急!!! 樣魚的問題,20點

魚係生物，所以點都會死；但既然係生物，突然死亡o既原因就有路捉。
由你o既問題，可以知你養左冇幾耐，我引用一個我o既舊答案〔http://hk.knowledge.yahoo.com/question/question?qid=7007100802243〕，可以答到你大部份問題，大致分為幾類：
＝　＝　＝　＝　＝　＝　＝　＝　＝
１．新魚入缸
新手大忌係立亂買魚，唔知魚性結果買埋藍斑馬、小王子呢ｄ惡魚；九角龍呢類食魚仔o既魚；仲有會大到成尺長o既琵琶。買魚前研究清楚，可以去討論區問下人，或上網／睇書搵下資料，千祈唔好問售貨員，多數撞板。
仲有，唔好貪得意，又買ｄ龍蝦、龜、蠑螈入缸。魚還魚，蝦就要買水草蝦，幾蚊包o個ｄ蝦有對大鉗，會捉魚食架！亦唔好買紅白色靚蝦養，一來貴，二來被魚啄你就揼心口啦。
另外就係買左病魚。新魚有病，會搞到成缸瘟疫，所以買魚要揀清楚，摺埋鰭／尾，同缸有死／病，身上有爛尾／鰭／白點／一舊發霉狀白色物體／身上一片白左色／魚眼浮腫，都要忍手唔好要。
另外，唔好貪平買袋裝魚。袋裝魚一般死亡率高，因為你唔知佢入左袋幾耐，剛入袋都可能係一有貨到就即入，舟車勞頓，身體係會差ｄ。所以最好唔好買袋裝魚，特別係個袋冇乜氣，水唔清，魚唔精神o個ｄ。
買左後，要原袋放入缸五至十分鐘，等袋中水溫同魚缸水一樣。呢個步驟叫做對溫。
然後，可以先倒去袋中部份o既水（如倒到剩返四份一袋，但當然要視乎袋size 同魚o既數目），再慢慢加入魚缸水，加完隔五分鐘再加ｄ，等魚適應魚缸水質。呢個步驟叫做對水。加到係原袋水o既約三倍，然後將魚撈出入缸，袋水唔要，以免有病菌。
２．魚缸環境
不應超養，一升水約養長度 1cm o既魚，因為魚o既屎尿都係有氮化物如阿摩尼亞，呢ｄ係有毒物質，水多就可以稀釋，但魚多的話，濃度就會增加得快，高到一個水平就會毒死魚。所以超養真係有性命危險。
濾水器要有生物環同生化棉，因為呢ｄ濾材有大o既表面面積俾硝化菌附著。硝化菌會將水中o既阿摩尼亞變成冇咁強毒性o既硝酸鹽，所以濾水器容納o既生物環愈多愈好，等硝化系統多ｄ菌住o係度。
濾水器o既作用，係用泵不斷將水泵過濾材，等硝化菌不斷處理廢料，最少一個鐘將全缸水循環六次。
新缸其實入水後要任由運作濾水器運作一斷時間先會培養到足夠硝化菌，開始時只加一兩條魚，等佢地o既大小二便俾食物硝化菌，一兩個星期後，ｄ魚唔死，就表示硝化菌數量足夠，然後先可以慢慢逐少加魚。
３．日常管理
其他裝備，最基本係氣泵同氣石啦；怕停電，可以買乾濕兩用o個ｄ。仲有一盞燈，方便自己睇魚嘛，但唔好開足廿四小時，因為魚都要分日夜，要俾佢有得訓。冬天或者夏天冷氣開得勁的話，要有暖管，將水溫維持約廿五六度－－咁即係要有個溫度計啦。
平日管理，換水一星期最少一次，如上所述，要養水。大缸養唔到咁多水，你咁細個缸就唔好懶啦。每次換水量為一半至三份一缸。重點係集中吸缸底ｄ屎／屎粉。可以買一個手動泵去吸。換水時可以將過濾器o既濾材用抽出o既水沖一沖，等ｄ大粒o既垃圾清走即可，千萬唔好用水喉水，因為氯氣殺菌。白濾棉唔一定要換，黑哂先多菌呀！一樣用舊水沖下就得啦。 夏天天氣熱，缸唔好放o係太陽晒到o既地方，除左生青苔之外，會煲魚湯。注意水溫，如果到３０ｃ就要買個夾缸邊o既風扇４５度角吹住水面降溫。
餵魚一日一次夠啦，放糧要三分鐘食得哂為準，少少餓唔會死，多多糧食唔完會爛，食得哂就狂痾，都會令水質差。要留意魚有冇我上面講揀魚時o個ｄ癥狀，有的話要用細缸隔離，用藥。
＝　＝　＝　＝　＝　＝　＝　＝　＝
引用完畢。以上所講都係一ｄ基本野，但由於你冇將個缸o既詳細情況講出，如有乜設備同死魚前做過ｄ乜、死魚有冇病癥，所以冇法子明確指出有冇問題。如過量加鹽、用藥都可以死魚。

