合資有限公司被追債

即使你事實上無再參與間公司的運作，但如果你並無即時辭去董事的職務，係法律上你依然要為呢間公司所產生的問題負上責任。舉個例子，如果你個朋友用公司黎做左些犯法的事，警察一樣會因為你係公司董事照拉你，唔會因為你口講話無參與而放過你，因為係法律上你仍然係公司董事，你無辦法證明你真係無參與。

在你的情況下雖然欠款的是公司，由於我以上講過董事依然要為公司所產生的問題負上責任，我所講的責任並唔係話要你私人承擔左呢筆債務，因為有限公司的董事及股東是無需承擔公司債務的，但作為公司董事你係有責任了解公司的財務狀況及向公司的債權人清楚作出交代的，因此在這種情況下，收數公司代表債權人聯絡你是無可厚非的，對方只要並無向你作出任何恐嚇或要脅的情況下聯絡你係無問題的，你就算報警都無用。

當然如果對方做了一些違法的事，例如恐嚇你必須立即報警，又或者從不正當途徑取得你的個人資料，則你可以向私隱專員公署投訴，但如果你的個人資料是由債權人提供的就無問題了。

1. 即使文件唔係你簽，只要你一日仲係公司董事收數公司依然會搵你。你試想想，如果一間公司有十個八個董事，唔通份份文件都要全部董事簽晒名先生效咩？只要簽名的人是公司授權的就係代表公司承認了；

2. 如果有限公司無力清還欠款，一了百了的做法係將間公司清盤，咁就無人會繼續追你數，但咁做要洗筆錢，你自己衡量下值唔值得。又或者你可以斬腳趾避沙蟲，斷絕晒所有舊的聯絡資料，即係改晒電話搬埋屋，不過呢過係比較消極的做法；

3. 你可以同收數公司解釋下你情況，同埋承諾會搵你朋友直接同佢地解決呢件事，不過唔代表佢地唔會再搵你，因為你無法證明你無參與公司運作，事實上好多人爭錢唔還都會話唔關佢事，咁點知你講真定係老作唔想還錢？但解釋左有個好處，就係對方唔會迫得你咁緊，你唔覆佢佢就一日打10次電話俾你，你講完之後由於你有承諾俾佢，佢可能幾日或者一個禮拜先搵你一次都唔定；

4. 你應該立即搵你朋友三口六面傾下點解決間公司的問題：
I. 如果公司真係無辦法繼續營運落去，就商量下好唔好即刻搞清盤；
II. 如果公司只係暫時的財政困難，叫你朋友唔好避，應該同收數公司傾下點解決呢筆數，否則收數公司搵唔到你朋友就一定會繼續搵你。你叫你朋友可以要求分期慢慢還，如果要求唔係太過份的話，通常收數公司都會接受方案，只要定時定候俾錢，收數公司就唔會再搵你；
III. 如果你朋友明知麻煩到你都唔肯去搵收數公司傾，咁佢都唔係點當你係朋友，咁無辦法之下你唯有做D野黎保護自己，就係將你朋友的聯絡資料話晒俾收數公司聽，轉移視線叫佢地即接追你朋友，至於係咪咁做你自己衡量下啦；
IV. 你即刻要辭去董事的職務，咁間公司以後再欠其他人錢就唔關你事；
V. 最後就係轉走埋你的股份，咁就一了百了，間公司以後發生乜事就同你無任何關係。

至於你話以後唔敢再同人合作搞公司，我又覺得唔使咁灰既，最主要係你唔做之前一定解決晒所有野先走，千祈唔好話信晒對方囉，你留低條尾係度始終唔係咁妥當，因為你無參與公司運作根本唔知間公司係度搞緊乜，又唔知間公司幾時會出現問題，更甚者牽涉到一些刑事責任仲會隨時無端端惹官非添。

1. 公司欠債係追公司，不過市面上有不良份子，如果構成滋擾，你可以報警。
2. 同上。
3. 你要搞清楚退出時有無辭董事，無就跟返。你唔使同收數公司解釋，因為講都無用。
4. 儘快搞好退股，搵番律師/會計師樓啦！
希望幫到你！