租住單位地台去水位無原無故湧出污物

本人剛租住旺角一套房才一個月多,最近發現廁所地台去水位無原無故湧出污水及穢物,前幾晚半夜訓覺更聽到渠面隔器被污水湧起........起身檢查之際順便在馬桶如廁繼而沖水, 竟然有水由地台去水位湧出。昱日立即call業主,佢叫我自己試下泵下先,但當晚試咗唔得,再call佢就無聽電話,因我怕萬一有日返工回來可能已經太遲,大家也想像得到,所以心急到要命,怕搞到成屋污煙障氣。

當然第二日就keep住搵業主想叫佢搵人嚟整, 但佢仲熄埋電話。留埋口訊都無回覆, 只是發生幾日, 間屋就已經好似公廁咁臭(因除咗隨時有污水及穢物之外,亦有臭氣由嗰度滲出), 試問邊可以接受唔盡快搞呢? 唔通唔食唔飲唔用廁所咩?! 咪唯有自己搵咗通渠師傅上嚟睇下咩事囉, 點知佢話整唔到,佢話佢認為唔關我單位事喎!!事關佢話如果我呢度單位塞咗既, 應該只會去唔到水, 唔會係由渠內倒灌出我地面咁話喎!!我又唔識,佢又話整唔到(佢都整咗好耐, 最終因整唔到都無收我錢),我咪唯有無計俾少少茶錢個師傅話:"由佢啦,唔該晒,辛苦晒!!"........好失望亦好憤怒, 最慘係無助。再call業住都係留言, 我照舊留言至今都未覆, 我只可以等??搬走??業主一日唔覆我咪一日都唔駛喺嗰度住? 成日湧污水滲臭氣點住人呀?!仲要成日去清理可能係人地既排泄物.......!!!!!我都認為唔會係我整塞坑渠既, 因為我成日洗完頭實會清理個垃圾隔器(例如頭髮之類,我又無煮食所以應該唔會有油脂等等)。唉, 總之真係好頭痛呀!!!!

其實我懷疑因為我個業主既另一單位(我隔離幾間既套房, 同一業住將一個大單位間開五間套房租出)最近裝修引致, 但都係我估者,業主唔出面我可以做到d咩呀????連依家係條渠邊部份出現問題都無人答到我呀,超級煩惱!呢幾晚都係去朋友度住先咋,各位網友或有經驗人仕,可否幫忙諗吓辦法呢,我好無奈........唔通要搬走?!未約滿喎!又搵唔到業主(我覺得佢專登唔聽我電話,我用過第二個電話搵佢,佢聽到我把聲就一係唔出聲,一係就收線。),佢好不負責任咁!我應該點做好呢?救命!!幾時先可以返屋企呀？!