養魚要注意幾方面:
1) 水
- 要養水,放d水係室內一至兩日除氯氣就得
- 買左魚返黎唔好立即放入缸,要對水,平衡魚缸內同袋內既水溫
- 每一至兩星期換水一次,每次換1/3至1/4既水,保持清潔
- 水質要經常保持清潔
- 唔同魚對水既ph同水溫都唔同,所以要留意自己養咩魚,要改變水既
ph同水溫(可能要買暖管)

2) 濾水器
- 濾水器既濾材要經常保持清潔,建議一見污糟就好洗下佢
- 濾水器既濾水量 (L/hr) 要同魚缸既水容量有好既關係,姐係好似一個大魚缸,每小時既濾水量就要大d
- 濾水器必須加入生物環,生物環有助養細菌,對魚、蝦等有益無害

3) 燈
- 市面上有d叫殺菌燈,可以既話最好買黎裝落魚缸,對殺菌有幫助

4) 魚缸
- 魚缸可能會生藻,建議一至兩個月洗洗
- 魚缸既大小要留意,太細而養得太多魚既話,會有缸氧問題,會有大量魚類死亡
- 散買魚缸最好少買彎角,因為好多魚友都話好易裂
- 套缸既濾水器一般係頂濾,頂濾既濾水能力唔夠強,所以水質未必清潔,建議散買魚缸較好,可以自行選擇想用既牌子

5) 藥物
- 水質差,魚就生病,有病時要有藥物去醫治佢地,e.g.魚快治
- 將水溫提升,再加食用鹽落水,有助殺菌
- 黃粉亦有殺菌功用

6) 買魚
- 留意魚身有無白點
- 看看魚既活動流不流暢、是否自然等等

7) 喂糧
- 糧食有紅蟲、魚糧、生坑蝦及魚等等
- 喂糧時注意唔好喂過量,多出既糧留係缸內會令水質變差,魚會死亡
- 建議喂少好過喂多

魚會幾時死?
魚死會因有病、缸氧、過飽/過餓等等而死~
- 病:
白點病
生蟲.........
- 缸氧:
魚缸養過量魚類,氧氣不足.....
- 過飽/過餓:
喂過量或沒有餵食

你無比你魚缸既資料我,
好難話你知佢點解會死
同埋佢死時身體既情況、有養既魚類品種~
因為有魚可能有地域性,
會打其他魚
有可能因為生白點,
你無落藥令佢死~
又可能真係缸氧而死~

同學''養魚點可能話唔死呢!所有動物都會死啦!如果可似養唔死賣魚的人都要收襠啦!祇可似話養到它不很快死己經很叻啦!多留意它的動態!請記著魚有飽死:無餓死的!所似不要餵太飽每日約1至2次小量就可似了!每次換水一定加粗鹽約1至2湯更!要看你的缸大小!因為鹽是有礦物質和殺菌作用的!點解會死?患病傳染就會死啦!見魚反帶態帶磨擦身體!不肯進食就是發病初期!要拿它到另一細缸落救魚葯浸一到二小時!平時多留意水質和魚的動態!不要給病菌傳播!就很少死亡的!希望幫到你啦!!