Canon S5IS 防震功能

引起相片模糊不離三個原因.手震,快門太慢不足以涷動作或者對焦不準.
S5is係一部長zoom機,估計你都係因為冇辦法將小朋友影得夠大而買佢,但係長焦距拍攝跟一般中短焦距拍攝要技巧及器材要求都高好多的.
兩部機既防震其實差唔多,但係焦距越長就算開咗防震都要增加快門速度,防震只可以降約3級安全快門,再多就會開始失效.IXUS 80 zoom到盡都係得114mm,加埋防震,應該1/30秋左右都已經冇事,多數全自動模式在光線充足時快門都應該比這個快,所以你唔覺手震.但係S5IS有成432mm,就算開咗防震都可能要1/100秒先唔受手震影響,全自動好多時未必會同你開到咁快,加上相機握持得唔穏防震就會失效.解決方法係用S5is既快門先決限死快門唔好咁慢,唔夠快再加快,唔夠光就將iso加高小小.或者唔好zoom咁遠.
以上係講緊室外光線夠的情況,室內好難做到咁快,做得到iso都應該好高下,唯有放棄用長zoom,改翻用短焦距影.將手震的影響減至最小.
對焦其實冇乜好搞,一次對唔準唯有對多次.再唔係就手動對焦,不過難度會幾高.
跟住就係涷結動作,長焦距經常用來做大特寫,大特寫要涷結動作的快門又係要快頗多的,例如全身相的話,用1/100秒快門可能面部只係郁咗0.1mm,睇落去唔係好覺,但係如果影頭部大特寫的話,就可能在相片上變成郁咗0.5mm,就會覺得矇,快門就要去到1/500秒先掂.
解決方法又係用快門先決加快快門,唔夠光就將iso加高,但係加高iso既代價就係會增加雜訊,最好盡量唔好加咁高,寧願搵啲夠光既地方影或者唔好影到咁大特寫.

2008-06-30 17:48:39 補充：
首先要將機頂轉盤轉去Tv,然後(我估)用機背十字掣按左右改快門速度,因為我搵均機身都唔見有其他掣係改數值既.

2008-07-01 07:34:04 補充：
其實快門唔夠快,用光圈先決都得的,只要開到最大光圈,自然就係嗰個iso既最快快門,不過唔夠快的話相唔會變暗.相機照樣會用慢快門幫你影,所以要自己留意快門值.用法係將機頂轉盤轉去Av,然後好似較快門咁較光圈.留意光圈值越細代表光圈越大.