點養熊仔鼠~~

A.養熊仔鼠其實基本既野同其他鼠都係一樣,只係要留意用既用品需要較大就可以了
平日養鼠要留意既事:
1)每日換水,並檢查水樽係咪真係出到水同會唔會漏水
2)食物要有足夠既份量,多d都唔緊要,鼠鼠係知飽既.最好放多d,多d食物先令鼠鼠有安全感,一般乾糧可以耐d先換
3)糧食方面只要俾鼠混合糧同草就可以了,好多人既食物都係唔適合鼠鼠既,甚至蔬果我都覺得唔好,原因可參考以下我回答既知識:http://hk.knowledge.yahoo.com/question/?qid=7008010505053
4)一星期用沖涼粉沖一次涼,真係太熱太臭最多都係兩次,有病先例外.唔好用水同鼠鼠沖涼
5)一星期大洗籠一次,平日覺污糟都可以打掃一下,鼠鼠多數排泄得好集中,打掃排泄開既位置同佢訓既位置就已經好好多(因為鼠鼠用排泄物去表示呢個係自己地頭,所以訓既地方都會排泄)
6)唔好用有味or有色既木糠,最好買d冇咁碎既.有味既木糠加埋鼠鼠既排泄物係好臭既,有色就可能會甩色,碎既木糠就易影響鼠鼠呼吸道.以甘既都易令鼠鼠敏感.
7)個籠一定要安全,唔會有野整親鼠鼠,唔好用一間間好通風既轉輪同地板,好易卡住鼠鼠隻腳.
8)鼠鼠好叻走佬,留意有冇咩位鼠鼠會走到
9)鼠鼠怕凍,更怕熱,凍同熱都要為鼠鼠保暖or解暑
10)好緊要既係,平日多d留意鼠鼠既身體同排泄物,有咩異常就可能係有病
11)鼠鼠既牙係不斷生長,所以要有野俾鼠鼠磨牙,唔磨牙既話,d牙會插穿鼠鼠,令鼠鼠死亡,如果你隻鼠唔咬磨牙石,就可以買一d木制玩具俾佢咬(磨埋爪都得),又或可以試下鹽磚
12)除左轉輪,鼠鼠玩既玩具最好係鼠鼠專用既木制玩具,因為自己整既木易有刺,可以俾鼠鼠爬唻爬去,鑽唻鑽去既就多數都會玩
13)鼠鼠買返唻既初時,頭兩日唔好打擾佢,再試下以下方法同鼠鼠建立關係:(耐左都同鼠鼠唔熟,都可以試下做)
a)你可以隔住個籠叫多d佢,在籠邊拎d野食引佢埋唻(主要係想有食物袋既聲音俾佢聽到),唔一定要拎零食引佢,拎主糧入面既野食都ok架啦,唔食零食會健康d.日日叫佢都有野食既話,佢好快就會記得你把聲or裝食物既袋既聲音,我覺得鼠鼠認食物袋既聲比較快.
b)等到你地熟d,做到你一行過佢就行埋唻or冇咁驚你,之後你可以試下伸隻手入籠隻俾野佢食
c)再熟d再試下俾野佢食既摸下佢頭or身
d)佢都唔抗拒之後,可將食物放在手心,等佢行上唻食,慢慢佢會習慣左你既手
e)再熟d就可以抱佢,抱既時候唔好忽然由頭or從後抱起佢,咁會令鼠鼠以為有敵人攻擊,最好慢慢叫住佢先抱佢,如果抱唔到,可以用乾淨既杯唻俾佢上去咁樣抱,抱之前記得先輕聲叫下鼠鼠先

如果係養長毛熊仔鼠,則要另外留意以下既問題:
1)倉鼠本身係獨居動物,而熊仔鼠比其他品種既鼠更早會攻擊同類,所以買既時候要檢查清楚有冇受傷.雖然買咩鼠都要睇真d,但熊仔鼠係打得特別勁既,連寵物度都好難話一個地方放好多隻.放到都受傷不淺,之前我去買熊仔鼠就見到好多好多都係咁
2) 因為熊仔鼠好大隻,所以所需空間都比較大,空間太小會令鼠鼠有壓力既.而轉輪都要大d,唔係大左就玩唔到架啦
3)有d人會覺得細隻既鼠得意d,隻鼠大大下就會冇咁鍾意,所以要諗清楚係咪真係鍾意大大隻既熊仔鼠
4)熊仔鼠我覺得係最怕人既,我一向都係養熊仔鼠多,有時熊仔鼠既牙掂到我,佢都會即時彈開.熊仔鼠咁細膽,所以佢驚你既時候就唔好勉強佢,但我覺得都好快熟到既
5)長毛熊仔鼠就要留意多一樣,就係打理佢既毛,最好當然係日日同佢梳,最耐都要一星期梳一次,可以買一d小動物用既梳同佢梳,又或用牙刷都可以,如果耐左先梳,d毛就好易打晒結,咁就好麻煩,解結除左難之外,仲會好易整痛鼠鼠
6)可能因長毛既關係,換毛時會較明顯見到d毛飛出籠,但唔會十分多,畢竟鼠鼠大極都算細,但留意唔好因為呢d毛而誤以為鼠鼠有皮膚病,鼠鼠甩毛甩到見到肉先係皮膚病
7)長毛熊仔鼠近尾既毛好易會俾自己既排泄物痴住同整濕,要特別注意衛生問題,唔係就易甩毛or因為整住排泄物而生粒粒
8)我自己未養過長毛熊仔鼠,我自己較怕打理動物既毛,但我叔就有養過,佢有少少鼻敏感,養既時候鼻就較辛苦,不過呢樣個個人應該唔同吧

B.好抱歉知道你既鼠唔夠一日就死左,不過只係咁講就好難了解到係咩原因,主要可以睇返會唔會隻鼠買返唻就有病?會唔會唔係一籠一鼠?會唔會有濕尾or肚濕等嚴重疾病?

想買一隻健康既鼠,詳細揀鼠時要留意事項可參考以下我回答既知識:
http://hk.knowledge.yahoo.com/question?qid=7008021601255

熊仔鼠係獨居士
所以只能夠單獨養
將兩隻或以上放埋一齊養
一定會打交 直至死剩一隻

其它跟一般養鼠養法一樣

用心,用手,用愛就得架啦