《評論》龍珠z邊個最強

我絕對唔贊成，係龍珠Z裏面，悟空係最強嘅講法。其實，係龍珠Z嘅最後數十集，已經出現咗一樣叫「融合」嘅嘢，而融合係將兩個人結合成一個人嘅一種招式。當融合之後，融合出嚟嘅角色，一定比起融合嘅兩個人加起來仲要強。而係龍珠Z最後嘅幾集，悟空得到一樣只有界王神先有嘅嘢，「天界神珠」。而呢樣嘢，係一對耳環，需要兩個人各自配帶在左右耳上，配帶好後，兩個人就會融合，而且唔會有時間限制。而係悟空帶住天界神珠嚟到地球嘅時候，悟空本來想同悟飯融合，但連悟飯都比魔人布歐吸收咗。之後比達出現，悟空要求比達跟自己融合，比達於危急關頭，終於都願意同悟空融合。融合出嚟之後嘅角色，叫做比古洛，雖然當時嘅布歐未變成小布歐，但佢已經吸收咗悟飯、魔童……實力已經好強。但係當比古洛出場，布歐對佢作出一連串嘅猛攻，但比古洛只係用一隻腳就已經可以應付，而且睇得出比古洛非常輕鬆。而比古洛所用嘅任何一招，魔人布歐都毫無還擊之力，我地可以估計出，如果比古洛要消滅魔人布歐，絕對係綽綽有餘，但佢冇咁做，係因為要救出一眾被魔人布歐吸收嘅人。但入到魔人布歐體內後，因為空氣污濁，所以被逼分體。我地可以再估計，就算魔人布歐變咗做小布歐後實力再強，都唔會超出原本嘅魔人布歐好多。但係就算係咁，比古洛只需用一隻腳就能夠對付魔人布歐，對付小布歐，應該都唔會輸啦。所以，我絕對唔贊成悟空係龍珠Z最強人物嘅講法。