YOKI SIR 請指點2007碧桂園及2000晨訊科技迷津.................

碧桂園（２００７）其實我呀媽仲慘，因為我在＄１１．Ｘ左右沽，佢竟然聽了別人的建議，在＄１２．Ｘ買了，但之前當然係冇問過我，所以我呀媽坐到而家！

真係我賣畀佢好過！

我都一早叫佢放左佢，但我呀媽同很多散戶都一樣，蝕咪揸住先囉，最緊要唔係借錢買的，遲啲會升番啦！

結果，有＄１２座到而家，佢已冇心機睇佢了！

在知識＋中，我想大家都知我不看好內房股！原因說了很多，不必重覆，不如用另一個角度講下啲新野！

大家覺得大陸樓，貴唔貴呢？

就以現時深圳的水圍一帶的屋苑，上面叫做〔小區〕為例，現時樓價大概在萬三蚊左右一平，即是大概等於香港的千三蚊一呎！

當然，用香港人的角道看，可能用自己層樓去比，是平！

但在大陸人的眼中，或我當自己係大陸人，用他們的角度去想，現時的樓價是〔天價〕！

大陸很多人，仍然是搵緊千多蚊人工，當然千多蚊人工的工，很多都是包食住的！但可以搵幾千蚊的，已算是相當之唔差了！

就當佢搵幾千蚊人工，要買一層百餘萬的樓，在大陸的供樓利息那麼高下，我想是超乎了合理的供款能力！

當然你可以說，好多大陸人都搵到錢的，但數目在比例上又是幾多呢？

這是其一！

另外，我們用大陸樓同香港樓去比！

雖然香港樓是比大陸樓是貴，但大陸樓真的平嗎，當你考慮埋其他的配套，就知大陸樓跟本唔值這個價！

１．如果層樓火燭，你估香港的消防員幾耐會到，而大陸的又要幾耐？

２．樓宇管理的問題！

我的家人是在大陸有物業的，就講一個真人真事給大家〔分享〕！

我想大家都知道，很多小區都是有會所，而會所的擁有權是屬於邊個呢？

我想大家都識講，是業主！

係人都知管理費有部份是ＳＵＰＰＯＲＴ個會所啦！

冇錯，大家又信唔信個會所拿了去租畀其他人去開桑拿呢？

但啲租唔係畀番啲業主啊！

業主會反對嗎？

當然，於是就有業主，像香港一樣，組織一個疑似〔業主立案法團〕之類的物體，去爭取業主的權益！這就是香港的一套！

最後又掂？

那位發起人，就畀人打了一身，成個豬頭咁！

可以報案嗎？

當然可以，但報案唔係代表可以幫你捉到人啊，可以幾十年都話捉唔到啊，你吹咩！

於是那個發起人而家影都唔見，而其他的業主也不敢出聲了，這就是大陸的一套！


３．如果我問你，又荃灣出旺角要幾耐呢？

你可能說，搭地鐵可能要２０分鐘左右！

但由皇崗去田貝，又要幾耐呢？可能就要成粒鍾了！

皇崗去田貝的距離，同荃灣出旺角差不多，但時間就差一大截！

因為大陸成日塞車，而又有很多地方，仍然是冇地鐵到！

４．如果你在香港發生事，需要救護車，可能幾分鐘就到了！

去到醫院，第一時間醫左你先！

但在大陸呢？

唔知要等幾耐啊！

因為唔知是否午睡中，或塞緊車要遲啲到！

送到醫院又掂？

那裡的人可能問你，我地醫院是要收〔押金〕先啊！

那麼，再比較那麼〔硬件〕以外的其他配套，大家又認為大陸樓值唔值這個價呢？

雖然講了那麼都是我對大陸樓的看法，但也是反映了我對內房股的看法！

我都好想碧桂園（２００７）上番，因為我呀媽蝕到好應，上番＄６．５是有可能的，但真的要等唔知幾耐！

至於2000晨訊科技，由於篇幅關係，留下一條問題答吧！

YOKI WONG
圖片參考：http://tw.yimg.com/i/tw/ugc/rte/smiley_1.gif

YOKI SIR真是好文章.
香港樓价比天高,04我看何文田區.900呎的單位不過200萬多些,但依家要600多萬.試問一般的打工仔点買得起供得起?
大陸樓更不堪,一味起新樓,發展商都說全部買光,但很奇妙,卻丟空冇人住?全部變成景点.
我在大陸工作,每每經過廣州東莞一帶,看見到處都是新房子,但詭異地人跡全無.是真正的有人冇屋住,有屋冇人住.
聞說深圳巳經很多人斷供,有点像美国的次按危機.
2007現价巳反映其真正价值,但加息期又再次燃燒,我个人認為難以樂觀,因為磚頭冇理由貴過石油/黃金的.