第一次養魚甚麼也不懂20points快

唔知你個缸有幾大，只能基本咁答：

１．掉哂ｄ氧氣珠同生命水佢。冇用架，呃新手o既o野。魚亦都唔會食。

２．買個氣泵同一個水妖（氣動式過濾器）〔相信你冇過濾〕，過濾能力一尺缸夠有餘。

３．每一餵一次，每次兩分鐘食得完就夠，餵得多，痾得多，水污染得更快。

４．你o個兩條係乜魚？我估係米奇或孔雀？你見唔見生殖孔突出？如果係都可以放入生仔箱啦。

５．新水放一日已經可以夠氯氣消散。半缸水係唔夠架啦，快ｄ儲水隔夜啦。

既然係第一次養魚，我引用返一個以前答新手o既答案（http://hk.knowledge.yahoo.com/question/question?qid=7007100802243）俾你參考，相信對你明白點搞個缸有幫助：

１．不應超養，一升水約養長度 1cm o既魚，因為魚o既屎尿都係有氮化物如阿摩尼亞，呢ｄ係有毒物質，水多就可以稀釋，但魚多的話，濃度就會增加得快，高到一個水平就會毒死魚。所以超養真係有性命危險。

濾水器要有生物環同生化棉，因為呢ｄ濾材有大o既表面面積俾硝化菌附著。硝化菌會將水中o既阿摩尼亞變成冇咁強毒性o既硝酸鹽，所以濾水器容納o既生物環愈多愈好，等硝化系統多ｄ菌住o係度。

濾水器o既作用，係用泵不斷將水泵過濾材，等硝化菌不斷處理廢料，最少一個鐘將全缸水循環六次。

２．新缸其實入水後要任由運作濾水器運作一斷時間先會培養到足夠硝化菌，開始時只加一兩條魚，等佢地o既大小二便俾食物硝化菌，一兩個星期後，ｄ魚唔死，就表示硝化菌數量足夠，然後先可以慢慢逐少加魚。

３．新手大忌係立亂買魚，唔知魚性結果買埋藍斑馬、小王子呢ｄ惡魚；九角龍呢類食魚仔o既魚；仲有會大到成尺長o既琵琶。買魚前研究清楚，可以去討論區問下人，或上網／睇書搵下資料，千祈唔好問售貨員，多數撞板。

仲有，唔好貪得意，又買ｄ龍蝦、龜、蠑螈入缸。魚還魚，蝦就要買水草蝦，幾蚊包o個ｄ蝦有對大鉗，會捉魚食架！亦唔好買紅白色靚蝦養，一來貴，二來被魚啄你就揼心口啦。

另外就係買左病魚。新魚有病，會搞到成缸瘟疫，所以買魚要揀清楚，摺埋鰭／尾，同缸有死／病，身上有爛尾／鰭／白點／一舊發霉狀白色物體／身上一片白左色／魚眼浮腫，都要忍手唔好要。

另外，唔好貪平買袋裝魚。袋裝魚一般死亡率高，因為你唔知佢入左袋幾耐，剛入袋都可能係一有貨到就即入，舟車勞頓，身體係會差ｄ。所以最好唔好買袋裝魚，特別係個袋冇乜氣，水唔清，魚唔精神o個ｄ。

買左後，要原袋放入缸五至十分鐘，等袋中水溫同魚缸水一樣。呢個步驟叫做對溫。

然後，可以先倒去袋中部份o既水（如倒到剩返四份一袋，但當然要視乎袋size 同魚o既數目），再慢慢加入魚缸水，加完隔五分鐘再加ｄ，等魚適應魚缸水質。呢個步驟叫做對水。加到係原袋水o既約三倍，然後將魚撈出入缸，袋水唔要，以免有病菌。

４．其他裝備，最基本係氣泵同氣石啦；怕停電，可以買乾濕兩用o個ｄ。仲有一盞燈，方便自己睇魚嘛，但唔好開足廿四小時，因為魚都要分日夜，要俾佢有得訓。冬天或者夏天冷氣開得勁的話，要有暖管，將水溫維持約廿五六度－－咁即係要有個溫度計啦。

５．平日管理，換水一星期最少一次，如上所述，要養水。大缸養唔到咁多水，你咁細個缸就唔好懶啦。每次換水量為一半至三份一缸。重點係集中吸缸底ｄ屎／屎粉。可以買一個手動泵去吸。換水時可以將過濾器o既濾材用抽出o既水沖一沖，等ｄ大粒o既垃圾清走即可，千萬唔好用水喉水，因為氯氣殺菌。白濾棉唔一定要換，黑哂先多菌呀！一樣用舊水沖下就得啦。 夏天天氣熱，缸唔好放o係太陽晒到o既地方，除左生青苔之外，會煲魚湯。注意水溫，如果到３０ｃ就要買個夾缸邊o既風扇４５度角吹住水面降溫。

６．餵魚一日一次夠啦，放糧要三至五分鐘食得哂為準，少少餓唔會死，多多糧食唔完會爛，食得哂就狂痾，都會令水質差。要留意魚有冇我上面講揀魚時o個ｄ癥狀，有的話要用細缸隔離，用藥。

氧氣珠對供氧係無作用,
好多人都問過同樣問題
亦都有好多人話過係無用,
所以建議你買返個濾水器~

另外,
生命水呢樣野就好似好少見人話用=____=
所以我諗佢都係對魚既生命無幫助~

水既處理:
每兩星期換一次水,
每次換1/3至1/4
同埋要養水
換水約前兩日先將水拎出黎
放兩日除氯氣
另外加魚入缸前,
要先對水
令袋中水同缸中水既水溫平衡~
咁魚就容易適應~

喂魚:
一日一次
一次大約一個搞奶茶既匙更就岩嫁啦~
唔好放多,
魚會唔知飽
or食淨就會令水質變差,
魚就死~
所以喂少好過喂多~

其實一入缸就放兩條魚入去產卵器
生左先放返佢地出黎就岩嫁啦~
產卵器應該放係缸入面~
魚缸唔夠水既話都照放住入去先,
因為佢地生完bb就會食佢地= =

d魚會食氧氣珠嫁,
但係含左一陣就會吐出,
所以唔駛怕,
我以前都試過用氧氣珠養魚~
不過每次養唔過一個月就死晒=.=