潛水泵係唔係有兩種??

圖一o既泵其實係將水由花籃o個邊抽起，將向膠管方向推走。膠管可以接上膠喉，而個泵可以加上吸盤。由於入水口個嘴係專門俾花籃個圈用，應該唔可以接喉，但你可以成個泵放入水度抽水，咁都一樣o者（除非你要抽水o既缸好細；如果係咁不如用手動泵仲好啦）。
佢o既主要用途有：
１．加膠喉，作換水時抽水用；
２．o係魚缸內造水流，尤其係大型魚缸，可以o係水流慢o既角落吸左佢o係玻璃度。花藍o既作用就係防止魚毛蝦仔被吸入。
圖二冇入水管口，由疏隙入o既水就會被泵上向上o既出水口。當然可以用o黎作換水或造流用（因為都有吸盤同魚仔冇法入o既加網隙縫），但佢有一個圖一泵做唔到o既用途：
作假滴漏吸水用。
假滴漏係o係缸間開一角，上面疏隙，水上到一個特定水位，就從疏隙流入假滴漏，經過濾材之後，就由泵抽返出缸，係一個又平又簡單、仲去到油膜o既設計。
由於假滴漏一定比較窄（因為佔用缸內空間），圖一o既泵一頭出一頭入比較阻地方；呢種泵就唔同，放滴漏格底接上膠喉上返頂再入缸，比較好用。

2008-05-31 23:24:48 補充：
夾硬套膠喉上花籃，如果你搵到條喉咁o岩 fit 到唔係唔得o既。但呢個泵仔夠唔夠力抽水上我就唔知啦。

2008-06-01 23:28:04 補充：
水裏面o既硝化菌唔多，反而如果用舊缸泥底或濾材唔掉照用返，裏面o既菌先多。

硝化菌水唔駛買，開缸用過一次後都唔知幾時先會再用。有舊濾材同泥底夠哂。

過濾個水泵流量應該要係魚缸容量五六倍，因為流量數字係冇濾材時只計個泵泵水速度，加左濾材後會少左。

暖管火數其實可以根據盒面一個表，睇住一個火數適合最多幾多水o既缸用。我相信你要用２５－５０ｗ。幾耐先同溫度好在乎水流，因為只係暖管附近o既水先受熱，如果靠哂對流有排先得，所以個缸水流冇死位好重要。