克萊斯特及范屠亭的事跡及表現

樓主問左一個好問題。克萊斯特同范屠亭都係二戰時既優秀將領。網上自然有大量關於佢地既資料，我就唔做影印機啦，我只係度講啲我記得既野。

克萊斯特既出身極端猛料，佢自己係呢個家族連續第四代既德國元帥。記憶中佢無帶過整個南方集團軍，而佢長期做第一裝甲軍團司令，主要負責德軍東線最南方既機動作戰。初期佢既部隊戰績幾驚人，差啲就打到終極目標，即係巴庫-巴統一線，不過係蘇軍既反撲之下先至唔店，而佢係因為攻陷克赤半島而封帥。不過，後來南線德軍因史達林格勒既敗仗而節節敗退，第一裝甲軍團差啲被圍殲，好彩曼斯坦帶兵來解圍先至無事。不過後來南線德軍既任務主要係抵擋蘇軍係史達林格勒之後既反攻，再加上之前損失慘重，所以第一裝甲軍團係後期都無咩作為。之後克萊斯特點樣唔記得左，總之係戰後佢比蘇聯判左十年監，仲要係1957年因肝癌死於獄中。其實呢個真係天下第一寃獄，因為克萊斯特係一個正直既軍人，佢唔單止唔鐘意納粹，而且仲要完全反對希特勒要屠殺蘇聯平民既政策，更親自扣起有關既命令同嚴令如果部下有任何戰爭罪行必定軍法處置。但係就係佢特別唔好彩比蘇聯捉左去坐監，而佢亦係唯一一個德軍元帥死於監獄。

范屠亭(Vatutin)係大陸譯做瓦杜丁。佢係蘇德戰爭中期左右成名，小弟記得佢負責既第一個大攻勢就係史達林格勒會戰後既蘇軍反攻，不過呢個反攻打得唔好，比曼斯坦誘敵深入後打殘左，並造成庫斯克突出部及之後既庫斯克會戰。不過范屠亭雖然孭左大鑊，但佢仍然受史達林重用，係之後各項重要大戰，包括庫斯克等大戰都有出戰。但係1944年，佢係烏克蘭比親德狙擊手一槍打死左，對蘇軍黎講呢個係極重大既損失。