香港公開大學

(1) 香港公開大學係一間課程得到香港政府認可的大學, 並獲香港政府授權可自我評審的大學, 即係其他大學所開辦的課程需要得到External bodies 評審後才得政府認可, 但公大就唔同, 可以自已認可自已, 不過都唔係完全能夠隻手遮天, 因為佢仲有另一個監察機制, 就係每一科都會要請另一間大學(通常係城大和港大)的教授監察學生功課及考試卷, 所以要考試合格, 係有少少難度, 不過我自已在公大快完成Computing and Networking 既 Degree, 覺得唔係真係咁難, 最繄要係每科每日預留返一小時讀書和做功課就一定掂.
(2) 公大的學位課程幾好, 反而係Diploma 和 Higher Diploma 就弱D, 課程夠深但係讀既嘢唔夠其他U廣泛, 畢業後好似未滿師咁, 未必夠應付社會需求.
(3) 公大俾人既印象都幾好.
(4) 公大在社會的認受性唔算太好亦唔算太差, 我入學前都周圍去打探過, 結果係認受性跟理工相約(只限於香港境內), 而我亦比較過在物業管理行業裏公大工商管理degree畢業與其他大學的工商管理degree畢業的朋友於未有經驗時在行內所得的待遇, 發現和理大及城大差唔多(約8000至9000左右), 職位方面, 亦同樣可以當上助理管業主任. 至於其他行業就未有機會比較過.
(5) 前景好唔好? 香港整體經濟好, 佢就好!
圖片參考：http://tw.yimg.com/i/tw/ugc/rte/smiley_5.gif
唔係想癈話, 只不過係即使同一間大學, 唔同科目出來, 前景亦有好大分別, 而且唔同Background的人讀公大亦有唔同前景, 難以一概而論, 就好似容溟舟先生咁, 讀完個公大電腦學位三年後就做咗區議員(2007), 但係我同樣地下年就同佢讀埋同一科畢業, 不過我只可以做契弟.
(6) 係咪多數俾就業既人進修? 公開進修學院(公大前身)起初响1989年成立之時, 確實係為咗在職既人可以繼續進修而設, 學制超靈活, 即使你每晚夜晚十點先放工, 抑或係輪班工作, 只要你每日抽到一小時零廿分鐘出來, 都可以讀, 最多遲D畢業, 其他大學就做唔到, 以現時香港社會狀況, 一般寫字樓工其實都需要每日十至十三小時工作(OT冇補水), 日日朝九晚八, 冇辦法返到其他大學讀書, 公大因此就成為好多人進修既希望, 我亦係受惠者之一. 但係其實公大亦有全日制學位課程, 詳情可以睇吓以下個網址:
http://www.ouhk.edu.hk
(7) 對比其他大學整體來說, 公大唔係特別好, 亦唔係特別差. 一定差過港大, 中大, 科大, 但係同理工差不多, 比城大弱少少.
(8) A-level Full Cert 徝唔徝得報?
我反而有一個反建議, 你有 A-level Full Cert 先好報, 因為課程內容設定得幾深, 雖然考試和功課難度一般, 又或者咁講, 大學會讓吓你, 驚你FAIL, 但係點讓都好, 課程本身SET得深, 功課和考試的難度始終唔會太淺. 我雖然冇考過A-Level, 但係17年前會考(課程乙)都有19分, 讀過HD, 但係我讀公大的時候都唔係冇困難, 試過有份網絡程式的功課只得34分, 而亦有會計碩士畢業生話俾我聽佢地都試過讀公大degree既時候考試肥過, 要重讀該科.
(9) 那一科比較好, 比較出名:
公大好似冇邊科突別出名, 但係Accounting就幾好, 專業學會的承認好高, Computer 亦唔錯, 好Practical, 讀完唔怕冇料到.