✔ 最佳答案
我諗都係諗番兩個大原則：
1. 無絕對正確合理既劃分方法，最緊要睇番你地之間既協商。
每對夫婦都有各自既價值觀，結婚後各自價值觀之間既緩衝結果不同，所以睇其他人既情況係無用既。
最緊要係你同先生之間商量清楚，因為你地自己有各自既諗法同私下既開支需要，各自既價值觀亦有不同，因此協商既結果亦有不同。最正確既劃分方法，或者就係可以令大家和氣收場既劃分方法，即使只係一方付出而已(一個願打一個願捱)。
例子：我太太曾經全職讀書，一分錢收入都無，我人工唔高成份糧又要供樓又要養起成頭家，個個月都儲唔到錢，當然乜興趣都談唔上，上網係唯一既娛樂；依家太太人工多過我，雖然我都照俾番份，但係佢又俾番多啲出嚟俾兩邊父母，等我可以儲番少少錢俾自己用係興趣方面，最緊要係大家之前傾掂數。
2. 商量、商量再商量，不過總會有一方或者雙方要作出讓步。
世界上無絕對既勝利，兩公婆之間千祈唔好存有[我又赢咗你啦]既諗法，如果你真係愛你既愛人，你就只會不怕虧底咁願意為對方付出。如果你或/及你先生還未有呢種思想，或者係你地既心未完全打開而已。
兩公婆之間既爭執，總唔會有絕對既雙赢，只會係一方或者雙方都作出讓步才可以解決問題而取得相對既雙赢(不輸便為赢，甚至輸亦為赢)。如果有咁樣既心理準備同質素，任何問題可以有可待解決既曙光。
例子：我同太太番工都累，番到屋企太太都有公司野要做，於是洗洗刮刮連煲水都係我做晒；間唔中太太無咁多野做，係屋企好得閑，我都情願自己做番晒洗洗刮刮既野，就連晾衫咁少事，因為條晾衫通我伸手就掂得到，我都費事太太又做唔慣，又要攞條晾衣竹舉下舉下咁辛苦，所以情願自己以正常速度做埋，好過太太用多兩倍既時間慢慢晾，情願佢有時間可以輕鬆休息下，唔使一得閑就去做家務。我因為自己做得好累而曾經嘈過，最後，每一次都係因為唔想太太辛苦而自己做番晒，習慣咗就好過啲。
少少個人意見以供參考。
希望可以幫到你啦。
