我部canon G9 唔識用,請高手指點一下,多謝~

我既小小意見：

你提及既資料裏面，涉及兩方面既問題。

1. 器材問題。

1.1 毫無疑問，G9係一部好機。我用開DSLR(數碼單鏡反光相機)，但係用咗G9一陣都覺得好易用，用得好開心，講明個操作介面設計得好，便於操作。

1.2 G9像素高達1,210MP，仲高過好多DSLR；個解像度仲好高，4000x3000。但係因為佢塊CCD(等於菲林)面積較細，所以影出嚟既相片，放大嚟睇，隨時無CCD面積較大既DSLR靚，因為CCD既每個單位面積既解像細緻度差咗。

1.3 RAW格式既相片檔案其實係相機原始既相片資料，等同菲林，因為無經過壓縮處理成JPG等既相片，所以尺寸較大，保留既細節比較多，亦保留較大既寬容予拍攝者作相片後製調整。但係一般嚟講，如果你唔需要或者唔識做後製既話，一般都唔會用RAW。

1.4 但係好既操作介面設計、1210MP、4000x3000、RAW同靚相無直接間係，因為相機係死物，還要一定既攝影技術支援，否則再靚既相機都係影唔到好既相片。

2. 技術問題。

2.1 全自動唔係全能或萬能既，唔可以全面代替人既思想與判斷，更唔可以代替人既技術既發揮。如果全自動既判斷無法補救影相一刻既失利條件，技術上不加以補救，相片一樣會影得唔好。

2.2 假如你在路上行走、或者跑步、或者坐緊巴士，如果相機既光圈與快門既設定分別為F/2.8與1秒，你手持相機既時候，手震或相機機身既震動會令相片拍得唔清。呢個唔關相機器材質素既問題，而係拍攝條件不利既問題，或者係拍攝技術發揮得唔好既問題。

畢竟，相機係死物，只有懂得如何適當利用，先至可以影得好，或者如你所講，影得清。好多人都知道用DSLR可以影到靚相，但唔係好多人可以用DSLR影到靚相，因為佢地技術不足，DC都係一樣。

所以放心用部機啦，只係你可能要學習下一啲比較基本及簡單既攝影技術，或者可以幫你將啲相影得清啲。

希望可以幫到你啦。

2008-06-20 23:05:41 補充：
你搵時間睇晒本說明書就得架啦，呢個只係時間問題。

希望用你架新機用得開心如意啦。