德國於第二次世界大戰時的軍力, 軍團及番號

樓主問既一大堆問題如果要完全回答我要寫一本超過一千頁既書。而且由於呢度字數有限，所以我只講我記得既大概。

打波蘭同法國時德軍主要都分為A、B、C三個集團軍。波蘭戰役時既詳細戰鬥序列小弟唔記得左。而法國戰役時，C集團軍主要由步兵師組成，主要係防守馬其諾防線對面既地區監視法軍。本來平均分配係法國東北部，但後來經過A集團軍參謀長曼斯坦(Von Manstein，當時他是中將)改良作戰計畫後，由倫德斯特(Von Rundstedt)元帥領軍既A集團軍變成作戰主力，佢既核心部隊係古德林(Guderian)上將既第十九裝甲軍。係第二次色當(Sedan)戰役之後，第十九裝甲軍大破法軍，之後法軍兵敗如山倒，更迫使英國遠征軍丟盔棄甲走難返英國。

之後打俄國德軍分成三個集團軍。北方集團軍由李布(Leeb)元帥做司令，目標係列寧格勒(Leningrad)，即係依家既聖彼得堡(St.Petersburg)。中央集團軍最強大，由波克(Bock)元帥領軍，主力部隊係由古德林領軍既第二裝甲軍團，同由霍斯(Hoths)上將領軍既第三裝甲軍團，不過後尾古德林比希特勒炒左要提早退休，但隔左無幾耐又復出做裝甲兵總監，之後更做左一陣陸軍總參謀長。兩個軍團係蘇聯境內合作進行多次巨型鉗型包圍運動，對蘇聯各次驚人大勝利都主要由呢兩個軍團負責。南方集團軍由初時由倫德斯特做司令，主力部隊係由克萊斯特(Kleist)元帥領軍既第一裝甲軍團同由霍普納(Hoepner)上將領軍既第四裝甲軍團。除左上述部隊，南方集團軍仲包括後來係史達林格勒被全殲既第六軍團，司令係保盧斯(Paulus)元帥，仲包括由曼斯坦指揮並攻下克里米亞半島既第十一軍團。後來霍普納同霍斯調轉在部隊黎指揮，而南方集團軍亦因戰況改變而多次改組，首先曼斯坦倫德斯特做左司令，之後又分成A及B集團軍。之後好似係B集團軍又改名為頓河集團軍，司令一樣係曼斯坦。

其實東戰場後期主要靠曼斯坦領導既南方部隊抵抗蘇軍。曼斯坦的確係戰爭天材，史達林格勒戰役之後蘇軍幾個方面軍乘勝追擊，但係曼斯坦誘敵深入，重創范屠亭(Vatutin)轄下既裝甲部隊，並造成左庫斯克突出部，直接導致後來既庫斯克會戰。另外係軍團一級既指揮體系中，主要係靠霍斯既第四裝甲軍團做機動打擊，霍斯優良既指揮令蘇軍反攻嚴重受創，但係由於霍斯係庫斯克會戰既南線打得唔好，後尾被炒，之後就無再係軍隊服務。而北線第九軍團司令摩德爾(Model)元帥亦係東線既核心大將，佢經常四週圍去指揮抵抗蘇軍既作戰。後尾摩德爾去左西線做B集團軍司令，抵抗盟軍入侵，但兵敗後佢自殺身亡。曼斯坦係東戰場打到尾，由於當時東線既最高層指揮根本完全出於佢手，所以有好多人，包括古德林同隆美爾都同意由曼斯坦出任東線戰場總司令，但係希特勒驚佢功高震主而否決。

隆美爾係戰前已經因為出版在“步兵攻擊”呢本書而薄有名氣。希特勒掌權時係近衛隊司令，後來希特勒破格比佢指揮第七裝甲師，係霍斯旗下作戰，第七師後來成為德軍前進得最快既部隊。之後隆美爾奉命帶三個師去北非幫兵敗如山倒既意大利人，本來呢三個師只係叫非洲軍，但後來被升格為非洲軍團。隆美爾靠靈活既戰術打到英國人要係尼羅河背水一戰。但由於德軍無地中海既制海同制空權，所以後來非洲軍團且戰且退去到突尼西亞。後來佢病好左之後做左B集團軍司令(摩德爾既前任)，本來佢既部署可以有效抗擊盟軍登陸，但因無被採納而令盟軍成功開闢第二戰場。隆美爾最後因被懷疑牽涉行刺希特勒既陰謀而被處決。

黨衛軍係德國軍事機器既精銳。佢地有好多個師，每個師都有個名。出名啲既包括，第一SS叫希特勒禦旗師，首任師長係狄特里希(Dietrich)，佢既部隊本來係希特勒既近衛隊，後來佢做左一級上將，而近衛隊亦被擴充成師。第二SS叫帝國師，首任師長豪賽爾(Hausser)係一場戰役中被打盲左眼，後來佢升任二級上將。第二SS叫骷髏師。呢三個師係庫斯克被合組成黨衛裝甲軍，由豪賽爾做司令。第四SS叫警察師，因為成員打仗前多數係警察。第五SS叫維京師，第九SS叫何亨索倫師，係為左紀念德國皇室何亨索倫家族，呢個師有咁巴閉既名梗係勇悍既部隊，佢係後期打得好好。後來又有一個主要由青少年組成既第十二SS希特勒青年師。至於大德意志師就唔係黨衛軍部隊，係正規陸軍既部隊。一般德國陸軍師級部隊既人員都來自同一地區，但大德意志師既人就來自全德各地，係全軍既精英。另外有一個部隊想講幾句，佢就係裝甲教導師。呢個師係德軍後期由德國裝甲兵學校既教官組成，質素特別高，而佢既師長拜爾林(Bayerlein)中將就更係傳奇人物。佢係隆美爾既非洲軍團同古德林既第二裝甲軍團做過參謀長，係少數既德軍高級將領同時有西線及東線既作戰經驗。而且佢仲要唔係做二打六，而係兩個戰場中核心大部隊既關鍵職位，可想而知佢既能力幾高。不過即使係裝甲教導師同拜爾林都無法扭轉德國戰敗既命運。

问题太多，太大。难以回答。