係因為之前用o既糧有ｄ問題？
我自己咁睇：
１．營養
天然食物一定有其好處。紅蟲本身有豐富蛋白質，紅色o既物質係血紅素，即係鐵質亦好豐富。魚糧則有人工配方，其實各種營養素方面唔應該差太多。
２．污染
活餌同雪藏餌有一個好處，因為係一隻隻，成舊吞，所以唔會碎開散開，污染一定較少；人工餌無論片狀粒狀，一定會吸水變軟，食o既時候散開，污染一定較多。
３．清潔／方便
片糧唔會污糟，但係活餌如紅蟲，生活於ｄ淤泥之中，買呢ｄ鮮紅蟲唔可以當人地洗得好乾淨，事實上人地洗，都係用一張網過下水，大粒o既o野都洗唔走；我以前餵紅蟲，耐唔耐都會發現有ｄ其他蟲o係入面。豐年蝦就o係鹹水中孵，餵佢地之前，亦要隔水。冰鮮o既就比較好。
但無論如何，用脫水人工魚糧，一定方便好多，只要唔受潮就得。特別係去旅行時，要用到電動餵糧機，就非用人工糧不可。
＝　＝　＝　＝　＝　＝　＝　＝　＝
因此，兩者之間，我會以人工糧為主。因為一來方便，二來平，三來魚其實都係有口味o既，如果長期餵開一種糧，佢對其他糧就冇咁想食，即使人工糧亦如是。所以可以的話，都應該間住餵唔同o既糧。活餌可以係幾日／間中一次，當請佢食餐好o既。特別係萬一要用電動餵糧機，餵開活餵就有ｄ麻煩。
份量方面餵魚都係寧少勿多，我現時只用冰蟲餵野生鬥魚，大o既（約５ｃｍ）都係餵約七八條，細o既（約３ｃｍ）都係食３條左右就飽到唔食。你o個ｄ，都係每條魚餵四條夠數，總之都係寧少勿多。
餵剩o既蟲，要用有蓋又合得緊o既盒放好，放入冰格冷藏，否則會變壞同有異味，到時就俾家人斬架啦。我自己就買一盒冰蟲，取出一粒後放o係一個膠碟解凍，ｄ水用廁紙吸乾，再將ｄ蟲分開一份份咁放入膠盒冷藏，每次取出一份，放入水解凍o黎餵。咁放可以放好耐架。

唔理你有幾多條魚都好,
其實你餵魚糧定紅蟲,
都無分邊種會好d~
魚糧就含多種有益物質,
如鈣、蛋白質等等,
魚糧係人造物品,
所以先含多種有益物質~
而紅蟲就係大自然既野黎,
當然紅蟲都算係昆蟲,
都含豐富蛋白質,
而且係多種水族生物都鍾意既食物(海水魚除外)~
我個人認為紅蟲幾好,
對水既污染係減少左,
但價錢就比較貴少少,
睇你鍾意邊種啦~
份量其實睇條魚係幾耐食完,
最好係5分鐘之內食得晒d紅蟲咁就為之份量適中~
當然份量係你自己調較啦,
我通常就用牙籤去整紅蟲,
約半隻食指頭咁多度啦,
因為我養左十三、四條魚~
如果係新鮮紅蟲的話,
最好放入冰箱雪住,
留返下次用~
千其唔好放係室溫地方,
怕佢發臭、變質~
而冰鮮紅蟲,
其實都係一樣放入冰箱雪住,
因為佢原本都係冰箱拎出黎既~
紅蟲最多留一星期,
我自己一次買3蚊紅蟲,
用三至四日左右就用完~
如果你餵完紅蟲,
最好唔好又餵魚糧啦,
一次餵一種好啦,
而且魚食慣一種就唔會食其他野嫁啦,
所以你最好揀定餵邊種比佢地食呀~
唔好兩樣都餵下咁,
D魚好難習慣嫁~
你唔駛怕買唔到紅蟲喎,
魚街勁多鋪都有紅蟲買,
你每星期出一次都得嫁嘛@@
或者你唔得閒既時候可以餓D魚兩、三日,
佢地餓到幾日嫁,
到時先再出魚街買囉~

魚街有好許種類的急凍紅蟲賣，如加有維他命的。放在冰箱可以放好耐。放下紅蟲，要5分鐘內食完，可以續少續少放，分幾次，食唔完最好吸走紅蟲。

你可以買D乾紅蟲,可以Keep「內」D~