西方國家的皇室稱呼

樓主問左一個幾得意既問題，小弟係呢方面知少少野，等我講幾句。

樓主所謂既“西方”係一個太籠統既名稱，因為鬼佬有好多唔同既民族，每個民族既習慣都唔同，所以好難一概而論。但係一般黎講，平民百姓一般會叫貴族做“Lord”，本來呢個字解“主人”，係以前僕人對主人既稱呼，不過後來就變成左貴族既尊稱。呢度所指既“貴族”其實無分啲咩階級，只係平民對貴族一般既稱呼。通常“Lord”呢個字都可以翻譯成中文既“陛下”。

但係如果去到稱呼比較高級既貴族同皇室成員就要講究啲。通常對皇室成員，例如皇帝、皇后、皇子、公主等都要稱呼佢地做“Highness”或“Majesty”。呢兩個字大概可以譯做“殿下”，不過佢地既用法都幾講究，實際上要點用小弟唔係好知，我只可以舉兩個例子。係電影“羅馬假期”(Roman Holiday，港譯“金枝玉葉”)入面，由柯德莉夏萍飾演既公主Ann，每次出場時，佢個管家都會稱呼佢做“The Royal Highness Prinecess Ann”，大概可以翻譯為“Ann公主殿下”。另外，英國海軍每艘船既船名之前都有縮寫“HMS”三個字母，佢地係“Her Majesty Ship”既簡寫，大概可以翻譯為“皇帝陛下的船”。

係西方皇室，“Prince”及“Princess”係兩個用得好廣泛既名銜。呢兩個字最原始既翻譯係“王子”及“公主”，不過西方人無中國人咁巧立名目，總之如果一個人同皇室有啲關係，但佢又唔係皇帝或皇后，咁男既就係“Prince”，女既就係“Princess”。所以係西方皇室，無論皇子、皇兄弟、皇夫、駙馬等都係“Prince”，中文一般譯做“親王”。另外以前德國皇室規定，任何伯爵或以上既貴族，即包括大公爵、公爵、侯爵、伯爵都可以稱自己做“Prince”。而“Princess”則包括公主、太子妃、皇妃、郡主等，但當然唔包括皇后或女皇，因為皇后或女皇係“Queen”。

西方同中國一樣，將要繼承大統既皇子都有一個特別既稱呼，中國叫“太子”，西方有一個好貼切既稱呼，叫“Crown Prince”，即係帶左皇冠既皇子，引申意思好明顯就係太子。但係英國皇室會將太子封為“Prince of Wales”，即我地成日聽到既威爾斯親王。

Her Majesty's Ship（吾係Her Majesty Ship）係女皇陛下的船，His Majesty's Ship先至係皇帝陛下的船。