急問~關於金錢/律師/法援問題

首先你要知道, 法援係俾d有需要律師, 而又俾唔起律師費嘅人. 申請法援係有資產審查嘅. 簡單嚟講, 如果你嘅總資產起過$167,500 (包括樓宇 / 股票 / 銀行存款等), 咁你就無資格申請法援.
你係唔可以自己請律師,再申請法援要法援幫你俾錢嘅. 你話你 "真係唔係有錢人, 但又想請一個自己比較相信既律師" - 呢個世界無咁理想嘅. 你只可以二者選共一.
申請法援一般情況下當然係要用佢哋指派嘅律師. 老實講, 又唔使你俾錢, 重邊有得俾你揀咁着數呀?!!
其實香港好多刑事案件, 由係法援請律師同大律師打嘅. 老實講, 有幾多個林建岳, 可以使成百二萬去請律師打單超速駕駛吖! 去得打劫走粉, 大多數都係因無錢, 有錢請私家律師, 就唔使打劫走粉啦! 而律師 / 大律師都有一套專業守則. 做得律師 / 大律師(在此為方便, 統稱律師)的, 本身都要有很高的誠信. 所以破產 / 有案底的人都做唔到律師. 律師們都要嚴守大律師公會 / 香港律師會的守則, 違例者會被取消執業資格. 律師係有權揀做唔做法援case嘅. 嫌少錢就唔接法援case囉. 所以如果佢肯做法援case, 就唔會因為錢少而無咁落力嘅. 加上大律師係靠個 "朵" (名氣, 即係贏得多唔多cases)同年資黎定收費高低. 如果佢因為做法援case無乜錢賺, 而求求其其去打官司, 搞到為成日輸官司, 第日就無人肯聘用佢, 咁就得不償失! 所以d人成日話私家狀好過皇家狀, 其實係徧見嚟啫.

你又想自己揀律師, 又想揾法援, 其實都有辦法嘅. 只要你在申請法援前已經循私人途徑請咗律師及大律師代表, 但後來無$而要揾法援, 而該律師及大律師又:
a. 在法援律師名册有列名
b. 同意由私人聘用轉做經法援幫你打單官司(即係收平好多)
你就可以以 "保持延續性"為理由向法援申請用番該team律師. 通常都批, 但資深大律師除外, 因為法援唔會用資深大律師, 而資深大律師亦唔會接法援case.