去殯儀館至火化等事

出殯當日整個過程﹕
坐夜和出殯兩日多數會o係唔同嘅靈堂進行。出殯當日﹐家屬先到坐夜當晚的靈堂集合﹐上服後由殯儀館職員將遺體移送舉行大殮儀式嘅靈堂﹐家屬亦跟隨往大殮的靈堂。

殯儀館職員將遺體停放停屍間﹐家屬抵達靈堂後可take the time打點一下靈堂佈置﹑摺金銀﹑化寶。金銀盡量o係坐夜當晚燒多d﹐唔建議留太多於出殯日摺/化﹔因為距離大殮儀式唔長(大約只有半小時左右)﹐摺得多未必化得晒﹐留2疊慢慢摺就夠。

殯儀館職員安排好棺木後﹐家屬將準備好嘅陪葬品﹑先人生前嘅衣物﹑飾物等交予職員。記得要預留兩條新金銀“攝”棺材﹐亦於此時交給職員。

先人升棺後﹐靈柩停放o係靈堂正中﹐大殮儀式隨時開始。由法師帶領儀式及瞻仰遺容﹐然後蓋棺﹐注意法師講邊幾個生肖蓋棺時要迴避﹐避免相沖。

蓋棺完成﹐你男朋友如果係長子的話﹐要負責引領伯母去火葬場﹐所以佢會坐靈車上山。其他親友由殯儀館安排的旅遊巴送上山。

抵達火葬場後﹐法師領眾人再做多一次儀式﹐最後由家屬(一般係長子)按掣將靈柩送入火化。如果係即日脫服嘅話﹐靈柩送入火化後由法師主持脫服。步出靈堂時記得唔好望返轉頭﹐於通道旁嘅水盤濕濕手(濕完唔好fing﹐咁係唔禮貌)﹐領紅利是﹐上靈車離開火葬場往英雄﹐不出席的親友可於抵達後自行離去。

你可以點幫手?
出殯當日親友好少幫手摺金銀﹐因為預留嘅金銀唔多﹑時間又少﹐多數係家屬自己o係焚化爐邊摺邊燒。如果你男朋友d親戚圍埋一齊摺金銀﹐你先幫手囉... 都係o個句啦﹐摺得多燒唔晒都係嘥

出殯當日可以幫手嘅野真係唔多﹐如果你男朋友屋企人唔介意﹐你可以幫手睇住d袋o個d...

你要準備既野﹕
穿素色衫。花圈唔一定要送﹐要送都係坐夜o個晚送﹐出殯o個日個花圈擺一個鐘頭左右就拎去掉﹐送黎冇乜意思

你可以既送花圈又做帛金﹐亦可以只做其中一樣

個人認為﹐二揀一的話﹐做帛金好過送花圈。靚靚哋嘅花圈上千蚊一個﹐只係擺兩日一夜冇乜實際作用﹐倒不如將d錢做帛金﹐實實際際為伯母嘅喪禮出點“力”。帛金做501已經唔少﹐亦都適合你嘅身份。

佢屋企人唔知你中文名唔緊要﹐記住你係盡點心唔係拎credit。只要伯母知係你就得喇(你寫中文名佢有靈通都會知係你)﹐其他人知唔知係你送唔係問題﹐要保持依個心囉!

如果坐夜當晚不能出席﹐你大約下午2-3點打電話去花檔﹐留低中文姓名﹐講明你係個仔嘅朋友﹐請佢為伯母做個花圈﹐職員識得幫你寫架喇! 不過你要事先問明邊間可以o係電話用credit card過數﹐唔係間間都得。

你用個白信封裝住帛金﹐o係正中間寫“奠儀 XXXX伯母千古”﹐左下角﹕“XXX敬輓”﹐如下﹕

奠
儀

黃
李
小
玲
伯
母
千
古

陳
大
文
敬
輓

到靈堂致祭時﹐你會o係receipt留名及呈上帛金﹐所以即使寫中文名你男朋友屋企人亦會知你係邊個。