✔ 最佳答案
你個缸31cm x 19cm x 26cm，容量 15L，當你有沙／泥底或裝飾物，減埋水位唔到缸頂，得返 14L。如果你要養４－６條魚，取下限４條，根據 1L 水養 1cm 長o既魚呢個參考數字，可以養 4-5 條 3cm 長o既魚。
o係你初買魚時，要記住：買乜都好，搵左資料先。你今次有問魚o既習性，咁有冇諗過魚o既最大體長？魚街好多魚都係ｂｂ，如黑裙你買時係 2cm，但我屋企o既o個ｄ全長可以去到 5cm。鼠魚買時又係 2cm，但長大可以去到 6cm 以上。所以買o既時候已經要預計埋日後條魚長大夠唔夠位。
而「超養」唔係只係有缺氧可能（缺氧咪用氣泵打氣囉），更重要o既係魚大／多都會令屎尿多，過濾系統負荷就大。太多魚的話，就當你氣泵狂打氣，水質一變壞會變得好快，過濾系統處理唔切，就會大量死魚。
以每條最大約 3cm 去諗，咁就易諗好多。以下o既魚都係性格溫和o既：
－孔雀
－米奇／ｍｏｏｎ
－各式燈魚
但要留意，前兩種都係會直接生魚仔o既卵胎生魚，好易生，生左出o黎你養大佢，就會太多魚架啦。
以上三種魚都唔貴，打袋廿蚊一袋有幾條架啦。
燈魚都係來自水質偏酸o既河流，所以養燈魚會用泥底，令水保持酸性，而孔雀就要偏鹼水，所以一般唔會同缸。
基本上揀魚混養，都係得幾個原則：
１．大小相近（如上述）
２．水質要求相近（要偏鹼性水o既唔多，多數見到都係孔雀、黑摩利；但其實如果用中性水養，乜魚都ｏｋ架，只係去唔到最安定、體質最佳狀態，冇咁易繁殖）
３．侵略性相近（最簡單都係避免惡魚，如小王子、藍斑馬等）
至於「清道夫」，咁就有排講啦。我養o黎清理缸中沉到缸底o既剩糧，或者食下青苔／藻類o既魚類，我地一般統稱為「工作魚」。
剩糧：
鼠魚，常見o既有藍印鼠、黃翅珍珠鼠、白老鼠等（約＄２０對）。
留意市面好多魚都冠以一個「鼠」字，但係其中有ｄ魚三間鼠、Ｙ紋鼠等，個樣係生成另一個嘜頭o既，呢類唔係鼠，係?（catfish）科o既，唔係佢地唔食剩糧，但佢地仲會挖土，仲好多都好大條，三間鼠就可以去到成尺！鼠魚最大就若三寸。
青苔／藻：
簡單地講，所有嘴成吸盤狀o既都得，最小型o既係小精靈（＄２０四條），兩寸左右，出名效率高，但不少玩家都養唔長。另一好選擇係小鬍子（最小型o既琵琶品種，近＄４０一條），最大四寸樓下。其他琵琶有ｄ係可以大到龍吐珠同缸o既（如街邊一盆＄１０大大條o個ｄ），唔好貪平！有ｄ係效率唔高o既（如所謂「隱型戰機／ｆ１１７」），唔好亂買！
金清苔、清道夫（同種，後者係原種）體型可以有近四寸；飛狐比較大或有破壞性／有食糧食時唔食藻，我諗你個缸唔適宜。
咁你想要乜野功能o既工作魚？係唔係真係要？要幾多條？以你個缸o既大小，我諗最多兩條。
