盜取家人資料去申請信用卡...急急急

1. 你阿哥用他人資料申請信用咭, 係犯咗<刑事罪行條例>第73條 - 使用虛假文書. 而佢用d信用卡買嘢, 佢就犯咗<盜竊罪條例>第17條 – “以欺騙手段取得財產” . 照經驗, 每條罪會判監10-12個月, 同期執行.

2. 由還押到判刑, 約需時5個月.

3. 如果佢認罪, 會判8-10個月. 佢應請律師代為求情. 無錢可申請法援.

4. 財務唔會答你.你只有問番佢欠幾多間財務同幾多錢.

5. 你應同財務講, 佢俾差佬拉咗, 而家揾唔到佢.

6. 佢係病態賭徒, 可以係求情理由之一. 但佢欠債就唔會影響判刑.

7. 佢真係坐監, 你應同財務講, 等佢出嚟先再追. 你同家人無義務代還. 財務搞你就報警.

8. 你唔可以代佢申請破產, 要佢自己搞. 佢在獄中可以自己申請, 獄中福利官會幫佢.

9. 如果判幾個月, 佢可寫信俾財務商量, 果幾個月唔還錢住, 等佢出番黎個陣時再還. 財務會接受.

10. 寫求情信無乜用. 因為佢偷阿媽資料, 係嚴重違反誠信. 真係要寫, 就要判刑前俾個官, 可由律師代交.

11. 法庭有中文同英文審訊, 睇個官係中國人定鬼佬. 你只係旁聽, 無得出聲, 聽唔聽得明只可睇彩數.

12. 你阿哥過堂後, 如果俾担保就可見啦. 如果還押, 你可去荔枝角收押所探佢.

13. 差佬會安排佢到裁判法院過堂, 由個官決定俾唔俾擔保. 因為佢偷阿媽資料, 阿媽係主要証人, 為防佢搔擾証人, 好大機會唔俾擔保. 咁就會被收押在荔枝角收押所, 直到判刑. 判刑後會轉去正式監獄服刑.

14. 有案底唔駛話俾公司知. 但佢突然番唔到工, 公司會炒佢.

15. 出番黎大把非專業工作可做, 例如侍應.

16. 無錯, 坐監係一定會俾人通櫃!