旅發局臧明華是否整容?點解佢做錯事無人問責?點解佢唔比人拉?

立法會政府帳目委員會就旅發局事件宣判後，被譴責前總幹事臧明華及前副總幹事李陳嘉恩都冇作回應，尋日臧明華終於有講，話要時間考慮，今日就會同旅發局再聯絡。唔知佢經過四十八小時楔高枕頭之後，係要訴諸法律定係乖乖還錢？旅發局主席田北俊尋日就透過電台節目軟硬兼施，一方面曉以大義，話打官司可能引起社會負面睇法，但都好硬話為向社會交代，即使花二十萬元打官司都要追番十四萬元。

呢個十四萬元官司會唔會成真，要睇今日雙方面決定。據講，帳委會前日下晝公布報告後，旅發局就由總幹事劉鎮漢聯絡臧明華，劉又打手提電話又寄電郵，結果臧明華手機飛落留言信箱、電郵就直到午夜過後先至有回音，臧明華回覆話需要時間考慮，今日先再聯絡旅發局。

臧明華深宵時分覆電郵，可見佢都輾轉反側、午夜難眠，或者刨完報告、左思右想好唔得閒，總之，佢成功爭取多一日時間去研究問題，有可能係要了解法律上同技術上問題。立法會帳委會一名成員就話，臧明華同李陳嘉恩聆訊期間已經發律師信畀委員會，佢都預報告公布後，或者仲有律師信甚至官司跟尾。

諗深一層，臧明華要楔高枕頭考慮問題唔少，今次帳委會報告對佢工作能力同個人風格有唔少墨，無論佢將來做邊行，今次事件影響都好深遠，尤其係聆訊過程已經引來各方關注，將來上法庭，會唔會再次成為社會事件呢？所以田少好似睇穿佢意圖咁，尋日個電台節目中話希望臧明華還款，因為帳委會覺得她有問題；田少更話：「可能你（臧明華）技術上打得甩（官司），但社會輿論對你始終唔係咁好囉。」