獨自出外旅行的好去處

樓主真係啱，小弟近排都安排緊一個人去歐洲旅行，不過小弟唔跟團，未必啱樓主，我係度介紹一啲都唔錯既旅程，去呢啲地方唔一定要跟團，不過依家各大旅行社搞既旅行團通常都會包晒所有應該去既景點，所以跟唔跟團都一樣。但係旅行社有辦法攞到平常人得唔到既平機票同酒店，所以如果樓主想去既地方同旅行團既差唔多，最好就係跟團。

樓主先要唸清楚去邊，因為唔同距離既團價錢相差好遠。如果去近程，返大陸或者去台灣都係非常好既選擇，因為多野睇。番大陸跟團就得，詳細野我唔講太多，我推介你去以下是但一個團﹕北京、台北(自由行都無所謂)、華東、張家界、黃山、雲南。呢啲地方求其一個都好靚，又平，絕對值回票價。

如果樓主想去遠程，咁旅行社既剩倫敦或剩巴黎團就係最好既選擇。最緊要係佢地平，團費只係五、六千蚊，全程駛費慳慳地只需要一萬銀左右，絕對抵玩。小弟係2005年聖誕假用半自由行既方式去左巴黎五日四夜，見識左好多傳奇既景點，呢個trip絕對令小弟畢生難忘。如果樓主比得起多啲錢，去埃及都好。小弟係巴黎之旅一年後跟團去左嗰度一次，既入大金字塔又遊尼羅河，嗰次既經歷我依家仲瀝瀝在目，如果你唔係旺季去，全程只需$13,000左右，以咁遠黎講唔算好貴。不過由於埃及夏天太熱，所以我建議樓主都係唔好係呢個夏天去，等到秋、冬至算。另外，埃及對自由行旅客唔係咁方便，所以去就一定要跟團。

另外，如果樓主唔介意坐船，坐啲走東南亞航線為主既郵輪都唔錯，全程連機票只係幾千蚊，而且有成架船既設施任玩同埋有海睇。不過郵輪既缺點係通常停泊既港口都唔會太多野睇，而且唔係下下都有合適抵玩既航線，而且呢啲郵輪好快full，樓主要夾得好好先至可以去玩。