我想問親人(爸爸)死後多久才舉辦葬禮

死後多久才舉辦葬禮?
古人以為人死後三日內仍有機會復活﹐所以會停柩三日﹐確定冇復生機會才出殯。後來d人認為人死後頭七天唔知道自己死左﹐所以會o係第七日後出殯

現代嘅香港人安排先人出殯日期主要depends on幾時出到死亡證﹑book唔book到靈堂﹑排唔排到爐位(火葬)。如死因無可疑﹐最遲1週內會發出死亡證

死亡登記﹑土葬/火葬等安排請參閱以下網頁:
http://www.hkforum.org/viewthread.php?action=printable&tid=3691

習俗安排(因為你冇講用邊種宗教形式﹐assume你係拜神嘅):

1) 先人過世後至出殯前唔會上香。家屬該以“品神”方式將先人過世嘅消息通知祖先﹐然後用反轉嘅紅紙(紅色向內﹐白色向外)封起所有神位

2) 決定用邊種下葬方式後﹐盡快去殯儀館安排出殯事宜。殯儀館會派一個agent serve家屬﹐法師即日為先人計算回魂日期

*為左唔好miss左回魂... 況且靈堂booking可能好緊張, 家屬最好於先人死後七日內到殯儀館安排喪禮

3) 家屬可於儀館選購棺木﹑骨灰甕﹐唔使即日俾$﹐連埋靈堂﹑儀式o一齊計。 Agent會介紹家屬去殯儀館內嘅長生店買壽衣壽被等陪葬品﹑祭品。價錢比出面貴小小﹐多數人費事煩都會幫襯館內的

*喪禮可貴可平﹐有人一萬蚊包埋壽﹐亦有人洗十萬八萬﹐唔好俾agent tum﹐唔好俾佢覺得你好洗得起錢﹐視乎自己budget

*金銀衣紙可出街買﹐但金銀橋﹑大屋﹑一部份紙錢﹑往生錢o個類最好由殯儀館打點﹐因為佢地可以抽佣﹐唔好得罪殯儀館﹐俾多個佣佢抽﹐免卻好多麻煩

4) 殯儀館附近有長生店﹑花店﹐家屬可以順便去訂埋花圈

5) 如回魂日於出殯前﹐安排好喪禮後﹐只有回魂一事處理

回魂夜當日要o係門外點一支白蠟燭引路。於桌上(中間位)擺一張先人嘅相﹐相前放一個橙做香爐。周邊擺放先人喜歡嘅食物﹐除馬肉﹑牛肉外﹐放三set碗筷於桌子三邊

家屬向先人遺像上香及作簡單祭祀。回魂前15分鐘入房迴避﹐唔好發出聲響。如回魂期間有需要出房﹐應打開房門一線﹐扔一件銀器(e.g. 銀剪)出去﹐關上房門等幾分鐘再出去。回魂後多等15-30分鐘﹐扔銀器後再出房

所有祭品﹑碗筷﹑先人遺像於回魂翌日棄掉﹐勿保存/再用

6) 坐夜前一至兩日﹐殯儀館會安排車去殮房接先人遺體。家屬可帶備香燭於殮房外拜祭(唔可以燒衣)。唔好俾眼淚滴落遺體﹐會令先人走得唔安樂

*殯儀館職員有2-3人﹐記得準備賞錢﹐同埋問下坐夜當日化妝師幾點到。依點非常重要﹐如先人配戴假牙的話﹐要o係化妝前將假牙送往靈堂。最好o係化妝前先打賞化妝師﹐咁佢樣樣野都會跟得足d

7) 以前嘅人由先人離去當日起守齋﹐而家只係坐夜及出殯當日守齌﹐免添先人罪孽。坐夜當晚嘅齋菜可於殯儀館預訂

8) 坐夜當日﹐眾子孫必須穿著全白素服於靈堂集合。記得打賞靈堂職員﹐尤其要打賞多d俾化妝師。完成化妝後﹐化妝師唔會再出現﹐有咩執漏要盡早講

先人上好妝﹐法師領家屬進行儀式請先人到靈堂。最緊要唔好俾長明燈熄。披麻嘅子孫負責家屬謝禮﹐其他人幫手摺金銀﹑化寶﹑封吉儀﹐另派1-2人負責接待﹑紀錄 收帛金

*預留兩條金銀“攝”棺木

*吉儀封入1塊紙帕﹑1個$1硬幣﹑1粒糖

*家屬請自備水

6:30-7時: 殯儀館安排齋菜供家屬晚膳

7:30-8時左右: 有的話會進行破地獄儀式

8:30左右: 由法師帶領儀式﹐然後拎祭品到殯儀館外嘅大型化寶爐化寶

10:00-10:30: 坐夜完成

9) 出殯日: 將先人陪葬品﹑生前衣物帶往靈堂﹐等升棺嘅時後由職員放入棺木內

大殮﹑蓋棺後家屬及親友由旅遊巴載上山﹐長子抱先人遺照上靈車上山。

到達後進行入土/火葬儀式﹐完成後(如即日脫服的話)由脫服﹑跨火盤﹐上旅遊巴往英雄宴。子孫於旅遊車上必須將所有吉儀拆封﹐$1硬幣及糖果可留﹐吉儀封一定要丟掉﹐勿帶返家

去英雄宴前﹐法師會帶領子孫返家為先人進人上位儀式。法師進行儀式並拆去封著神位的紅紙﹐完成上高再去英雄。如果子孫選擇即日幫先人歸位﹐法師會一併完成 (歸位要拜神﹐子孫應自行準備燒肉﹑雞)

英雄宴最緊要有燒肉﹐宴後各子孫各自歸家﹐孝服(白衣白褲)無須丟棄﹐可再穿