關於探監(覊留所and監獄)門

覊留所 / 收押所一般係收留未被審訊嘅疑犯或被判有罪而未判刑期嘅還押犯. 己被定罪的犯人就監禁於監獄, 但而家多數稱為懲教所.

若佢屬還柙犯. 你可入以下呢D用品俾佢 (可以係茘枝角收押所附近個油站可以買到):
“叻” - 大包裝M & M 朱古力 (花生[黃色包裝]或純朱古力[啡色包裝]) - 每星期各一包
“四大” - 華園齐燒鵝, 牛肉粒. 豬肉片, 同魷魚絲 - 每星期各一包

“拖水” - "祝君早安"面巾 - 每月x 2

直身全透明Oral B牙刷 - 每月x 1

"醒神" - 大枝裝黑人牙膏 - 每月x 1 ;

“滑石” - "力士" 番皂 - 每月x 1 ;

“ 滑石盒” - 透明軟膠塑膠番皂盒 x 1 ;

透明文件袋(有塑膠拉練, A4 size) x 1 ;

A4 OXFORD信紙簿 : 每月x 2 ;

“ 漿水” - 花王 "飄逸" 綠色洗頭水 - 每月x 1
班馬牌 Janmee原子筆 - 每月x 2
Gambol單行簿 - 每月 x 2

希爾頓 Hilton 軟包金裝標準煙 - 每2星期10 包 ;

"Tempo" 一條過長方型紙巾(唔好拆開) - 每月x 10 包


*每個犯人每星期(無論幾多人探)只可收6包煙. 多咗由署方儲起.

如果佢已被判刑, 咁就屬定罪犯. 唔可以再入以上d嘢俾佢. 只可以每個月可入大tempo紙巾 10包裝1條; 祝君早安毛巾2條; 6本雜誌, A4纸一本, 斑馬牌藍色原子筆2支. 亦可在犯人申請後入錢俾佢經福利官買收音機同電鬚刨, 有呢兩樣就每月可入黑貓AAA / AA電8粒. 監獄出面d士多仔有齊可入俾佢嘅野賣.

其他注意事項:
探訪: 如你只係佢朋友, 唔算親属, 就記得叫佢申請加你個名在探訪名單上, 否則你探唔到.
還押犯每星期有6日可探(每星期有1日無得探, 各院所唔同日子). 每人每日只有一次探訪, 每次15分鐘, 最多2人一齊探, 無得分開探. 所以最好約定去, 否則該日被人探過, 第二輪去嘅就白行一趟. 律師探訪就不限日子 / 人數 / 次數 / 時間.
被定罪的犯人嘅探期, 係每個月兩次, 每次半個鐘, 每次限最多3個人. 但犯人可經監頭簿申請每月加多兩次探訪, 即共4次. 通常都批.
無限兒童年齡, 但太細個就最好唔好帶去, 始終俾個細路見到佢坐監對個細路唔係咁好.
信件: 監獄內寄俾犯人既信件, 全部都會被懲教署職員拆開檢查. 在確定封信無違禁物後, 個信封會被職員收起, 唔會俾個犯人. 只係會俾封信佢. 原因係怕有人將毒品收藏在個郵票同信封之間. 如果個犯人想要番個信封, 就要提出合理理由, 例如: 想要番個回郵地址, 向獄方申請攞番. 就算申請成功, 個郵票都會被撕走.
寄信俾犯人要注意以下要點:
(1) 一定要在信封面及每一頁信寫上犯人的編號. 監獄咁多人, 同名同姓嘅人大把. 所以唔寫名都唔緊要, 但唔寫編號嘅信個犯人係收唔到嘅. 而且因為無左個信封, 所以要在每一頁信寫上犯人的編號, 以防撈亂左可以揾得番.
(2) 唔係一定要白色信封 / 信紙. 但信封 / 信紙上千祈唔好貼上任何貼紙. 否則封信會一個個窿, 因為d貼紙會全部被剪去(理由同上).
(3) 信封内除左信紙唔可以附有任何物件, 例如: 錢, 郵票, 回郵信封, 食物, 書簽, 咭片等等. 否則個犯人會被叫去收押室(俗稱: "指模房"), 職員會在佢面前將封信存入佢份私人物件(俗稱: "包頭")內, 到佢出獄先交還佢.

2008-04-25 21:42:01 補充：
moonight兄:
1. 探訪有限次數及人數.否則有廿人探佢咪探足成日?
2. 唔可以入郵票俾佢. 還押犯每日可免費寄一封信, 定罪犯要用工資買郵票.
3. 你話 "...用公文袋寄入去..." - 犯法!!
<監獄條例>第18條:

...任何人如將任何...武器、 工具.. 酒類、 鴉片或... 煙草、 金錢、 衣物、 糧食、 信件、 郵票 ...或任何其他物品帶進...或以任何形式引進或傳遞入任何監獄， 或傳遞給...， 均屬犯罪， 一經定罪， 可處罰款$2000及監禁3年。