! 中國童謠

　　　　雞公仔

雞公仔，尾彎彎，做人新抱甚艱難！

早早起身都話晏，眼淚唔乾入下間，

下間有個冬瓜仔，問安人老爺煮定蒸，

安人又話煮，老爺又話蒸，蒸蒸煮煮唔中安人老爺意，

大把拉鹽又話淡，手甲挑鹽又話鹹，

三朝打爛三條夾木棍，四朝跪爛四條裙！

咁好花裙俾你跪爛，咁好石頭俾你跪崩！

橫又難，直又難，

不如捨命落陰間！

人話陰間條路好，我話陰間條路好艱難！

　　月光光

月光光，照地堂，

年卅晚，摘檳榔，

檳榔香，嫁二娘，

二娘頭髮未曾長；

長得二年梳大髻，

吹吹打打做新娘。

噯姑乖

噯！噯！噯！

噯姑乖，噯姑大；

噯姑大0黎嫁後街。

後街有咩賣？

有鮮魚鮮肉賣。

鮮花戴，戴唔晒，

掉落床頭俾貓拉。

拉去邊？拉去大新街。

　　　西園菱角

西園菱角兩頭尖，菱角落塘擺八仙。

八仙擺落珍珠粒，珍珠擺落繡珠蓮；

菱角紅還著綠，

金橘著青李著黃，

金橘子重大過菠蘿漢，

今晚慈菇坐歌堂；

三更鼓，閂閘時，

龍眼過園偷荔枝；

菱角擔*槍來打你，

嚇得油柑碌墮地；

白欖聽得嫌熱氣，

香椽煮錯賴黃皮。

　　　姑丈擔凳

姑丈擔凳孩兒坐，孩兒坐落就湯*雞。

雞會在門前喔喔啼，

不如湯隻鴨；

鴨又嫌鴨毛多，

不如湯隻鵝。

鵝又嫌鵝頸長，

不如湯隻羊；

羊又嫌羊腳叉，

不如湯隻馬。

馬又會送加出步頭，

不如湯隻牛；

牛會耕田養人口，

不如湯隻狗。

狗會東西方有人來都知，

不如湯隻大貓兒；

貓兒又會捉老鼠，

不如湯隻大肥豬。

肥豬會食主人三斗祿，

主人食佢三塊肥豬肉。

　　金欖核

金欖核，兩頭尖，

大哥留妹過新年，

留來留去留唔住，

一頂花轎到門邊；

大哥打辦紅羅傘，

二哥打辦金鳳針，

胭脂水粉三哥買，

腳著花鞋四哥裝，

五哥便買廣州箱，

綠檯綠椅六哥裝，

七哥便買潮州槓，

八哥便買象牙床，

九哥便買猴子箱；

十個阿哥，十個阿嫂，

十個兵馬伴姑娘，

行到橋頭燒坎砲，

誰人嫁女最英雄！