用緊300D, 想買新鏡(旅行用)~(急~)

300D的套裝鏡應該唔係EF-S 18-55mm f3.5-5.6 IS, 而係冇防震的EF-S 18-55mm f3.5-5.6.
你其實覺得支鏡有乜唔好呢?佢一樣可以影人,影寵物影景同旅行用.係覺得光圈唔夠大?冇防震定係焦距唔夠用呢?你要理解唔可能一支鏡就樣樣都咁完善,就算有都一定超貴.
首先分析下你揀嗰幾支鏡.
EF-S 17-85mm f4-5.6 IS USM其實幾好用的,尤其旅行用,因為焦距實用,有防震,去旅行如果要求唔係好高可以唔帶腳架,直接手持影室內或者夜景.但係佢光圈比較細,你想玩前清後矇的淺景深人像效果就唔係好出.而且支鏡應該要超過4千蚊,會超出你預算.
我建議如果淨係想要防震,就不如買新出有防震既EF-S 18-55mm f3.5-5.6 IS,只要千幾蚊,一樣啱旅行用,只係焦距同你而家嗰支一樣.光學質素都差唔多
至於28-105mm或者28-135mm兩支都唔建議,因為300D有1.6倍焦距增長,配呢兩支鏡廣角焦距變咗44.6mm,非常之唔夠廣角,仲衰過DC仔,變咗唔可以一鏡走天涯.
如果你係嫌焦距唔夠用,可以考慮Sigma 18-200mm f3.5-6.3 DC OS,短中距包晒唔駛換鏡,又有防震,啱晒旅行用,三千五蚊左右,會超出小小預算.光圈都係細架喇,但焦距夠長,唔拍麻煩走遠啲都可以玩下淺景深人像.效果當然冇定焦鏡咁好,仲可以離遠偷影下寵物,不過由於光圈細,對焦慢,對於走來走去既寵物都唔係好得,只可以等佢坐定定先影.光學質素同你現在支鏡都係差唔多
如果要大光圈就可以考慮下Tamron 17-50mm f2.8,用到50mm f2.8如果影半身人像淺景深效果都唔錯的,不過就冇咗防震,去旅行就要帶腳架或者光線夠先影.光學質素會好過你現在支鏡
如果唔介意多支鏡,可以考慮買一支Canon 50mm f1.8,只要六百幾蚊,光學質素好,光圈又夠大影人像淺景深.又唔駛走到冇雷公咁遠影.如果只係加支18-55mm f3.5-5.6 IS應該在你預算內.
最後就係增加預算買Canon 17-55mm f2.8 IS USM,光學質素好,大光圈,防震,超聲波對焦乜都齊,除咗淺景深唔夠50mm f1.8效果明顯同埋焦距比較短之外,在佢火力範圍都好難搵到咁完善既鏡頭,不過就貴啲要六千幾蚊.
以下網頁有鏡頭價錢.
http://www.ygdragon.net/